shadow
Diocese de Dili > NOTÍCIAS > Avisos > CARTA PASTORAL ADVENTO NIAN

CARTA PASTORAL ADVENTO NIAN

 

DIOCESE DE DILI

SECRETARIADO – CÁMARA ECLESIÁSTICA


 

Ba Padre, Religiosa sira

no Sarani tomak Arquidiocese Metropolitana Dili

 

ADVENTO : TEMPO ESPERANÇA NIAN

“Povo be lao iha nakukun laran, hare tiha ona naroman boot ida” (Is. 9,1)

 

  1. Sentido Advento ba ita sarani no ita nia realidade

       Ita tama dadaun ona ba Advento. Tempo ida especial teb-tebes ba ita ema sarani tomak iha mundo rai-klaran no liu-liu ba ita nia Arquidiocese Dili. Nune’e, wainhira ita koalia kona ba Advento, nia sentido mak tempo mak tempo esperança nian, basá ita hahu ho Tinan Liturgia foun ida (Tinan Liturgia C hotu ona no ita tama iha Tinan Liturgia A), no iha tempo ne’e ita prepara an atu bele hasouru Na’i Jesus nebé mai tiha ona, oras ne’e iha ita le’et no sei mai iha loron ikus.

       Ne’e katak, Advento lori ita atu hanoin hikas Jesus Cristo nebé mai dala uluk iha rai ne’e hodi halo an ba Ema. Ne’e duni, mai ita prepara an didi’ak atu celebra Jesus nia moris iha loron Natal. Maibé, Advento mós lori ita atu bele prepara ita an hodi simu Jesus nebé  sei mai fali, daruak, iha tempo ikus, wainhira mundo ne’e remata, hahu iha ita ida-idak nia mundo, katak ita nia mate.

       Ita precisa prepra ita nia an nafatin hodi hein Na’i nebé teki-teki bele to’o, basá wainhira Nia fila ba Aman Maromak , Nia promete tiha ona katak sei mai fali, maske nia la fó sai sa loron no sa oras, maibé Nia sei fila mai. Promesa ne’e fó esperança mai ita nu’udar fiar nain, atu prepara an hodi hadia ita an nafatin.

       Leitura sira iha tempo Advento ne’e tulun ita atu prepara ita an di’ak liu hodi hein, loron Na’i Jesus mai. Advento tempo kmanek ida nebé lori ita atu neon nain nafatin, halo orasaun no hein hela Jesus nia mai daruak.

       Tinan ida ne’e, tinan graça Maromak nian, tamba Uma Kreda universal celebra Tinan Jubileu Extraordinário Missionário nian. Kreda Timor hanoin fali tinan 30, São João Paulo II, mai iha ita rai doben hodi haree rasik ho matan ita nia ksolok no ita nia susar. Ita agradece Sua Santidade Papa Francisco nebé mak hasae tiha Diocese Dili nebé completa tinan hitunulu resinwalu nu’udar Diocese ba Arquidiocese. Keta haluha katak povu Timor mós celebra 20 anos refrendum, nebé iha tempo nebá, ita hotu haksolok no kahur ho ta’uk ba “urna” hodi fihir ita nia destino.

       Ami hanoin katak, iha tempo Advento ne’e, ita nu’udar povo sarani, ita hateke fali ba kotuk kona ba ita nia história, hatudu katak, ita sira ne’e ema fiar nain nebé iha esperança, ne’e duni mak ita nia mehi ne’e sai realidade ida hodi alcança ita nia ukun an. Oras ne’e ita hari hela ita nia nação no ita hasouru desafio oi-oin, maibé ita precisa iha esperança nafatin ba mudança integral iha ita railaran, basá iha tempo ukun rasik an ne’e, ita hare katak ho ita nia serbisu hamutuk, tuir ida-idak nia kna’ar, ita rai lao daudaun ba oin, maski nei-neik, basá hanesan ema dehan: “a natureza não dá saltos” (natureza la haksoit). Maski nune’e, ita precisa hare hamutuk problema balun nebé bolu ita hotu nia atenção no ita hotu iha comprimisso atu hadia no lori ba oin ita rai no ita povo doben ne’e;

       Uluk liu, problema social: mósu nafatin violência (entre grupo oi-oin) iha ita railaran nebé halo ita tauk, ne’e duni lori ita moris la hakmatek no halo liur tauk mai investe iha ita rai. Rua, kona ba “incerteza política”, tanba seidauk iha solução ba impasse política, nune’e hamósu hanoin oi-oin, ida mak kona ba “eleição antecipada”. Eleição antecipada ne’e nu’udar dalan di’ak liu atu resolve problema incerteza política ka halo ita hotu lakon tempo, gasta de’it osan no buat seluk-seluk tan? Ida nune’e, nia consequência bele halo ita la lao ba oin. Tolu, problema desemprego/foinsa’e sira la hetan serbisu, nune’e lori sira la hetan ksolok no lalais liu monu ba manobra sira no sira halo violência. Tinan-tinan população cidade Dili, nu’udar capital sae ba bei-beik, basá povo sira iha área rural sira susar atu hetan osan no facelidade sira seluk. Ha’at, ita nia educação sei la’o nei-neik liu iha aspeito oi-oin, hanesan: qualidade di’ak, nebé iha relação ho professor sira, infra-estrutura, curriculo, lian, cooperação inan aman no estudante sira. Lima, ema sunu du’ut arbiru de’it, nebé nia impacto halo família barak mak lakon uma, sasan uma laran no ai-horis nebé fo moris ba sira. Ne’en, religião foun no seita sira nebé tama iha ita rai no ita nia Arquidiocese, dala barak liu hamósu conflito ba aderente sira no balun fali nebé lohi ema hodi halo milagre, nu’udar dalan atu dada ema hodi tama ba sira nia religião ou seita.

