shadow
Diocese de Dili > NOTÍCIAS > LETURA DIÁRIA > XXIX Domingo Tempo Comum (ANO C)

XXIX Domingo Tempo Comum (ANO C)

Primeira Leitura                      Ex. 17, 8-13

Lia housi Livro Êxodo:

Iha loron hirak nebá, Amalec oan sira ba hatuda Israel oan sira iha rai Refidin. Moisés dehan ba Josué: “Hili ema ba hatuda Amalec oan sira. Aban dader ha’u sei sa’e ba foho tutun ho Maromak Nia óe iha ha’u liman”.  Josué halo tuir kedas Moisés nia lia-fuan, hodi la’o kedas ba funu hasouru Amalec oan sira. Moisés, Aarão no Hur, sira sa’e ba, hela iha foho tutun. Wainhira Moisés foti hela liman, Israel oan sira manán; Maibé, hatun tiha liman, Amalec oan sira maka’as liu fali sira. Tamba Moisés nia liman kole ona, nia maluk sira foti fatuk atu nia tur tiha. Moisés tur duni iha fatuk ne’e. Aarão ho Hur tahan hela Moisés nia liman, ida housi kwanan, ida housi karuk. Nune’e, Moisés bele foti liman to’o loron nakukun. Josué manán duni Amalec ho nia emar sira, hodi oho sira hotu.

Maromak Futar Lia.

 

Salmo Responsorial                                                                                                                                        Sal. 120(121), 1-2. 5-6. 7-8

Refrão : Ita simu tulun housi Na’i, be halo lalehan no rai!!! Repete-se

Ha’u foti matan ba foho: 

“Ha’u tulun mai housi nebé?” 

Ha’u tulun mai housi Na’i

be halo lalehan no rai. Refrão

 

Nia la husik ó ain namdoras,

ó nia mahein la toba:

Israel nia maksoin la tur la toba. Refrão

 

Na’i, mak ó nia subar fatin,

Nia hela nafatin ó sorin.

Rai loron, loron-matan la halo áat ó;

Rai kalan, fulan la halo áat ó. Refrão

 

Na’i hasai ó housi áat,

Nia tau matan ba ó moris;

Na’i la’o tuir ó iha moris tomak. Refrão

 

Segunda Leitura                                                                                                                                                                  2 Tim. 3, 14-4, 2

Lia housi São Paulo nia surat ba Timóteo:

Oan doben: La’o tuir nafatin doutrina nebé ó simu ona; doutrina ne’e mak bele fo laran metin ba ó, basá, ó hatene ema sira nebé hanourin doutrina ne’e ba ó. Houri kiik kedas mak ó hatene Escritura.  Escritura mak bele fo matenek ba ó; matenek nebé mai housi Escritura mak bele halo ó hetan salvação housi fiar nebé hela iha Cristo Jesus. Lia-fuan tomak nebé Escritura ninian Na’i Maromak mak fo hatene. Escritura di’ak tebes atu hatudu dalan los no atu hanourin tuir justisa. Nune’e de’it mak Maromak nia ona sira sai di’ak lolos, hodi hatene banati tuir lolos hahalok di’ak tomak. Ha’u husu barak ba ó iha Maromak futar oin no iha Cristo Jesus oin, Jesus nebé sei mai tesi lia ba ema moris no ema mate sira; ha’u husu barak hodi Jesus nebé sei mosu mai, Nia naran no Nia Reino: Haklaken Maromak nia Futar Lia, haklaken nafatin, ho oras ka la ho oras; hanourin, haksi’ak, hanourin ho paciência, ho matenek tomak.

Maromak Futar Lia.

 

Aclamação                                                                                                                                                                                              Lc. 11, 9

Refrão : Aleluia, Aleluia!! Repete-se

Imi husu sei fo;

Imi buka sei hetan;

Imi baku sei loke. Refrão

 

Evangelho                                                                                                                                                                                          Lc. 18, 1-8

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun ba Escolante sira, hodi haktuir aiknanoik ida kona ba obrigação atu keta kole harohan nafatin: “Iha cidade ida, moris juíz ida, la hamta’uk Maromak la ta’uk ema. Iha cidade ne’e, moris mos feto faluk ida. Feto ne’e ba hasouru juíz hodi dehan:  ‘Halo justisa hasouru ha’u nia maluk’.  Dala barak ona mak juíz ne’e la kohi halo justisa. Maibé, loron ida, nia hanoin iha nia laran: ‘Los duni, ha’u la hamta’uk Na’i Maromak, ha’u la ta’uk ema sira. Maibé, tan feto faluk ne’e mai fo ulun fatuk moras bei-beik mai ha’u, ha’u ba halo duni justisa, atu nia labele mai hakole tan ha’u”. Hafoin, Na’i lia tun teni hodi dehan:  “Imi rona didi’ak lia-fuan nebé juíz áat ne’e dehan! Na’i Maromak sei la halo justisa ba ema sira nebé Nia fihir, ba ema sira nebé kalan-loron hasa’e lia ba Nia?  Na’i Maromak sei halo ema sira ne’e hein kleur tan? Tebes, Ha’u dehan kedas ba imi: Na’i Maromak sei halo kedas justisa ba sira. Maibé, imi hanoin katak bainhira Mane Maksoin fila hikas mai, Nia hetan ema ruma ho fiar iha rai-klaran?”.

Lia Maksoyn.

Leave a Reply

Your email address will not be published. Required fields are marked *