shadow
Diocese de Dili > NOTÍCIAS > REFLEXÃO > REZA..? Aiihh..!!Baruk !!!…Focus TELEMÓVEL Deit…!

REZA..? Aiihh..!!Baruk !!!…Focus TELEMÓVEL Deit…!

REFLEXÃO  DOMINGO COMUM XXIX

 

            Aparelho nebe horas nee ema hot-hotu kaer tanto labarik no ema adulto sira, tanto estudante no vendedor sira, tanto analfabeto ho alfabeto sira, hotu hotu goza moris hodi kaer telemóvel. Nee Direito ema ida-idak nian, maibé iha procissão, iha Missa laran, iha reza terço hamutuk, iha encontro, iha serviço fatin mak ema focus liu telemóvel do que actividade hirak nebe exige ita nia disposição hodi pausa lai cek Telemófel, nee precisa tau iha questão. Quanto Mais oração nebe precisa ita nia contemplação no comunicação ho Maromak, ita precisa husik lai ita nia necessidade privada hirak nee. Keta baruk atu fo netik tempo ba Maromak iha momento importante hirak nebe temi iha leten.

Ita loke Reflexão ba Domingo semana nee hodi cita são Paulo nia liafuan iha nia carte be dehan: “Oan doben: la’o tuir nafatin doutrina nebé o simu ona; doutrina ne’e mak bele fo laran metin ba o, basá, o hatene ema sira nebe hanourin doutrina ne’e ba o.” Palavra Bíblica ida dehan: E tudo o que com fé pedirdes em vossas orações, haveis de receber//Buat hotu nebe ita husu ho fiar, ita sei simu duni. Conteúdo principal husi Maromak nia futar lia fuan, nebe São Lucas relata liu husi ninia Evangelho Domingo semana nee mak; oração nebe basea ba fiar (fé). Primeira leitura haktuir kona ba profeta Moisés nebe ho oração consegue alcança vitória wainhira nia lidera luta israelita sira nian hasoru inimigo sira.

Jesus nia ai-knanoik iha Evangelho mos hanorin katak; ita precisa halo oração bebeik no la bele kole halo oração. Nee significa katak; iha moris nee, wainhira enfrenta problema eh dificuldade oioin, ita precisa hakiak no haburas nafatin perseverança (ketekunan) iha oração.

Iha Antigo Testamento haktuir katak, vitória husi luta povo israel nian wainhira funu hasoru povo Amalec, sira consegue atinge tanba kbiit oração nebe Moisés hasae ba Maromak. Iha Evangelho Domingo semana nee, Jesus claramente koalia kona ba importância husi oração no husu atu ita nobun badinas no la kole halo oração. Jesus indica exemplo ba feto faluk nebe ema trata la justo maibé, perseverante hodi esforço-an nafatin atu hetan justiça ba nia.

Precisa ita tau atenção katak; Jesus fo imagem kona ba juiz (hakim) ida, nebe rona no atende pedido husi feto faluk nee. Juiz nee halo nunee laos tanba nia hadomi lialos/verdade no defende justiça maibé, juiz nee atende feto faluk nee tanba nia lakohi atu nia perturba bebeik juiz nee. Figura juiz nee, tuir Jesus, laos figura nebe exemplar basá, ninia comportamento la diak. Jesus iha relato nee, hakarak encoraja ita nobun katak; além de dificuldade lobuk mak ita hasoru iha moris nee, ita sei iha biban hodi haree parte positivo husi dificuldade hirak nee.

Costume halo oração (reza) sai dificuldade boot ba Cristão Católico balun, sa tan quase sarani barak la iha paciência no perseverante (tekun) iha vida oração. Exemplo concreto mak; wainhira ita tur hamutuk hodi reza eh halo oração, foin tur deit minuto 10 hanesan nee, ema ida rua quase matan todan atu dukur ona. Maibé, wainhira tur conta istória ruma nebe la hun la dikin,  jovem sira halimar Game PUBG, sira bele augenta too oras 4 ou 5. Lalaok nee dala barak liu acontece ba Cristão foin sae sira (jovens) iha Igreja Católica Timor Leste. Fenómena nee acontece tanba relaciona ho situação modernisação iha Igreja Timor Leste. Mundo instan; significa ema hotu hakarak buat hothotu lalais, fácil, hakarak hetan lalais nomos hakarak hotu lalais, hakarak kaer mos telemóvel hanesan ema seluk, hakarak ema hatene sira nia existência.

