shadow
Diocese de Dili > NOTÍCIAS > LETURA DIÁRIA > XXXI Domingo Tempo Comum (ANO C)

XXXI Domingo Tempo Comum (ANO C)

Primeira Leitura              Sab. 11, 22-12, 2

Lia housi Livro Sabedoria:

Na’i, iha Ita futar oin, rai tomak iha dasin leten todan hanesan rai-henek musan oan ida, hanesan mahabén turun oan ida monu iha rai dadersan. Tamba Ita bele buat hotu, Ita hanoin ema tomak, Ita taka matan ba ema sira nia salan, atu sira bele fila sira laran ba di’ak. Basa, Ita hadomi sasan tomak, Ita la hakribit buat hotu nebe Ita rasik haki’ak ona. Ita hakribit karik Criatura ruma, Ita la hanoin liu haki’ak critura ne’e. Ita la hakarak karik, oin sa los buat ida bele iha, buat ida bele hela nafatin? Ita la haki’ak karik buat ruma, oin sa los mak buat ne’e, bele hela metin nafatin? Na’i, Ita la halo aat ba buat ida, basa, Ita hadomi sasan tomak mesa Ita nian de’it, basá, Ita hadomi sasan sira nia moris. Ita nia Espirito rohan laek mak horik iha sasan tomak. Tan ne’e, Ita hanoin ho laran maus liu ema nebe monu; Ita hatudu ba ema sira be monu, sira nia salan, atu sira hadook-an housi aat, atu sira fiar Ita Boot, Na’i.

Maromak Futar Lia. 

 

Salmo Responsorial                                                                                                                   Sal. 144(145), 1-2. 8-9. 10-11. 13cd-14

Refrão : Ha’u sei hahi Ita Boot Nia naran tinan ba tinan, Na’i, ha’u nia Maromak, ha’u nia Liurai!!! Repete-se

 Ha’u hakarak hahi Ita Boot, ha’u nia Maromak, hau nia Liurai;

ha’u hakarak hahi Ita Boot naran tinan ba tinan.

Loron ida ba ida ha’u hahi Ita Boot,

Ita Boot naran ha’u hahi nafatin. Refrão

 

Na’i laran midar, Na’i laran luak,

la hatene hirus, laran luak nafatin.

Na’i di’ak ba ema hotu,

hanoin nia criatura tomak. Refrão

 

Na’i ema sira be agradece Ita;

Ita emar sira hahi Ita.

Sira haklaken fo gloria ba Ita Boot Reino,

hodi tatoli ba malu buat foun Ita halo. Refrão

 

Na’i halo tuir duni Nia futar lia,

buat tomak halo ho laran luak.

Nia tahan ema sira be atu monu;

Nia tulun ema sira be hakru’uk. Refrão

 

Segunda Leitura                                                                                                                                                                     2 Tes. 1, 11-2, 2

Lia housi São Paulo nia surat ba sarani sira iha Tesalónica:

Maun-alin sira: Ami harohan nafatin ba imi atu ita nia Maromak tulun imi tuir lolos imi nia Vocação. Ha’u husu, atu Maromak ho nia kbiit, tulun imi halo tuir hahalok di’ak hirak imi hakotu lia atu halo tuir, no mos serviço nebe imi nia fiar fo hanoin atu halo. Nune’e, Na’i Jesus Cristo nia Naran sei sai boot liu iha ita. Imi fali, Maromak sei hahi iha Jesus Cristo, ita Na’in. Maun-alin sira: kona ba loron ita Na’in Jesus Cristo atu fila hikas mai, kona ba imi nia hakaran moris hamutuk ho Nia nafatin, ami husu ida ne’e ba imi: keta laran kman resin atu fiar naran-naran; laran keta taridu tan lia foun ruma ema hateten katak mai housi Profeta sira; laran keta susar tan ema hateten katak ami mak tatolia lia-fuan ruma ka surat ruma hodi hateten katak Na’i nia loron atu to’o daudaun ona.

Maromak Futar Lia.

 

Aclamação                                                                                                                                                                                           Lc. 19, 10

Refrão : Aleluia, Aleluia!! Repete-se

Mane Maksoin mai buka hodi

salva buat be lakon. Refrão

 

Evangelho                                                                                                                                                                                        Lc. 19, 1-10

Na’i Jesus Cristo nia Evangelho nu’udar São Lucas haktuir:

Iha tempo nebà, tama iha Jericó, Jesus la’o tesik iha cidade laran. Iha nebà, moris ema riku boot ida, naran Zaqueu. Zaqueu ne’e, ema publicano sira nia ulun. Zaqueu buka namanas atu haré  Jesus , maibe, nia la bele hare, tan nia ain badak. Zaqueu halai uluk, ba sa’e ai ida, atu bele hare Jesus, basa, Jesus atu liu housi neba. To’o tiha fatin ne’e,  Jesus foti matan hodi dehan:  “Zaqueu, tun mai lalais, basá, ohin Ha’u sei hela iha ó nia uman”.  Zaqueu tun kedas ho laran ksolok boot, simu Jesus iha nia uman. Hare tiha ne’e, ema hotu hamu’u Jesus, hodi dehan katak Nia tama iha uma ema maksalak ida nian.  Zaqueu hamriik, dehan ba Jesus:  “Na’i, ha’u sei fo ha’u nia riku-soin balu ba ema ki’ak sira, ha’u halo aat karik ema ruma nia sasan, ha’u sei selu fali, liu dala haat”.  Jesus dehan ba nia:  “Ohin, salvasaun tama iha uma ida ne’e, basá, ema ida ne’e mos Abraão nia oan. Basá, Mane Maksoin mai buka, mai soi, ema sira be la’o lakon dalan.”

Lia Maskoyn.

Leave a Reply

Your email address will not be published. Required fields are marked *