shadow
Diocese de Dili > NOTÍCIAS > LETURA DIÁRIA > Terça – Feira, XXX Semana do Tempo Comum (Ano C)

Terça – Feira, XXX Semana do Tempo Comum (Ano C)

Primeira Leitura                 Rom. 8. 18-25

Lia housi São Paulo nia Surat ba sarani sira iha Roma:

Maun alin sira: Ha’u haré terus ohin ne’e nian nu’udar kiik liu wainhira tau hamutuk ho glória nebé atu sei hatudu mai ita. Basá mundo tomak hein man’manas tempo wainhira sei hatudu Maromak nia oan sira, basá mundo tomak sai tiha folin laek, la’os tan nia rasik hakarak, maibé tanba Ida nebé halo nia sai nune’e nia hakarak iha esperança; basá mundo ne’e sei sai housi moris atan nian nebé sei dodok, hodi halo parte, nu’udar Maromak nia oan, iha ema nebé la’os atan, nia kmanek. Ita hatene katak ohin ne’e mós mundo tomak hakilar tanis hanesan feto nebé atu tur ahi; no la’os mundo de’it; maibé ita mós tanis hakilar iha ita nia laran wainhira ita, nebé iha ona espírito nia fuan uluk nian, hein daudaun tempo nebé Maromak sei hakiak ita, katak tempo nebé ita nia isin sei sai la’os atan ona. Basá iha esperança mak ita hetan maksoyn. Esperança nebé haré ho matan rasik la’os esperança. Sé mak iha esperança ba buat nebé nia haré ona? Maibé ita iha esperança kona ba buat nebé ita ita la haré karik, ita hein ho paciência.

Maromak Futar Lia.

 

Salmo Responsorial                                                                                             Sal. 125(126). 1-2ab, 3, 4-5, 6 (R. 3)

Refrão : Na’i, halo kmanek oi-oin ba Nia povo!!! Repete-se

Wainhira Na’i lori hikas Sião mai,

Moris ba ami hanesan mehi ida.

Ibun ami nakonu ho hamnasa,

Lia ami hawélok hananu. Refrão

 

Ema gentio sira dehan:

“Na’i halo kmanek oi-oin ba sira”.

Lós duni! Kmanek oi-oin Na’i halo ba ita,

Tan ne’e ami haksolok hawélok. Refrão

 

Na’i halo fila mai, ami nia ema dadur sira,

Hanesan wé inan be suli iha rai fuik maran.

Sira be kuda ho mata wen

Sira sei sohi ho ksolok. Refrão

 

Sira ba ho oin tanis daudaun

Hodi lori fini atu kuda,

Sira sei fila hikas mai ho hananu

Hodi lori trigo futun sira. Refrão

 

Aclamação                                                                                                                                                            cf. Mt. 11. 25

Refrão : Aleluia, Aleluia!! Repete-se

Rahun di’ak ba Ita, Aman, Na’i lalehan no rai nian,

tan Ita hatudu mistério reino lalehan nian ba kiik sira. Refrão

 

Evangelho                                                                                                                                                             Lc. 13. 18-21

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus lia tun, dehan: “Maromak nia reino hanesan saída lós, eh Ha’u sei tanesan nia ho saída? Nia hanesan mustarda musan nebé ema ida káer hodi kuda iha nia to’os. Musan ne’e moris hodi sai aihun boot ida, manu sira housi lalehan mai tur iha nia sanak sira.” Nia dehan tan: “Ha’u sei tanesan Maromak nia reino ho sáida lós? Nia hanesan fermento nebé feto ida tau iha farinha sasukat tolu, to’o masa tomak sa’e”.

Lia Maksoyn.

Leave a Reply

Your email address will not be published. Required fields are marked *