shadow
Diocese de Dili > NOTÍCIAS > REFLEXÃO > HAU BEIK SALA…BEIK SALA, LA DIAK LIU…Beik Duni!!!

HAU BEIK SALA…BEIK SALA, LA DIAK LIU…Beik Duni!!!

Reflexão Domingo Comum XXX, ano C 2019

 

Ita loke reflexão nee ho oração salmista nian be dehan: Ema ki’ak harohan, Na’i rona nia. Nia sei la hakmatek, wainhira nia oração la to’o Maromak. Nunee mos ema maksalak nebe arrenpende nia salan, Maromak sei simu nia. Too ponto nee mosu pergunta, então, ema rico sira nia oração Maromak simu ka lae? Sarani Católico sira nebe ba bebeik missa sempre reza oração acto de contrição hodi dere hirus matan: HAU BEIK SALA…BEIK SALA LA DIAK LIU. Maibé, sai husi odamatan uma kreda, oração nee muda-an tiha ba: Hau hakarak kaer ukun, hau hakarak ukun mesakm hau hakarak hadau poder, hakarak buat hot-hotu ba hau, hau nia família, hau nia partidário no hau nia auxilar sira nebe halo tuir hau nia hakarak. Afinal ita reza tiha hotu ita consciente katak ita beik duni.

Situação política lao iha incertesa, ema sunu rai hamosu impacto ambiental iha foho sira Timor Leste nian, desemprego seidauk hetan solução final, issu Eleição Antecipada segunda parte (EA II) mosu fali tan iha público nia leet. Enquanto situação hirak nee lao hela, povo sira husu atu ukun nain sira li-liu lider político sira tur hamutuk hodi resolve tiha situação hirak nee. Ema wain harohan atu lalik mosu tan incertesa hirak nee tan deit ambição ba poder. Fahe posição política hodi hametin poder. Povo exerce ona sira nia obrigação hodi HILI partido sira ba kaer ukun. Questão impasse política nee urusan ema nai ulun político sira nian.

Desgraça tebes wainhira mosu tan eleição antecipada hodi habosu imi nia paixão ba poder hodi gasta osan milhão ba milhão hodi fan programa bosok sira iha tempo campanha, enquanto iha sikun sira território Timor Leste até cidade Dili rasik, ema sei lalin jerigen ba mai hodi buka be, ema buka dalan oi-oin hodi sustenta moris, estrada iha fatin barak rai rahun sei suar hela. Edifício escola iha fatin barak cuitado los, mestre sira nia salário mínimo tebes, professor sira la iha lei atu protege sira nia dignidade nudar educador, estudante bele baku mestre sira qualquer tempo, enquanto ONG internacional sira mai habelar projecto fase kakutak (wash Brain) hodi halekar direitos Humanos, Direitos das Crianças nebe hamosu lacuna balu katak; too momento balu mestre la iha poder moral atu hirus aluno malandro sira. Desgraça boot wainhira iha futuro ema lakon respeita ba nai ulun sira tan deit mestre labele lori ai sanak baku estudante sira hodi educa sira nia caraterística cidadánia.

Povo harohan atu, hirak nebe responsável ba rai ida nee, hatene-an hodi hakotu tiha situação nebe halo povo hahu lakon respeita ba sira. Reresentante povo sira sibuk mak prado ho razão halo fiscalização, razão tauk dignidade monu, maibé povo nebe hili sira, uma deit sei aat hela.

Domingo semana nee, Evangelista São Lucas, liu husi ai-knanoik fo imagem kona ba Maromak nia laran luak (misericórdia) nebe ita la bele sukat. Primeiro; iha Evangelho Domingo Comum XXIV (24), São Lucas relata kona ba Aman nebe laran diak, tan simu fali oan nebe lao lakon (Lc 15, 11-32).

Segundo: iha relato Evangelho Domingo semana nee (Domingo Comum XXX): haktuir kona ba Maromak nia laran luak ba cobrador imposto ida. Ema ne’e iha ninia sociedade, considerado hanesan sala nain/ pecador (Lc 18, 9-14).

Nune’e, iha celebração litúrgica (missa) nudar celebração domin nee, ita precisa hakneak iha Maromak futar oin hodi husu perdão ba ita nia hahalok aat sira.

Maromak be laran luak, simu no hakuak ema maksalak sira (os pecadores) , no fo perdão ba salan hotu hafoin haraik buat diak wain.

Impressionado tebes, Ai-knanoik sira nebe apresenta iha Evangelho, Jesus utiliza hodi hametin ita nia convicção/keyakinan katak; Maromak nia domin no laran luak rohan laek tebes. Iha lição eh lia menon sira husi ai-knanoik nee, fo imagem kona ba saida mak ita hanaran; arrependimento/hakribi salan (pertobatan).

Político sira precisa arrepende hodi husik ambição ba kotuk no hamutuk hanoin ba Timor Leste nia bem comum.

Ema nebe hakribi salan, mak ema hirak nebe matan nakloke eh arrepende duni ba Maromak nia diak sira nebe lakon ona tan nia la goza iha tempo hirak liu ona, halo nia lakon esperança. Ai-knanoik Filho Pródigo/oan nebe lakon(anak yang hilang), fo lição diak mai ita kona ba; oinsa arrepende salan hodi hamoris fali esperança nebe atu mohu dadaun ona iha Maromak futar oin. Hakribi kaan ten ukun hodi hamoris fali povo nia confinça no respeita.

Ai-knanoik Filho Pródigo nee relata katak; oan nee ikus mai ho neon sala, oan nee confessa duni nia salan wainhira nia decide hodi fila hikas ba nia aman nia uma. Nia saran-an hikas hodi hein aman nia decisão ba ninia destino final. Nia so fiar deit ba Aman Maromak nia laran luak/misericórdia.

