shadow
Diocese de Dili > NOTÍCIAS > REFLEXÃO > BEM COMUM vs APROVEITA PODER

BEM COMUM vs APROVEITA PODER

Rahun di’ak ba ema sira be ki’ak husi laran, Basá, sira soy Reino lalehan. Rahun di’ak ba sira be tanis, Basá, sira sei hetan laran kman. Fundmento husi Jesus nia hanorin sira (Doutrinas) iha Evangelho Mateus resumido (habadak) iha Capítulo 5-7. Resumo nee haktuir iha texto ho título: Bem Aventurança. Domingo semana nee, Uma Kreda Católica fo hanoin ita nobun atu compreende Maroma Futar Lia Fuan nebe hanaran “Bem Aventurança” (Mt 5,1-12a). Ita loke fuan hodi rona no halo tuir iha moris sarani.

Lalaok sociedade nebe Jesus enfrenta iha Ninia tempo, reflecta momos iha Jesus nia proclamação “Bem Aventurança” (“Ucapan Bahagia“), nudar relata iha Evangelho Mateus 5, 1-12ª. Proclamação nee, too horas nee mos sei relevante hela ba ita nia situação sócio-político nebe hamosu polémica oi-oin. Confusão, li-liu iha lalaok estado nian no afeta too componente hot-hotu iha vida sociedade. Progresso Dezemvolvimento tecnologia, barak ka oitoan, contribui mos aspecto positivo no negativo ba lalaok sarani (cidadão) ida nian. Ukun nain hadau malu poder hodi hetan osan boot no persen boot, povo halerik no hamihis dau-daun sira nia sentiment respeito ba nai ulun sira. Problema nia hun iha injustiça social no kaan ten ba poder.

Jesus iha altura nebá, sente preocupado ho condição povo iha sociedade. Romano sira ukun no explora sira liu husi imposto, limita sira nia liberdade de expressão no ukun ho ditadura. Preocupação iha altura nebá, sai mos ita nobun nian preocupação iha sociedade (moris povo sarani) ohin loron nian. Nudar resumo husi situação hirak nebé Jesus enfrenta no preocupa iha altura nebá, lalaok hirak nee expressa ona iha Jesus nia lia fuan aventurança, nudar ita rona iha Evangelho semana nee. Saida mak Jesus proclama, halo ita hatene situação loloos momento neba hanesan:”ki’ak, hamrook ba justiça, buka Dame, ema fo terus, buka justiça”. Sociedade Timor ohin loron mos sei existe nafatin realidade hirak nee. Iha qualquer situação, povo rai ida nian sempre hakilar ba justiça atu makaer ukun (governantes) sira hatene servi didiak tuir política Bem Comum.

Jesus la’os mai hodi hahi Ninia-An. Jesus mai hodi hanorin ema atu hatene oinsa hahi adora Aman Maromak iha fiar no liu husi hahalok concreto nebé serve ba ema barak (Bem Comum). Por natureza, iha sociedade ida, povo hot-hotu (criatura) iha obrigação atu hahí adora Maromak nudar Criador. Atu realiza ideal nee, ema hotu precisa moris hamutuk, respeita malu iha ambiente social nebé harmonia. Se ema hotu hatene respeita malu, significa ema sei haré malu hanesan maun ho alin iha fatin nebé sira horik hamutuk ba.

Provas Bíblica hatudu ona katak; desde Jesus moris hanesan ema iha rai Israel; hahú iha Belém, Nazaré, ba too cidade sira seluk no hetan ninia rohan iha Cruz tutun Calvário nian, Jesus la iha desejo seluk, além de esforço-An hodi halo tuir Aman Maromak nia vontade (plano salvação).

Iha contexto moris religioso Timor Leste nian, wainhira estado hamrik no hahú formação governo ida, povo hot-hotu laran metin no rahun diak tanba cada ministro hetan knaar hodi realiza política estado nian hodi luta ba Bem Comum povo nian. Primeiro Ministro, Ministro ho Secretário Estado hirak eleito, maioria mesak sarani Católico (balu praticante, balu badinas hakbesik ba Igreja iha tempo campanha, balu NAPAS alias mosu iha Tempo NATAL no PÁSCOA deit).

Iha Contexto política, política Bem Comum sai hanesan slogan eh estrategia deit atu figura bar-barak iha partido política sira aproveita hodi fahe poder ba malu, fahe cargo ba partidário, loke vaga serviço ba militante deit, fo projecto ba companhia sira nebé fo apoio financeira ba partido durante tempo campanha inclui mos wainhira estabelece partido, goza regalias estado nian, halo refora estrutura cada minstério ho intenção hatama partidário no família no pior liu tan mak luta atu kaer cargo too tinan tolu ba leten, pensão vitalícia  harga mati tiha ona wainhira mandato remata.

