shadow
Diocese de Dili > NOTÍCIAS > Notícias > La ba Eleição Antecipada; Ita Forma Governo Ne’e Oinsa !!!

La ba Eleição Antecipada; Ita Forma Governo Ne’e Oinsa !!!

DCAD Iha dadalia ho Pe. Júlio Crispim Ximenes Belo Jurista Timoroan nian kona ba situação ne’ebe oras ne’e Timor-Leste enfrenta liga ba Orçamento Geral do Estado (OGE) ne’ebe chumba iha Parlamente Nacional, nia haktuir katak; solução ba situação tuir Constituição haruka mak tem que hakat ba Eleição Antecipada. Basá laiha tan ona dalan seluk atu forma Governo selae Eleição Antecipada.   

“La ba Eleição Antecipada ita husu ; forma Governo ne’e oinsa! Então Partido Político sira atu forma oinsa, Partido ida ne’ebe mak atu forma; AMP mak atu forma bele kalae? Problema AMP agora ne’e los duni sira iha Legitimidade Democrática atu forma, maibé sira laiha ona “sira nakfera ona”. Orçamento la passa ne’e tanba sira nakfera. Se ita forma fali ho AMP mos ita hatama fali Orçamento hanesan de’it katak sei la passa nafatin. Ne’ebe ema dehan AMP atu forma fali Governo ne’e kikoan liu, dehan Pe. Júlio Crispim iha Instituto de Filosofia e Teologia Fatumeta Dili (29/01).

Bele ka Partido Segundo mais Votado forma Governo? Tuir Pe. Júlio Crispim nia comentário katak; “Partido Segundo mais votado ne’e labele forma Governo tanba laiha Legitimidade Democrática. Laiha Legitimidade Democrática ne’e katak povo hakarak AMP mak forma Governo tanba iha eleição antecipada ne’e povo hili AMP mak barak laos Fretilin. Ne’e mak povo lakohi atu Fretilin forma Governo, hakarak AMP mak forma Governo.

Ne’e duni, Partido Segundo mais votado ne’e atu forma Governo, ita hare ba housi Partido Político sira susar teb-tebes. Balun dehan katak ita forma Governo liu housi iniciativa Presidente da República nian. Quando koalia kona ba Iniciativa Presidente da República nian atu forma Governo, Eleição Presidencial ne’e laos atu hetan Presidente ida hodi forma Governo, maibé nia atu sai Chefe Estado. Eleição atu hetan Governo ne’e, Eleição Parlamentar. Tanba ita laos uja sistema Presidencial. Se Sistema Presidencial maka Presidente ne’e hamoris Governo. Enquanto Sistema Semi Presidencial ne’e Parlamento mak hamoris Governo. Ne’e duni, iniciativa Presidente da República atu forma Governo ne’e contra ita nia sistema rasik; sistema ne’ebe mai kedas ona housi 1975 iha ne’ebe Proclamação Independência hotu ita iha Presidente da República, ita iha Primeiro Ministro, ita iha Governo no Orgão Soberania sira seluk. Ne’e duni formação do Governo ne’e laos iniciativa Presidente nian, maibé tem que ser Partido Político sira. Tanba ne’e, Presidente da República laiha competência, nem Legitimidade atu forma Governo”.

Oinsa Atu Dissolve Parlamento? Tuir Pe. Júlio Crispim katak “Liga ba situação sira oras ne’e mosu, ita hare ba diálogo nacional sira be lao, ita hare ba diálogo entre Partido sira ne’e la funciona, maibé Presidente da República bolu Partido Político ba koalia ho sira, depois sei bolu mos Conselho Estado ne’e Presidente lao tuir dalan Constituição. Dalan Constituição haruka katak atu dissolve Parlamento Presidente da República tem que bolu Partido sira iha acento Parlamentar atu rona; halo Audição ba sira. e bolu mos Conselho Estado atu Presidente rona mos Conselho Estado sira. Presidente agora dadauk ne’e lao tuir hela dalan Constituição nian. Ne’e duni, balu hanoin dehan Presidente lori Partido Político sira ba, lori Conselho Estado ba atu Presidente iha iniciativa hodi forma Governo ne’e lalos.

PM ho membro governo quando orçamento la passa sira nia estado oisá? Ita nia problema ne’e laos iha Primeiro Ministro. Tanba sa mak tem que husu Primeiro Ministro resigna an ou tanba saida mak Primeiro Ministro atu resigna an? Primeiro Ministro kaer Governo halao hela ninia kna’ar, elabora hela ita nia Orçamento lori hela mai iha Parlamento. Mai iha Parlamento mak la aprova. Agora Parlamento mak la aprova tiha, husu fali Primeiro Ministro mak atu resigna an;  ne’e ita dehan katak, katar iha ulun koi iha ain. Quando ema normal ne’e katar iha ulun ita koi iha ulun. Ne’e duni ita labele koalia tun koalia sae”.