Cobrador imposto eh Zaqueu iha São Lucas nia nia ai-knanoik Domingo semana nee, nia la gava-an eh hatudu ninia hahalok diak iha Maromak oin. Zaqueu ho haraik-an no laran arrepende, husu atu Maromak laran luak ba nia, tan Zaqueu hatene-an katak nia mos sala nain. Tanba nee mak nia koko haraik-an iha Jesus nia futar oin. Ema nebe hakribi salan mak hatene oinsa haraik-an (Hanya orang sungguh bertobat akan tahu dan mau menjadi rendah hati).

Iha ai-knanoik kona ba ema fariseu ho cobrador imposto, iha neba bele descobre katak; ema nia lalaok nebe contra makas arrependimento mak foti-an (keangkuhan hati). Loko-an tanba considera nia-an los liu ema seluk. Tanba nee mak iha ai-knanoik São Lucas nia Evangelho Domingo semana nee, Jesus fo imagem impressionado hodi compara ema fariseu ho cobrador imposto nee.

Iha neba, ema fariesu nee ho orgulho boot  gaba-an iha Maromak nia oin, hodi sura ninia lalaok diak sira kona ba oinsa nia fo esmola no tulun ema seluk. Jesus haree ema modelo hanesan nudar ema foti-an nebe la hatene fihir nia-an hodi descobre ninia fraquesa espiritual sira. Ninia hahalok hatudu katak; nia la precisa Maromak nia tulun no Maromak nia misericórdia. Tanba nee mak Jesus considera katakl ema hanesan nee la precisa duni Maromak nia misericórdia. Ninia hahalok rasik hatudu katak nia la precisa Maromak nia envolvimento/campur tangan ba nia moris. Hahalok hanesan ema fariseu nee baibain, sempre lakon consideração ba ema seluk. Iha ai-knanoik, wainhira nia reza, nia compara nian ho ema publicano.

Ema hirak ho lalaok hanesan nee, laos mosu deit iha Jesus nia tempo, oras nee mos iha ita nia sociedade, ita bele haré hetan ema fariseu modernu sira ho gesto oioin deit. dalaruma ita ida lee dadaun reflexão nee mos keta ida hotu karik?

Consciente ka lae, ema fariseu sira isin kulit mahar (kebal) no sira la consegue ona eh la iha capacidade hodi hanoin kona ba Maromak nebe laran luak (misericordioso). Lalaok haraik-an no hakribi salan, sira considera hanesan hamoe-an deit. Tanba nee mak sira sente-an los liu ema seluk. Exemplo concreto hatudu iha ai-knanoik kona ba fariseu ho publicano nebe ba halo oração iha templo, nudar Evangelho semana nee haktuir.

Afinal, arrependimento (pertobatan) los liu hodi loke laran ba Maromak nia misericórdia, iha possibilidade liu wainhira ema sente-an kiik no sente-an la vale iha Maromak nia futar oin nudar oan ida (Lc 18,16), ou hanesan atan nebe folin laek (Lc 17,10), hanesan ema nebe iha tusan ba Maromak (Mt 16,12).

Se ita consciente no arrepende duni ho ita nia-an nudar ema sala nain, então Jesus nia lia fuan be dehan: ”… basa ema hotu nebé foti-an, Na’i Maromak sei hatun nia ! Ema hotu nebé haraik-an Na’i Maromak sei foti nia (Lc 18,14)”//“Barangsiapa meninggikan diri akan direndahkan, dan barangsiapa merendahkan diri akan ditinggikan” (Luk 18:14); lia fuan nee sei sai hanesan murak mean nebe facilita ita hodi halo arrependimento eh baku hirus matan hanesan ema publicano nebe hasae oração ba Maromak.

Sentido arrependimento no haraik-an nebe Jesus haktuir iha ai-knanoik Evangelho Domingo nee, ita bele mos compara ho ai-knanoik seluk kona ba feto sala nain nebe ho haraik-an husu Maromak sadia nia.

Iha momento convívio/han hamutuk, nia mai hamoos Jesus nia ain ho nia mate wen rasik, hafoin hamoos ho nia fuk, tuir mai rein Jesus nia ain hafoin kose mos ho mina morin folin karun.

Haré lalaok feto sala nain nee, Jesus hatete kedas ba feto nee katak; nia salan sira hetan ona perdão. Arrependimento lolos, motiva ema maksalak sira hatene oinsa Maromak laran luak no hadomi tebes sira. Jesus nia kna’ar nudar maksoyn mak; lori ema hotu, liliu ema hirak be halo sala, hodi fila fali ba Maromak.

Tanba missão hirak nee mak; Jesus halo-an sai belun diak ba ema maksalak sira hanesan feto nee no mos ema publicano eh cobrador imposto nee. Jesus laran ksolok tan sira hakribi duni sira salan. Jesus nia ksolok mak Aman Maromak nia ksolok mos. Jesus mos sei haksolok liu tan wanhira haré ita nudar Cristão Católico iha Timor, hatene-an hodi hakribi mos sala eh baku hirus matan ba salan sira. ema nia arrependimento fo tada katak; buat nebe lakon hetan fali ona. Los duni, misericórdia eh domin mak sinal arrependimento nebe los liu entre ema ho Maromak. Maromak perdua ema tanba misericórdia no ema hakribi salan hodi fila ba Maromak tanba sente kuran Maromak nia domin. Assim seja e Bem Haja. (ignaslopes77750416).

 

Leave a Reply

Your email address will not be published. Required fields are marked *