Nee mak estrategia Bem Comum horas nee dadaun, partido político sira utiliza hodi hamosu impasse política nebe rohan laek. Jesus maske haré situação todan nebé povo hasoru iha altura nebá, nia fo coragem nafatin atu povo nee, la bele lakon esperança ba Maromak. Maker ukun (governante) Timor aprende husi lalaok Jesus nian karik, situação nebé povo barak deseja, sei realiza duni. Jesus maske Maromak, nian la foti-An nudar Maromak maibé, haraik-An hodi cumpri deit Aman nia vontade (plano salvação). Governante sira la kaanten poder eh la hatene-an karik, sira sei ukun tuir povo nia hakarak basea ba promessa hirak nebé sira fo durante campanha. Maske ukun lalais ka ukun kleur, pelo menos halo netik gebrakan (novidade) ruma durante kaer ukun, laos makan gaji buta deit ful-fulan maibé, resultado serviço la iha, povo hein ho esperança mamuk.

Nunee, sociedade ida nia laran, necessáriamente precisa estabelece relação vice versa (hubungan timbal balik) entre governante ho povo. Governante promete moris diak ba ema hotu iha âmbito ploítico, povo hein laran metin (esperança) liu husi voto nebé sira fo iha eleição. Nunee mos iha âmbito religioso, povo fiar ba Maromak liu husi adoração no hahalok moris, Maromak cumpri esperança nee ho salvação nebé hatudu concretamente iha Jesus Cristo.

Governante nebé iha fuan sarani no hatene ukun, nia sei fuan boot atu funu hasoru ninia ambição rasik hanesan; corrupção, fahe projecto, goza regalias no laos servi dirigente partido nia hakarak (Asal Bapak Senang) maibé hamosu novidade eh creatividade rasik hodi servi povo ba finanlidade ida naran Bem Comum tuir regra democrática. Contexto justiça social laos sukat husi governante nia moris luxo maibé haré husi povo no estado nia prosperidade (kemakmuran).

Tuir Justiça mundo nian, ema nebé comete sala tem que hasoru justiça hodi simu condenação. Tuir justiça Divina, ema nebe monu ba sala precisa hetan perdão hodi hodi alcança salvação. Tanba nee mak Jesus laos mai hodi fo castigo maibé, Nia mai hodi salva. Nia hatudu exemplo wain atu ita fiar no banati tuir hodi alcança salvação no realiza vontade Maromak nian.

Problema iha Timor mak, governante no funcionário barak mak sente alergia wainhira rona Jesus nian naran, wainhira rona Bispo nia naran, wainhira rona Igreja nia lian tanba figura hirak nee sai impedimento ba sira nia liberdade hodi goza moris no aproveita facilidade estado.

Dala barak ita rona lema:”The Rigt Man in the Right Place” sai hanesan slogan mamuk ida nebé la relevante iha ambiente política. Ema nia persenção mak; kaer ukun hodi goza regalias, aproveita facilidade estado no prepara ba simu Pensão Vitalícia maske la iha capacidade. Jesus nia Lian Bem Aventurança iha contexto Timor nee, válido deit ba povo kiik nebe moris iha injustiça enquanto makaer ukun sira aproveita máximo ba poder nebe hetan, até balu hadau malu no troca malu ukun iha instituição ida nia laran.

Progresso Tecnológico ohin loron, halakon ema nia sentido solidariedade, hamohu ema nia amizade hodi hamosu mak individualismo no hadau malu halibur riku soin hodi hakonu estilo da vida. Lalaok hirak nee mos oho ema nia espírito nudar sarani. Governante kaan ten poder too haluha identidade nudar Timor oan nebe baptizado.

Ita nobun nudar povo sarani nebe adere fiar iha Jesus Cristo, precisa mantem fiar ba Maromak no la bele lakon laran metin (esperança) tan Maromak hatene halo justiça ba ema hotu iha rai nee. Jesus dehan:” Ksolok ba sira nebé hamlaha no hamrook ba justiça, basá sira sei bosu,…..Ksolok ba sira nebé ema duni, fo terus tan buka justiça basá, Reino Lalehan sira nian. Ksolok ba imi, wainhira tan Ha’u ema hateten aat imi, duni imi hodi foti lia bosok oin-oin hasoru imi. Imi haksolok ba, hahi ba, basá imi nia kolen iha Lalehan wa’in liu”. Assim Seja e Bem Haja. (Ignas Oliveira)     

 

Leave a Reply

Your email address will not be published. Required fields are marked *