shadow
Diocese de Dili > NOTÍCIAS > REFLEXÃO > Ida nee, Hau nia Oan doben

Ida nee, Hau nia Oan doben

Maromak nia futar Lia Fuan Domingo semana nee nian convida ita nobun nudar Católico hodi reflecte didiak sentido husi sacramento Baptismo nebe ita simu desde infância. Jeus Cristo rasik fo Nia-An atu São João Baptista fo sarani nunee,Nia loke odamatan lalehan ba ema fiar nain hotu.

Domingo semana ida nee, Evangelista São Mateusrelata cronologia oinsa São João Baptista  ho Jesus halo diálogo kona ba se mak merece simu no fo Batismo. Jesus maske Maromak, nia hili dalan haraik-An no expressa sentido solidariedade ho humanidade atu simu we baptismo husi João Baptista.

 

Haktuir katak; iha ai laran fuik ida, lekirauk inan ida tuur iha fatuk boot leten halo meditação besik semana rua ona. Tama ba loron 14, teki-tekil lian ida haksee nia dehan; belun lekirauk, hau acompanha ona o nia meditação durante semana rua nee. Horas nee o bele koalia sai o nia hakarak atu hau halo ba o. Hanoin tuun sae tiha, lekirauk hatan ba lian nee:”hau hakarak ita boot muda hau sai feto bonita ida”. Tuir mai lian nee hatan dehan: então o haksoit luku tama be lehun nee dala 7! Rona tiha ida nee, lekirauk nee haksoit tama kedas ba be laran. Luku tama sai too dala hitu, teki-tekil deit, lekirauk nee nakfilak-an sai tiha feto bonita ida. Feto nee fihir nia oin iha be lehun, hafoin hanoin iha nia laran dehan; “se hau lukutan dala 7 tan pasti hau sei sai bonita liu tan”. Tuir mai, feto nee haksoit tama tan be laran hodi luku dala hitu tan. Luku dala 7 hotu tiha, feto nee nakfila-an fila hikas ba lekirauk. Nia hakfodak hodi luku fali dala 7 maibé, nia la nakfilak-an ona. Nia arrepende maibé, liu tiha ona.

 

Ilustração iha leten, lori ita ba contempla diak liu tan caracter sacramento Baptismo nebe Igreja Católica adopta. Desde Igreja estabele desde tinan rihun rua resin liuba too agora. Nee significa katak ema ida simu Baptismo dala ida deit too mate. Baptismo nee la bele repete (irrepetível). Nee tradição ida nebe Igreja Católica kaer metin too horas nee.  Costume Baptismo nee hakarak loke sarani sira nia hanoin liliu maluk sira nebe sarani ona iha lidun Igreja Católica hafoin, ba sarani tan iha Igreja seluk tanba ema fo osan ho supermi. Ita haree iha ilustração nebe apresenta iha leten; lekirauk nee hetan oportunidade atu luku dala ida deit maibé, tan nia ambição ka nia kaan ten hodi luku fila fila; ikus mai nia lakon oportunidade tomak. Iha nee sacramento Baptismo nebe Igreja Católica hakuak metin too horas nee, baseia nafatin ba caracter irepetível nee. Iha Evangelho Domingo semana nee nian Jesus rasik simu Baptismo dala ida deit molok halao nia misSão durante tinan 3. Evangelho mos la haktuir tan kona ba Jesus simu Baptismo iha fatin seluk.

Wainhira amu lulik ida fui we baptismo mai ita nia ulun, Nai Maromak hasanto no hili ita ida-idak sai nia emar (Membro Kreda Católica). Tan nee mak Maromak halian ba Jesus hodi dehan:”Ida nee, Hau nia Oan doben: buat tomak Hau hadomi, Hau tau iha Nia”. Maromak kuta ita liu husi we no mina santo nebe amu lulik kose. Certamente ita la hatene saida mak acontece iha momento ita simu we baptismo maibé, espiritualmente Maromak hasanto eh consagra ona ita. Uma Kreda Católica coloca sacramento Baptimo nudar odamatan boot ba Sacramento sira seluk.

Afirmação nee hatuur iha argumento ida katak Baptismo nee sai hanesan fundamento ba sacramento sira seluk iha Igreja laran. Ema ida molok sai Uma Kreda nia emar iha obrigação natural simu uluk Sacramento baptismo nee. Sacramento baptismo loke odamatan atu ema hotu hola parte nudar Maromak nia povo. Ema adulto eh Bebe nebe foin moris por natureza sei contamina hela ho pecado original nebe beiala Adão ho Eva comete.  Tanba nee, ema ida tende simu uluk lai Sacramento Baptismo molok simu tan sacramento sira seluk. Sacramento ida nee mos halo ita hetan misSão hodi haklaken Maromak nia Reino ba mundo tomak.

