shadow
Diocese de Dili > NOTÍCIAS > LETURA DIÁRIA > XXXII Domingo Tempo Comum (ANO C)

XXXII Domingo Tempo Comum (ANO C)

Primeira Leitura        2 Macb. 7, 1-7. 9-14

Lia housi livro Macabeu sira nian:

Iha loron hirak neba, ema ba futu maun-alin na’in hitu ho sira nia inan. Liurai Síria ho óe hakarak sira han hodi biit na’an fahi, nebe lei judeu bandu han. Sira ida, hodi sira seluk fatin, dehan ba liurai: “Ó hakarak husu sa ida mai ami? Ó hakarak hatene sa los housi ami? Ami bele mate, maibe, husik ami hein sira nia lisan, ne’e mak lae”. Molok íis atu kotu, alin ida be tuir, hateten: “Ó be laran aat, hakarak hasai ami nia moris housi rai ne’e; maibe, Liurai sasan tomak nian sei halo ami moris hias duni, ba moris ida rohan laek ami sira be mate, tan Nia Ukun-fuan.” Tuir alin ida ne’e, ema aat sira fo terus fali ida seluk. Ema aat sira atu fokit daudaun nia nanal, labarik ne’e rasik lolo nia nanal, hodi see mos nia liman rua ho aten brani teb-tebes. Hafoin, nia dehan ho laran metin: “Ha’u nia nanal ho liman ha’u simu housi Lalehan: Tan de’it Maromak nia Ukun-fuan ha’u la hanoin tan sira. Ha’u ho laran metin katak ha’u sei simu fali sira iha lalehan”. Liurai ho nia emar sira hakfodak teb-tebes tan hare labarik ne’e brani oin sa!  Nia la ta’uk terus. Fo terus tiha nia, ema aat sira haterus tan alin ida, hanesan ida uluk ne’e. Ida ne’e molok atu mate, dehan: “Di’ak liu mate iha ema sira liman, hodi fiar metin katak Maromak sei halo ita moris hias ba moris rohan laek.” 

Maromak Futar Lia. 

 

Salmo Responsorial                                                                                                                                           Sal. 16(17), 1. 5-6. 8b.  15

Refrão : Na’i, ha’u laran haksolok, wainhira mosu Ita Boot gloria!!! Repete-se

Na’i, simu ha’u susar,

rona ha’u lian!

Rona ha’u hamulak,

ha’u ibun la bosok. Refrão

 

Ha’u hakat la sala, ha’u ain-tur Ita Boot dalan.

Maromak, ha’u bolu Ita,

Ita sei rona ha’u.

Na’i, rona ha’u lian! Refrão

 

Na’i, simu ho laran luak

ema sira be halai housi funu balu, hodi buka Ita.

Ha’u helik-an iha Ita Boot mahan.

Ha’u sei fihir Ita, ha’u sei fila ho ksolok housi Ita futar oin. Refrão

 

Segunda Leitura                                                                                                                                                        2 Tes. 2, 15(16) – 3, 5

Lia housi São Paulo nia surat ba sarani sira iha Tesalónica:

Maun-alin sira: Ita Na’in Jesus Cristo, hamutuk ho Maromak, ita Aman, nebe hadomi ita, halo ita laran metin hodi hein ksolok rohan laek, sei haraik kmaan ba imi laran; sei fo kbiit ba imi lia-fuan no imi hahalok. Maun-alin sira: imi harohan mos mai ami, atu Na’i futar lia to’o da’et lalais ba fatin tomak no simu gloria, hanesan oras ne’e daudaun iha imi leet. Imi harohan, atu ema aat sira keta halo aat ita, basá, ema balun de’it mak iha fiar. Maibe, Na’i laran di’ak: Nia sei fo kbiit ba imi, Nia sei tahan imi hasouru buat aat. Simu kbiit housi Na’i, ami laran metin iha imi: Imi halo daudaun, imi sei halo nafatin buat ami hanourin. Na’i sei leno imi laran atu hadomi Maromak, hodi hein ho laran metin, Cristo.

Maromak Futar Lia.

 

Aclamação                                                                                                                                                                                          2 Tes. 3, 5

Refrão : Aleluia, Aleluia!! Repete-se

Na’i leno imi laran atu hadomi Maromak

hodi hein ho laran metin, Cristo. Refrão

 

Evangelho                                                                                                                                                                                    Lc. 20, 27-38

Na’i Jesus Cristo nia Evangelho nu’udar São Lucas haktuir:

Iha tempo neba, ema saduceu balun sira nebe hateten katak la iha Ressureição ba hasouru Jesus, hodi husu ida ne’e ba Nia: “Mestre, Moisés hakerek hela lia ida ne’e mai ami: Ema ruma mate karik, husik hela feen, oan la iha, nia alin bele kaben ho feto faluk ne’e, atu bele fo oan ba nia maun.  Maibe, iha kedas alin-maun na’in hitu. Ida uluk hola duni feto, maibe, mate tiha, la husik oan ida. Alin ida be tuir nia, hola fali feto faluk ne’e. Tuir nia, alin ida seluk mos hola feto faluk ne’e. Maun-alin na’in hitu sira ne’e mate hotu, la husik oan ida. Ikus liu, feto faluk mos mate. Ne’e duni, iha loron ressureição, feto ne’e,  se nia feen los?  Basá, sira na’in hitu mak hola nia”.  Jesus lia tun ba sira: “Ema sira iha mundo rai-klaran hola malu nu’udar la’en feen. Feto sira, aman-inan fo kaben. Maibe, ema be soin duni atu tama duni iha mundo seluk, hodi hetan moris hias, ema sira ne’e la kaben ona, ema sei la hafolin tan sira. Tebes, sira ne’e sei la mate tan ona, basá, sira sai hanesan Anjo sira. Tan sira hetan ressureição, sira ne’e Maromak nia oan lolos. Kona fali ba lia dehan katak mate sira sei moris hias, Moisés rasik hatudu katak ne’e lia los iha loron nia hare ai-klobor sarsa lakan la mate. Moisés bolu Na’i:  ‘Abraão nia Maromak, Isaac nia Maromak, Jacob nia Maromak’.  Ne’e la hateten kona ba Maromak mate-bian sira nian, maibe, kona ba Maromak ema moris sira nian, basá, ba Maromak, ema hotu moris hela.

Lia Maskoyn.

Leave a Reply

Your email address will not be published. Required fields are marked *