shadow
Diocese de Dili > NOTÍCIAS > LETURA DIÁRIA > Sexta – Feira, XXIX Semana do Tempo Comum (Ano C)

Sexta – Feira, XXIX Semana do Tempo Comum (Ano C)

Primeira Leitura                    Rom. 7. 18-25a

Lia housi São Paulo nia Surat ba sarani sira iha Roma:

Maun alin sira: Ha’u hatene katak, di’ak la hôrik iha ha’u, katak, iha ha’u nia isin. Laran atu halo iha duni; maibé hahalok di’ak, lae. Basá ha’u la halo hahalok di’ak nebé ha’u hakarak halo, maibé hahalok áat nebé ha’u lakohi. Ha’u halo karik buat nebé ha’u lakohi, la’os tan ha’u mak halo nia, maibé sala nebé hôrik iha ha’u.

Ne’e duni, ha’u haré katak wainhira ha’u hakarak halo buat nebé lós, buat áat mosu. Basá iha ha’u nia laran, ha’u haksolok iha Maromak nia ukunfuan, maibé ha’u haré iha ha’u nia liman ain buat seluk tan nebé halo funu hasouru ukunfuan iha ha’u nia laran, hodi kesi ha’u metin ba ukunfuan sala nian nebé hôrik iha ha’u nia liman ain.

Ha’u, ema derak duni! Sé mak sei hasai ha’u housi ha’u nia isin nebé sei mate ne’e? Obrigado ba Maromak, housi Jesus Cristo, ita Na’i.

Maromak Futar Lia.

 

Salmo Responsorial                                                                      Sal. 118(119). 66, 68, 76, 77, 93, 94 (R. cf. 68b)

Refrão : Na’i, hanourin ha’u dalan Ita lei nian!!! Repete-se

Na’i, haraik matenek mai ha’u,

Basá, ha’u laran metin iha Ita liafuan.

Ita, laran luak no laran di’ak,

Hanourin ha’u Ita lei. Refrão

 

Na’i, Ita laran di’ak sei fó ksolok mai ha’u,

Tuir lia menon nebé Ita halo tiha ona ba Ita atan.

Na’i haraik mai ha’u, Ita laran luak atu ha’u bele moris,

Basá, Ita lei mak ha’u nia ksolok boot. Refrão

 

Na’i, ha’u sei la haluha Ita ukunfuan,

Basá, sira mak ha’u nia moris.

Na’i ha’u Ita Nian, soi ha’u ba,

Basá, ha’u halo tuir Ita ukunfuan! Refrão

 

Aclamação                                                                                                                                                            cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian, tan

Ita hatudu mistério reino lalehan nian ba kiik sira. Refrão

 

Evangelho                                                                                                                                                            Lc. 12. 54-59

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus dehan tan ba ema lubun boot: “Wainhira imi haré kalohan ida iha loromonu, imi dehan katak udan sei tau, no mosu duni nune’e. Wainhira anin huu housi tasimane, imi dehan katak loron sei manas, no mosu duni nune’e. Imi ema laran makerek sira! Imi hatene si’ik buat nebé mosu iha lalehan no iha rai, nusa mak imi la hatene si’ik otas ne’e?  Tan sá imi rasik la haré buat nebé lós? Ne’e duni, wainhira  ó ba tribunal hamutuk ho ó nia funu baluk, buka hadame malu ho nia iha dalan; keta halo be nia lori ó ba juiz, hafoin juiz saran ó ba guarda, no guarda hatama o iha dadur laran. Ha’u dehan ba o katak ó sei la sai housi nebá to’o ó selu hotu”.

Lia Maksoyn.

Leave a Reply

Your email address will not be published. Required fields are marked *