shadow
Diocese de Dili > NOTÍCIAS > REFLEXÃO > SARANI DÚVIDA MORIS HIAS?………FIAR & HAHALOK FO RESPOSTA

SARANI DÚVIDA MORIS HIAS?………FIAR & HAHALOK FO RESPOSTA

Reflexão ba Domingo Comum XXXII, Ano C

 

Ema balu dehan moris nee dala ida deit. Tanba nee goza kedas, mate tiha hotu ona. Nee expressão pessimista ida nebe oras nee sai veneno ba moris sarani nian. Tanba ema hanoin katak expressão nee tebes, então nia buka aproveita qualquer lalaok nebé nia hasoru. Hirak nebé naok, aproveita sai naokten, hirak nebé gosta selingkuh aproveita pratica adultério (selingkuh), hirak nebe desesperado continua hadook-an husi Maromak, hirak nebe ambissão ba poder, continua propaganda hodi atinge poder, hirak nebe oportunista continua sai paracita iha instituição estado. Hirak nebe sai membro artemarcial gosta buka problema ho grupo seluk. Partido ida defama partido seluk, ema lakon respeito ba figura principal estado tanba motivo ou interece la hanesan.

Conteudo principal husi mensagem Evangelho nian nebe São Lucas tatoli ba ita iha Domingo semana nee nudar doutrina principal Jesus nian iha Ninia missão salvadora, liliu kona ba moris hias (Ressurreição).

Jesus enfrenta directamente ema saduceu sira (Saduceu=justo/los), nudar grupo aristocrato judeu nian, nebe sira nia corrente política la hanesan ho grupo fariseu sira. Ema saduceu sira koko atu hamonu Jesus nia popularidade ho pergunta kona ba estatuto casal/kaben nain feto ida ho mane maun alin nain 7 maibé, sira hotu la rai oan eh geração.

Se existe moris foun, tan existe duni ressurreição (moris hias), feto faluk nee sei sai se nia fen kaben lolos? Leitura no reflexão sira ba Domingo semana nee, liu husi Eucaristia sei fo mai ita oinsa imagem eh sentido ressurreição lolos nebe Jesus hanorin.

Grupo saduceu considerado nudar conservativo basá, sira so considera deit livro 5 nebe tama iha livros pentateuco. Saduceu sira la fiar moris hias nudar Jesus hanorin. Tuir lei casamento levita sira nian (Lv 25, 5-6; Rute 3,9-4,12) descreve katak; alin ida bele hahoris oan hodi nia maun nia fatin, se maun nee mate tiha ona la hahoris oan; atu nunee, família nia naran no riku soin sira la bele monu ba ema seluk nia liman(domínio).

Jesus hatan ba ema saduceu sira dehan:”ema sira iha mundo rai-klaran hola malu nudar laen-fe’en. Feto sira, aman-inan fo kaben. Maibé, ema be soyn duni atu tama duni iha mundo seluk, hodi hetan moris hias, ema sira nee la kaben ona, basá, sira sai hanesan anjo sira. Tan hetan ressurreição, sira nee Maromak nia oan lolos (Lc 20, 35-36)”.

Tanba saida mak Jesus hatan nunee?

Ita nobun fiar duni katak; Maromak cria ona mundo ho ema sira (ser humano) nudar povo be horik iha mundo rai klaran. Maromak cria feto no mane. Tansa? Feto no mane atu geração iha rai nee continua iha ba bebeik, no labele extingido eh lakon mohu nunee deit; tanto ema nee rasik, tanto mundo rai klaran. Nunee mos mundo nudar horik fatin ema moris nian, tan nee precisa hadia no conserva ba bebeik. Ita nobun nebe nudar Maromak nia criatura be hetan fomin wain, sei horik ba bebeik husi geração ba geração atu hahi adora nafatin Maromak.

Nee mak razão principal Maromak cria ema feto no mane iha mundo rai klaran hodi moris ba nafatin iha sacramento Matrimónio. Além de nee, iha mundo nee, iha mos ema lobuk ida tanto feto, tanto mane, ho vontade rasik, decide hodi la fora família ou la hola malu, hodi saran sira nia moris ba vocação especial husi Maromak. Exemplo mak hanesan nai lulik sira ou religioso no religiosa sira nebe prefere moris celibato (la forma família).

Celibatário sira nia motivação hakarak moris mesak mak saida?

Celibatário sira nia motivação, opção no decisão pessoal basea ba sira nia convicção rasik eh sira nia vocação. Sira nia decisão basea ba fiar nebe hatete katak ressurreição sei halo ema hotu moris rohan laek iha lalehan; iha Maromak futar oin. 

Tanba moris iha lalehan ho característica rohan laek, então, moris iha mundo rai klaran nee relativo deit. Nunee, moris celibato eh moris hola malu, oan iha eh lae, riku eh kiak, sasan sira mundo nian la permanente. Nee significa katak; mundo nebe ita horik ba dadaun, certamente importante tanba Maromak fo oportunidade ba ema hotu hodi esforço-an ba moris hanesan ema lolos nebe Maromak cria tuir Nia imagem hodi prepara-an ba moris rohan laek nian.

Ho variedade moris iha rai nee, ita nobun hetan oportunidade hodi prepara-an ba moris iha mundo aban bain rua nian, nebe ita hetan liu husi mate no moris hias ba moris lalehan nian.

Questão ressurreição  nebe ema saduceu sira levanta, fo lição saida mai ita? Dalaruma ita sente avançado ona, ita sente makas ona hodi domina mundo nee?

Ho reflexão Evangelho Domingo semana nee, espera katak ita loke ona neon ba sentido lolos husi ressurreição nebe Jesus rasik hanorin ona mai ita. Maske horas nee ita mesak intelectual, mesak técnico, mesak filósofo, moris iha mundo racional, maibé, lalaok hirak nee precisa ita coloca mos hanoin ida katak; ita precisa consciente no prudente ba moris nee hodi simu roman fiar nian nunee, ita bele cumpri Maromak nia vontade iha moris nee.

Nudar sarani Católico, ita precisa distingue (membedakan) saida mak importante ba moris iha rai no iha lalehan. Precisa considera nebe mak valor liu no nebe mak lae iha moris sarani nian. Hanoin ba katak ita moris ho tempo nebe limitado atu ita hatene utiliza tempo oitoan nebe efectivamente atu ita merece iha Maromak nia uma rohan laek nian iha loron ressurreição. Amen. Assim seja e Bem Haja (ignaslopes)

Leave a Reply

Your email address will not be published. Required fields are marked *