Mundo consumerismo lori ema ba halo competição hodi hetan sasan oioin nebe produz husi tecnologia. Tenik consumerismo tanba ema utiliza dalan oioin hodi halibur osan barak atu bele sosa buat oioin inclui sosa gosto. Ema buka acomoda eh halibur aparelho hirak hanesan telemóvel, Laptop, Motor, Kareta nee nudar necessidade loroloron nebe fo laran ksolok ba ema. Infelizmente, mundo Instan nee la bele halo ema obriga sira nia vontade ba Maromak nia hanorin sira.

 Realidade mak nee; katak Cristo, Maromak Oan, Maksoyn ba ema hotu nebe Maromak hadomi, Nia rasik mos hasoru dificuldade oioin hanesan: ema rejeita, ema ofende, ema julga, Nia terus too mate iha Cruz. Iha momento ikus molok simu terus husi ema aat sira, Jesus iha jardim Oliveira, husu atu atu hasees Nia husu Calice terus nee. Aman Maromak hatan pedido nee hodi fo Moris Hias Jesus nudar Maromak Oan husi rate matebian sira nian iha Jerusalém. Afinal Jesus nia oração hetan resposta milagrosa no brilhante husi Maromak.

Iha ai-knanoik nebe ita rona no acompanha iha Evangelho Domingo semana nee, convida ita nobun atu bele compreende didiak  sentido husi costume halo oração ou Reza nebe los. Ita nia hanoin eh concentração kona ba Maromak maske sei hanesan hela ser humano nebe frágil maibé, Maromak nebe kbiit nain, compreende saida mak ita precisa liu husi oração hirak nebe ita hasae ba Nia. Maromak hatene wainhira mak nia temque involve iha ita nia moris basá, Maromak nia tulun nunca tarde. Tanba nee mak São Paulo fo aten brani ita hodi la bele kole/baruk halo oração iha moris nee. Matenek nain ida naran peter kreeft hatete lia murak nee: Lack of prayer is the cause of lack of time—Ita baruk reza tanba ita ita nunca fo tempo hodi habelun ho Maromak.

Dala barak ita dúvida ho Maromak nia diak no Maromak nia kbi’it. Ita nia imaginção sira dala barak ita hanoin los liu fali Maromak nian. Se Maromak haruka Jesus Cristo Maromak Oan, nebe mai halao viagem moris ho terus oioin iha rai klaran, merece ba ita atu exige Maromak oferece dalan moris nebe diak liu, liu husi pedido nebe ita hatoo iha oração sira. Jesus mos sente nakdedar wainhira Nia atu hasoru terus no mate, maibé, Nia fiar metin no fiel nafatin hodi cumpri Maromak nia vontade. Iha Evangelho Domingo semana nee nia rohan, Jesus hateten: Maibé, imi hanoin katak bainhira Mane Maksoyn fila hikas mai, Nia hetan ema ruma ho fiar iha rai-klaran?” // Jika Anak Manusia datang, adakah Ia menemukan iman di bumi?” // Mas, quando o Filho do Homem voltar, encontrará a fé sobre a terra?». Jesus nia liafuan nee indica mai ita nobun nudar Cristão Católico. Ita sei precisa nafatin Maromak haroman ita neon hodi compreende didiak oinsa ita bele moris tuir fiar nebe los liu husi ita nia oração.

Dala wain ita iha tendência ida katak; ita hakarak kedas hetan resposta wainhira ita harohan ba Maromak iha ita nia oração sira. tan nee mak wainhira ita hetan resposta lalais husi Maromak, ita sente laran contente. Maibé, wainhira ita la hetan resposta imediata husi ita nia oração, ita sente kecewa no laran taridu no desesperado tan Maromak la hatan ita nia oração.

Husi relato Evangelho Domingo semana nee, ita bele capta mensagem principal mak: Humildade (haraik-an). Atu atinge lalaok Humilde nee, ita precisa perseverança (ketekunan) iha oração. Perseverança nee fo força mai ita hodi hametin fiar. Tan fiar precisa cumpri tuir Maromak nia vontade, tan Maromak sempre hakarak ita hotu hetan diak (salvação) iha moris nee. Maske ita nudar ema, sempre fraco no la compreende buat barak iha moris nee.

Maibé, exemplo perseverança nebe ita bele foti hodi banati tuir mak; feto faluk nebe paciência hodi buka justiça; nudar Evangelho Domingo semana nee haktuir. Jesus mos perseverante hodi halo tuir Maromak nia hakarak too cumpri missão remata iha mundo nee. Fiar nebe perseverante nee mak sai hanesan we matan força no oração nebe halo ita brani hasoru dificuldade sira iha mundo rai klaran. Hanoin ba katak; oração facilita ita comunica gratuitamente ho Maromak. Assim Seja e Bem Haja. (ignaslopes)

Leave a Reply

Your email address will not be published. Required fields are marked *