shadow
Diocese de Dili > NOTÍCIAS > LETURA DIÁRIA > Segunda – Feira, XXIX Semana do Tempo Comum (Ano C)

Segunda – Feira, XXIX Semana do Tempo Comum (Ano C)

Primeira Leitura                     Rom. 4. 20-25

Lia housi São Paulo nia Surat ba sarani sira iha Roma:

Maun alin sira: Iha Maromak lia hakotu nia oin, Abraão fiar nafatin Maromak nia promessa; hodi fiar, nia hetan kbiit no fó glória ba Maromak, no laran metin teb-tebes katak buat nebé Maromak hakotu tiha, Nia bele halo tuir duni. Tan ne’e mak buat ne’e sura ba nia nu’udar justiça. Maibé la’os ba nia de’it mak hakerek katak “buat ne’e sura ba nia”, sei sura mós mai ita, nebé fiar iha Ida nebé foti Jesus, ita Na’i housi mate, nebé saran tiha tan ita nia sala sira no moris hi’as fali atu ita sai ema lós.

Maromak Futar Lia.

 

Salmo Responsorial                                                                                                                     Lc. 1. 69-70, 71-72, 73-75 (R. cf. 68)

Refrão : Rahun di’ak ba Na’i, Israel Nia Maromak, basá, mai haré no soi Nia povo!!! Repete-se

Nia haraik mai ita Maksoyn ida kbiit tebes,

Iha Nia atan David nia uma,

Nu’udar lia hakotu ona hodi Nia santo sira ibun,

Profeta sira iha tempo uluk. Refrão

 

Atu soi ita housi ita funu baluk sira,

No housi ema laran áat hotu sira liman.

Hatudu Nia laran luak ba ita aman sira,

Hodi hanoin Nia aliança santa. Refrão

 

Tuir juramento be halo ona ba Abraão, ita aman,

Katak graça ne’e sei haraik mai ita,

Atu ita serbi Nia, ho ta’uk laek,

Sai housi funu baluk sira liman,

Iha santidade no justiça, iha Nia futar oin,

Loron-loron iha ita nia moris tomak. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!! Repete-se

Ksolok ba sira be kiak iha espírito basá reino

Lalehan sira nian. Refrão

 

Evangelho                                                                                                                                                                                      Lc. 12. 13-21

Na’i Jesus Cristo nia Evangelho nu’udar São Lucas haktuir:

Iha tempo nebá, housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” Nia hatan: “Belun, sé mak foti Ha’u atu tesi lia kona ba imi?” Hafoin Nia dehan ba sira: “Imi haré ba, keta kaan rikusoi, basá, la’os ema nia rikusoi mak halo ema moris liu.”

Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. Nia hanoin hodi dehan ba nia an: ‘Ha’u sei halo sá lós? Basá ha’u fatin la iha atu rai ha’u nia aihan sira.’ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha nebá ha’u sei rai trigo hotu ho ha’u nia rikusoi tomak. No ha’u sei dehan ba ha’u nia klamar: ‘Ha’u klamar, ó iha sasan barak nebé rai hela ba tinan ua’in; hakmatek ba, han hemu hodi haksolok ba.’ Maibé Maromak dehan ba nia: ‘Beikten! Iha kalan ne’e kedas Ha’u sei husu ó atu saran ó nia klamar; sasan sira nebé ó rai hela sei sai se nian?’ Nune’e mós sei mosu ba ema nebé rai hela rikusoi ba nia an, maibé la sai riku ba Maromak futar matan”.

Lia Maksoyn.

Leave a Reply

Your email address will not be published. Required fields are marked *