Oinsa atu halo Demissão do Governo?  Tuir Jurista Timoroan Pe. Júlio Crispim katak: “Agora daudaun ne’e hakarak atu halo demissão do Governo tuir CRDTL artigo 112 alinea primeiro dehan katak. Entre condição 6 nebé Constituição hakerek ne’e iha de’it condição ida mak sei bele, lima seluk la relevante ona. Tanba ne’e ha’u temi ida-idak: (1) Moção Censura; ne’e Parlamento mak atu halo ba iha Governo kona ba execução no Plano sira; ida ne’e agora la relevante ona. 2) Governo husu confiança ba Parlamento; ida ne’e mos la relevante ona. (3) hatama Programa tutuir malu la Aprovado; ida ne’e mos la relevante ona. (4) Primeiro Ministro moras boot, moras permanente; ida ne’e mos la relevante. (5) Primeiro Ministro resigna an. Primeiro Ministro resigna an ne’e nia tem que fo razão, tanba saida. Maibé iha ninia No. 2 dehan nune’e; Primeiro Ministro resigna an ne’e so Presidente hatan. Se Presidente la hatan ne’e ninia resigna an ne’e la funciona. Tanba Primeiro Ministro resigna an ne’e bele cria problema ba iha funcionamento Orgão Estado nian. mesmo Primeiro Ministro hakarak resigna an, maibé Presidente lakohi resigna an ne’e la funciona. Maibé Primeiro Ministro atu resigna an ne’e tanba saida! ne’e mos la revelante. Então hela deit condição ikus (6) hahu Legislatura foun. Entre condição 6 ne’e hela deit condição ida hahu Legislatura Foun atu bele demite Governo.

Oinsa hahu Legislatura foun atu bele iha demissão ba Governo ! tuir Pe. Júlio Crispim katak; “Hahu Legislatura foun ne’e so bele liu housi de’it Resultado Eleição. E resultado Eleição ne’ebe tuir Artigo 100 dehan katak Eleição Subsequentes. Então Legislatura foun hahu wainhira iha eleição. E eleição atu iha tem que dissolve Parlamento ne’e be iha. Atu dissolve Parlamento ne’ebe iha ne’e iha condição laos narnaran dissolve deit ; Dissolve tamba; I) Governo la forma; ne’e la relevante ona. II) Orçamento la Aprova. Ida ne’e maka sai ita nia problema. Ne’e duni, tanba Orçamento la aprova bele dissolve ona Parlamento. Maibé molok atu dissolve Parlamento, Presidente da República tem que bolu Partido Político sira ne’ebe acento iha Parlamentar para atu halo Audição. Bolu tiha sira ne’e hotu sei bolu tan Conselho do Estado atu Presidente mos rona Conselho do Estado nia hanoin. Ho rua ne’e “Governo la forma no Orçamento la Aprova”  mak bele dissolve Parlamento. Se Presidente mak la halo Audição ba iha Partido Político no Conselho do Estado, ninia actos atu dissolve Parlamento ne’e ilegal, ne’e inexistênte no la vale.

Tan ne’e hanesan Jurista Pe. Júlio Crispim hateten: “Hare housi Parte Lei nian mak ne’e; Presidente agora lao hela tuir dalan Constituição; nia halo diálogo mais Constituição mak haruka, nia halo Audição mos Constituição mak haruka. Ne’e duni decisão ne’ebe maka housi processo ne’e ha’u nia hare Presidente sei decide DISSOLVE PARLAMENTO atu hetan Ligislatura Foun. No Legislatura foun atu halo demissão ba Governo atu nune’e ita bele iha Governo foun mai housi resultado Eleição.

Nu’udar povo ita hare situação sira hanesan ne’e katak ne’e situação ne’ebe la satisfas duni hanesan cidadão tanba lori ita bebeik ba eleição. Maibé keta haluha ida ne’e direito cidadão nian. Ita bele exerce ita nia direito ou la exerce ita nia direito ita iha liberdade atu exerce. Constituição garante katak “livre”. Subfrase Universal ne’e ‘Livre’. Ida ne’ebe obrigatório; ita ba halo ressenciamento Eleitoral. Maibé atu ba tuir Eleição atu vota ka la vota ne’e Livre.

Atu convence povo atu vota ne’e laos Presidente da república nia serviço. Presidente nia serviço ne’e halo decisão tuir Constituição no Anuncia ninia decisão ne’e ba público. Atu povo mai vota ka la vota ne’e compete ba Partido político sira atu ba convence povo no atu ba motiva povo atu vota ba sira nia Partido. Ne’e papel no missão Partitdo Político nian liu housi Capanha Eleitoral.

Será que Regimento Parlamentar fo dalan forma Bancada! Tuir Pe. Julio Crispim katak; “Regimento Parlamentar ne’e fo dalan atu ba iha Parlamento bele forma Bancada. Mesmo que Lei Partidos Políticos la preve atu depois de Eleição tiha, sira hetan tiha cadeira sira fahe malu. Maibé ba iha  Regimento Parlamentar ne’e maka fo dalan atu ba iha Parlamento sira bele fahe malu tuir Bancada iha Parlamento. Maibé materialmente quando Lei Partidos Políticos sira koalia, Regimento Parlamento mos  labele halo tanba sira nain rua ne’e completa malu. Ida ne’e mai housi Legislação segundo ka terceiro liu ba mak altera ba iha Parlamento bele halo ida-idak nia Bancada. Maibé tuir lolos regras ne’e labele. Tanba interesses políticos sira nian ba iha Parlamento sira fahe malu para iha Bancada Parlamentar barbarak”. (Ruben-Ceko)

Leave a Reply

Your email address will not be published. Required fields are marked *