shadow
Diocese de Dili > NOTÍCIAS > LETURA DIÁRIA > Festa Baptismo do Senhor

Festa Baptismo do Senhor

Primeira Leitura                  Is 42, 1-4, 6-7

Lia husi Livro profeta Isaías:

Hau nia atan mak nee, atan nebé Hau tahan, Hau fihir, Hau hadomi. Hau tau laran ba nia, atu nia bele tesi lia-los ba povo tomak. Nia sei la hakilar, la foti lian resin; Nia lian sei la rona iha  luron. Fafulu nakfera ona, nia sei la kona; ahi-oan kibu-kibu, nia sei la hu mate. Nia sei haklaken lolós justiça, nia sei brani nafatin, sei aten-boot bei-beik, too ema hotu iha rai klaran hetan justiça, basá, ema sira iha tasi balu mós titu nia doutrina. Hau, o nia Nain mak bolu o atu tuir justiça; Hau lolo Hau liman bao, fo matenek ba o, fo matenek ba o, atu o bele halibur no fo naroman ba ema tomak. Hau fihir o, atu halo matan delek sira bele haré, atu hasai dadur sira husi cadeia no fo naroman ba sira be moris iha nakukun.

Maromak Futar Lia.

 

Salmo Responsorial                                                                                                                          Sal. 28(29) 1a, 2; 3ac-4; 3b. 9b-10

Refrão : Nai haraik bensa ba nia povo iha dame!!! Repete-se

Maromak oan sira, hahí imi Nai,

Hawelok nia naran;

Hanai Nia iha kadunan laran. Refrão

 

Nai lian rona husi leten aas ba,

Nai lian makas liu laloran;

Nai lian bele buat hotu,

Nai lian kmanek liu tomak! Refrão

 

Maromak kbiit wain, lian makas liu rai tarutu;

Lian nee tarutu, namolik alas-alas!

Nai hatur nia kadunan iha we-leten:

Nia mak liurai tinan ba tinan. Refrão

 

Segunda Leitura                                                                                                                                                                        Act 10, 34-38

Lia husi livro hahalok Apóstolo sira nian:

Iha loron hirak nebá, Pedro hahú koalia, dehan:”Tebes, hau hatene katak Maromak bolu ema hotu, la fihir nia diak eh aat. Iha rai hot-hotu, se hamtauk Nia no moris tuir justiça, nia monu duni ba Maromak nia laran. Nee mak lia tatoli ba Israel oan sira, wainhira hodi Jesus Cristo, ema tomak nia Nain, Nia haklaken Lia Foun diak, lia hakmatek. Liu baptismo nebé João fo, imi hatene ona, buat sa mosu iha Judeia tomak, hahú husi Galileia: katak Maromak haraik Espírito Santo no kbiit ba Jesus Nazaré, nebé lao lem-lemo hodi halo diak no fo kman ba sira nebé terus iha diabo nia liman, basá, Maromak horik ho Nia ”.

Maromak Futar Lia.

 

Aclamação                                                                                                                                                                                     Cfr. Mc. 9, 6

Refrão : Aleluia, Aleluia!! Repete-se

Lalehan nakloke; Aman Maromak lia tun mai:

“Nee Hau Oan doben! Imi rona Nia ba”. Refrão

 

Evangelho                                                                                                                                                                                         Mt 3, 13-17

Nai Jesus Cristo nia Evangelho nu’udar São Mateus haktuir:

Iha tempo nebá, Jesus too husi Galileia mai, buka João Baptista iha Jordão, atu simu Baptismo hus nia. Maibé, João la hatan, hodi dehan nunee: ”Hau hakrak dau-daun O atu sarani hau, O mai buka fali hau?” Jesus hatan, hodi dehan: “Husik lai ba. Diak liu ita buka halo tuir lolos buat hot-hotu”. Ho ida nee, João mos hatan ona. Simu tiha Baptismo, Jesus sai husi we, lalehan nakloke, Jesus har’e Maromak nia Espírito hanesan manu falur ida, tun mai iha Nia leten. Husi lalehan, lia ida dehan nunee: “Ida nee, Hau nia Oan doben: buat tomak Hau hadomi, Hau tau iha Nia”.

Lia Maksoyn.

Leave a Reply

Your email address will not be published. Required fields are marked *