 

Tradição Baptismo rasik mai husi processo naruk ida iha tempo Testamento Tuan nian. Ritual Baptismo mosu ona iha ema Judeu sira nia tradição. Judeu sira nia baptismo orienta liu ba sentido purificação eh hamoos-an. Ao passo que São João Baptista nia batismo fali ikus mai adopta nafatin tradição judaica nee hodi bolu nafatin ema hotu ba sentido hamoos-an nee liliu hodi simu Jesus Cristo nudar maksoin. Too iha tempo Jesus Cristo nian, baptismo Cristão nian nia objectivo mak hamos pecado original no mos incorpora ita nia-an iha moris santo nian.                                                       

 

Jesus por Natureza, la iha pecado original nem pecado actual. Tan nee mak durante tempo naruk, ema barak sempre questiona katak; se Jesus nee Maromak tansa nia tende simu tan Baptismo husi São João Baptista?

Uluk nanain, João Baptista fo Testemunha kona ba Cristo nia Kmanek. Tan nee mak São João Baptista dehan katak nia la soi atu kore Jesus nia sandálias talin. João Baptista mos dehan liu tan katak:”Hau sarani imi ho We maibé, ida nebe tuir hau sei sarani imi ho Espírito Santo”. Afirmação ida nee hakarak loke ita neon kona ba Jesus nia Natureza nudar Maromak Oan.

São João Baptista nia haraik-an nee fo hanorin sarani ohin loron kona ba oinsa coloca lalaok Maromak nian tuir nia fatin no lalaok ema nian tuir nia dalan. Ho ida nee, ita bele hatan ona ema balu nia lamentação katak: se Jesus nee Maromak tansa nia simu fali baptismo husi São João Baptista?Nunee mos loke ita nia conviecção katak Jesus mak Messias laos hanesan doutrina bosok nebé testemunha jeova sira halekar husi uma ba uma katak Jesus laos Messias.

 

Jesus tuir lolos la precisa simu baptismo maibé, Jesus hakarak simu Baptismo husi João Baptista hodi hatudo nia Glória no loke odamatan lalehan nian ba ema hotu nebe fiar iha Nia. Tan nee mak wainhira simu tiha Baptismo Lian ia tun husi Lalehan dehan: ”O Hau oan doben tebes. Hau domin tomak Hau tau iha o”. 

Ho Jesus nia Baptismo, Nia halulik ona we hotu iha rai nee. Husi we lulik nee, ema hotu nebe simu we baptismo nee sei hetan liman rohan hodi sai Maromak oan loloos. Nunee, ema nebe simu ona Baptismo, odamatan lalehan mos nakloke luan ba nia. Odamatan lalehan nee sei taka fali wainhira ema nee rasik mak hakarak taka liu husi comete pecado ou muda fali fiar ba religião seluk. Maibé, Maromak sei fo oportunidade dala ida tan ba ema sira nebe taka rasik odamatan lalehan nee wainhira nia arrepende fali nia sala.

We baptismo nee graça ida; tanba nee mak São gregório de Nazianze hateten dehan: we baptismo nudar graça Maromak nian nebe kmanek liu. Ita hanaran graça, unção/kuta, haroman, roupa moris nian, moris foun, sinal no grça boot liu.

Liu tan São Gregório Nazianze dehan: we Baptismo hanaran we graça tanba; Maromak haraik ba ema nebe la iha buat ida, haraik ba ema nebe sala nain, haraik tan pecado nebe hamoos ona iha we sarani nee. Nudar graça unção tanba Maromak kuta ita ba moris santo nian, hanaran roman tanba fo roman ba ema seluk.

 

São Paulo iha nia carta ba sarani sira iha Roma, fortifica liu tan sentido we baptismo hodi dehan; ema fiar nain nebe simu we baptismo hamutuk ona ho Cristo nia mate no moris hias (Rm 6,34). Ema nebe simu we baptismo, nia hatais nia-an ho Cristo. Liu husi Espírito Santo, we baptismo nudar we nebe hamos, haloos no halulik (Cf 1Cor 6,11). Nunee, ikus liu we baptismo, halo ema cristão Católico ida mate ba pecado maibé, nia hetan moris foun iha Cristo. Tan nia hamutuk ona ho Cristo então, nia sai Maromak oan. São Pedro iha Segunda Leitura Domingo semana nee afirma:” :”Tebes, hau hatene katak Maromak bolu ema hotu, la fihir nia diak eh aat. Iha rai hot-hotu, se hamtauk Nia no moris tuir justiça, nia monu duni ba Maromak nia laran”

 

São João Crisóstomo afirma ninia convicção kona ba Sacramento Baptismo dehan; o pagão conhece o baptismo, mas pensa que é só uma questão de àgua; eu pelo contrário, não fico considerando só o que vejo, mas contemplo a purificação de alma obrado pelo Espírito Santo. O pagão considera o baptismo como simples lavagem do corpo; eu, pelo contrário, acredito que faz a alma pura e santa.

