shadow
Diocese de Dili > NOTÍCIAS > LETURA DIÁRIA > Segunda – Feira, I Semana Tempo Comum (ANO A)

Segunda – Feira, I Semana Tempo Comum (ANO A)

Primeira Leitura                       1Sm. 1. 1-8

Lia housi primeiro livro Samuel nian:

Iha loron hirak nebá, iha ema ida housi rai Ramá iha uma-kain Suf nian, housi foho Efraim nian nebé hanaran Elcana. Nia, Jeroão nia oan mane, Eliú nia oan, Toú nia oan, Suf housi Efraim nia oan. Nia féen rua: Ida naran Ana no ida seluk naran fenena. Fenena iha oan barak; maibé Ana la iha oan. Housi nia cidade, ema ne’e tinan-tinan sa’e ba Silo, atu adora Na’i Mundo-raiklaran nian, hodi hasa’e sacrifício ba Na’i. Iha nebá, iha mós Eli nia oan na’in rua: Hofni no Fineias. Sira rua Na’i nia na’ilulik.

Loron ida, Elcana hasa’e sacrifício ida. Nia, bai-bain fó baluk balun housi balada be oho ne’e ba nia féen Fenena no nia oan mane no feto sira hotu. Maibé ba Ana fó de’it baluk oan ida, basá, maski nia hadomi tebes Ana, Na’i halo Ana sai kiuk. Fenena bai-bain hasara Ana hodi halo Ana sai hirus, tan Na’i halo nia sai kiuk. Halo tiha nune’e iha tinan-tinan, wainhira sa’e Na’i nia uma, Fenena hasara Ana hanesan bai-bain. Ana tanis no la han. Nia la’en Elcana dehan ba nia: “Ana, tansá ó tanis hodi la han? Tan sá ó neon nakraik nune’e? Ha’u ba ó la’os folin liu oan sanulu?”.

Maromak Futar Lia.

 

Salmo Responsorial                                                                                                            Sal. 115(116). 12-13, 16-17, 18-19 (R. 17ª)

Refrão : Na’i, ha’u hasa’e ba Ita, sacrifício ida hahí nian!!! Repete-se

Ou            Aleluia!

Oinsá ha’u agradece ba Na’i,

Tan buat kmanek hotu be Nia halo mai ha’u?

Ha’u sei foti cálice maksoyn nian

Hodi hahí Na’i nia naran. Refrão

 

Ha’u sei halo tuir ha’u nia lia hakotu ba Na’i;

Iha povo nian oin,

Iha Na’i futar matan, folin tebes,

Nia sarani sira nia mate. Refrão

 

Na’i, ha’u Ita atan, Ita atan feto na oan mane;

Ita silu tohar ha’u nia besi dadur.

Ha’u sei hasa’e sacrifício ida hahí nian,

Hodi bolu, Na’i, Ita naran. Refrão

 

Ha’u sei halo tuir lia hakotu ba Na’i;

Iha povo hotu nia oin,

Iha Na’i kadunan oin;

Iha ó nia muro laran, Jerusalém. Refrão

 

Aclamação                                                                                                                                                                                            Mc. 1. 15

Refrão : Aleluia, Aleluia!! Repete-se       

Maromak Nia reino besik ona;

Imi hakribi imi salan no fiar iha Evangelho. Refrão

 

Evangelho                                                                                                                                                                                      Mc. 1. 14-20

Na’i Jesus Cristo nia Evangelho nu’udar São Marcos haktuir:

Iha tempo nebá, wainhira ema dadur tiha João, Jesus ba Galileia, hahu haklaken Maromak Nia Lia-Foun-Di’ak, dehan: “Tempo to’o ona rohan, Maromak Nia reino besik ona. Imi hakribi imi salan ba hodi fiar Lia-Foun-Di’ak”.

Liu housi tasi ibun Galileia nian, Nia haré Simão ho nia alin Andre soe namanas dai ba tasi, basá, sira hakail-na’in ikan. Jesus lia tun ba sira: “Imi tuir Ha’u mai; Ha’u sei halo imi hakail-na’in ema nian”. Sira husik kedas dai hodi tuir Nia.

Liu tan uit-oan ba oin, Nia haré Tiago, Zebedeu nian, ho nia alin João iha ró laran, hadi’a hela dai; Nia bolu kedas sira. Sira husik sira aman Zebedeu iha ró, hamutuk ho ema sira, hodi tuir Nia.

Lia Maksoyn.

Leave a Reply

Your email address will not be published. Required fields are marked *