 

  1. Rona, dialoga, discerne conversão ba missão

       Rona no hare sinal sira tempo nian, no naroman  fiar nian, nebé ita hasouro iha ita nia sociedade hanesan temi iha leten, nu’udar ema sarani Católica espontanamente mósu iha ita laran hakarak koalia (diálogo) hodi halo pergunta: “tanba sá mak situação hirak hanesan ne’e mósu?” Pergunta ida ne’e provoca fali pergunta seluk: “Será que situação ida hanesan ne’e mak ita ida-idak, nu’udar individuo eh ita hamutuk  nu’udar povo ida, hakarak wainhira harii nação doben RDTL? Ami hanoin la’e karik, ita hotu hakarak atu ita nia nação ne’e moris iha hakmatek, iha ksolok no povo hotu housi labarik to’o katuas-ferik hakarak goza ukun an nebé proclama tinan ha’atnulu-resin ha’at liu ba. Iha hasouru situação hirak temi iha leten ne’e, ita hotu mehi atu bele moris ida nebé di’ak, hakmatek, ksolok.

       Arquidiocese houri uluk to’o ohin loron, nia visão mak consolida sarani nia fiar liu housi formação integral, liu-liu kona ba fiar. Iha mós maluk sarani Católica sira balun hamrook ba Maromak hodi buka dalan oi-oin atu haklaken sira fiar hodi envolve an iha grupo no movimento sira.

       Kreda, iha tempo Advento, convida ita ba hare, rona no aprende oin sá uluk povo Israel sira halo wainhira sira hasouru situação sira hanesan ne’e. Nune’e ita hare iha livro Profeta Isaias nian hato’o ba ita kona ba Maromak rasik sei hatun laletek sira hotu, taka tiha rai klean hotu, halo rai-fuik maran sai matak no buras ho ai-horis no Nia sei tau balada fuik leão no bibi-malae oan moris hamutuk iha hakmatek laran. No Maromak  nebé sei mai ne’e sei halo ema hakfodak no sei protege ema kiak sira no halakon nakukun sira (cf. Is. 9, 1-6; 40, 7-8). No Maromak hili fatin nia revelação no atuação salvação mak mundo, mak história ema nian. maibé ba ida ne’e, exige housi ema, atu se tilun hodi rona.

       Iha tempo ohin loron nebé mundo tecnológia desenvolvido, inclui meios de comunicação, ema la dun fo atenção ba sentido de audição. “Rona” lolós no di’ak buat nebé essencial ba nia moris. Ema rona buat hotu-hotu no rona buat barak, maibé haluha buka rona buat nebé mak lós no essencial ba nia moris. Nu’udar ema sarani tuir perspetiva Católica nian  Rona nebé di’ak no klean lori ema ba to’o iha diálogo ida di’ak no produtivo. No diálogo ida di’ak no produtivo tulun ema discerne hamutuk hodi hare kona ba sinais dos tempos nebé ema hasouru daudaun. No housi ida ne’e ema bele nakfila an (conversão) hodi hala’o nia missão di’ak no lolós. Papa Francisco dehan: “O verdadeiro diálogo derruba muros” (Diálogo nebé lós nian harahun muro nebé hafahe ema).

       Ema Judeu sira wainhira ba hare no rona João Baptista koalia kona ba conversão, mósu iha sira laran hodi halo diálogo: “Ami sei halo sá lós?” Hafoin João Baptista hato’o fali resposta ba sira hodi buka converte an hodi halo buat nebé di’ak ba maun alin sira, tanba nune’e Reino Maromak nian nebé sei mai sira pronto ona atu simu (cf. Lc. 2, 11-8). Ema Judeu sira ne’e, rona didi’ak duni no hamósu iha sira laran pergunta hodi lori sira ba diálogo no housi diálogo bele descobre sira nia kbiit no fraqueza nune’e lori sira ba conversão.

       Iha iha tempo Advento buka rona barak tanba Maromak tau iha ita an tilun tahan rua no ibun ida. Tilun tahan 2 ne’e ho finalidade atu rona barak no ibun ida atu ko’alia uit-oan. Ita hanesan ne’e atu liafuan sira nebé ita rona tama ba ita nia fuan hodi bele reflete no halo discernimento atu bele hatene liu tan sá mak Maromak hakarak ita atu halo iha ita nia moris iha tempo Advento ida ne’e.

       Conclusão

       Advento ne’e tempo matan moris no neon nain, hodi prepara ita an celebra Jesus Nia moris iha loron natal, no hodi hein Jesus nebé sei mai ba daruak. Ne’e duni, ita la hein nar-naran de’it, maibé ita hein ho esperança tanba Nia sei mai duni tuir Maromak Nia promesa. Nune’e precisa prepara an hodi haburas ita nia relação ho Maromak, ita nia an, ita nia maluk sira no ho natureza.

       Ne’e duni, ita mós husu ba ita nia an, hanesan uluk Judeu sira husu ba São João Baptista; “Ami sei halo sá lós”) ida ne’e nakloke ba ita ida-idak hatan tuir ita nia kna’ar.

       Ho harohan daet Inan doben Imaculada Conceição, mahein Arquidiocese Dili nian, hamahan no tulun sarani hotu bele aproveita didiak momento ne’e ba renovação esprítual.

 

 

 

  Dili, 01 de Dezembro de 2019

Leave a Reply

Your email address will not be published. Required fields are marked *