Too ponto ida nee, ita bele reflecte São João Crisóstomo nia resultado contemplação nebe haree sacramento Baptismo nudar processo santificação klamar nian. Processo nee realiza tanba Espírito Santo nia graça. São Pedro rasik justifica Espírito Santo nia graça ida nee hodi dehan;”Liu baptismo nebe João fo, imi hatene ona buat sa mak mosu iha Judeia tomak, hahu husi Galileia; Katak Maromak haraik Espírito Santo no kbiit ba Jesus Nazaré, nebe lao lemo lemo hodi halo diak no fo kmaan ba sira nebe terus iha diabo nia liman, basá, Maromak horik ho nia”. São Pedro nia afirmação nee hakarak justifica fali Evangelho São Marcos nia sasin nebe dehan: ”O Hau oan doben tebes. Hau domin tomak Hau tau iha o”.

 

Ita bele compreende sentido Sacramento Baptismo liu husi São Pedro nia lia-fuan iha Segunda Leitura Domingo nee. Husi São Pedro nia declaração iha Segunda Leitura ita entende no fiar katak; sacrameno Baptismo nee rasik protege ita husi diabo nia babeur.

Iha história Igreja nian, mosu ideia oi-oin kona ba baptismo nebe São João Baptista fo no Baptismo nebe Jesus ho nia apóstolo fo. Iha Uma Kreda Católica nia convicção, São João Baptista nia baptismo nee hanaran Baptismo penitencial basá baptismo nee sinal exterior ida. Hanaran sinal exterior tanba implica ema nia vontade ka laran kmaan hodi muda nia moris.

Ao passo que baptismo nebe horas nee lao iha rito Igreja Católica nian mak Baptismo nebe naturalmente halo ema sai Igreja nia membro lolos. Tanba nee mak iha Evangelho, São João Baptista hateten ba ema barak dehan:” Hau sarani imi hodi we, maibé, Nia sei sarani imi iha Espírito Santo”. Iha ponto ida nee, São João Baptista mos reconhece katak Nai Jesus Cristo mak boot liu nia. Nia (João Baptista) mai loke dalan deit hodi dehan tenik; “Tuir hau, sei too mai ida nebe makas liu hau; hau la soi atu hakruuk hodi kore nia sandálias talin”.

 

Iha costume Igreja Católica nian, bebe nebe foin moris, inan aman iha responsabilidade moral hodi lori ba simu we baptismo.Costume ida nee maske hetan reacção argumentada husi denominação protestante sira maibé, Igreja Católica manten nafatin posição hodi fo sarani labarik sira desde Bebe. Igreja iha hanoin ida katak;Lori moris foun ba mundo ida nee nudar privilégio boot ida. Lalaok ida nee lori ksolok, bensão no responsabilidade inan aman nian. Responsabilidade tanba inan aman hadomi sira nia oan. Inan-aman nia domin fo imagem lolos kona ba Maromak nia domin ba ema hot-hotu. Liu husi we baptismo, oan sira hola parte ona ba família Maroamk nian; mak Igreja.

 

Atu taka reflexão nee, ita iha esperança boot tebes katak Maromak nia Lia Fuan bele loke ita nobun nia neon hodi compreende sentido husi Sacramento Baptismo nebe ita hotu simu.

Liga we baptismo, inan-aman iha papel nudar responsável hodi hanorin oan sira desde kiik, treina no hametin sira nia fiar. Ho ida nee inan aman nia papel fundamental ba oan sira nia moris sarani nian mak hanesan:

  1. Hanorin oração ba oan sira.
  2. Hanorin vlaor moral Cristão nian.
  3. Hanorin oan sira atu oinsa moris nudar sarani diak.
  4. Lori oan sira ba Igreja iha momento missa, liliu iha loron Domingo no loron boot sira.
  5. Hanorin oan sira fo esmola.
  6. Tau matan tuir katak; oan sira moris ho educação nebe diak.

 

Igreja católica mos  permite inan-aman sira hili labarik nia inan-aman sarani atu sira:

  1. Tulun inan-aman tau matan lesuk ba labarik nia educação fiar nian.
  2. Representa Uma Kreda hamatan labarik nee.

 

Inan-aman sarani nebe diak sempre sai exemplo ba oan sarani nee liliu aspecto moral no fiar sarani nian.

Basá, Graça Baptismo nian nee sai hanesan uda wen nebe suli tun mai rai no sei la fila wainhira seidauk haburas rai. Nunee, buat nebe mai husi Maromak sei manan mundo basá, husi Baptismo ema hotu sai Maromak oan. Maromak mos sei hamatan ema hotu hodi dehan: ”O Hau oan doben tebes. Hau domin tomak Hau tau iha o”. Assim Seja e Bem Haja (Ignas Lopes)

Leave a Reply

Your email address will not be published. Required fields are marked *