shadow
Diocese de Dili > NOTÍCIAS > LETURA DIÁRIA > IV Domingo Tempo Comum (ANO A)

IV Domingo Tempo Comum (ANO A)

Primeira Leitura              Sof. 2, 3; 3, 12-13

Lia housi  Livro Profeta Sofonias:

Imi  hotu nebé moris  ki’ik  iha  rai, buka Maromak, buka  moris tuir  nia Ukun  Fuan.  Buka halo tuir justiça, buka haraik-an: imi bele hetan karik subar fatin, iha loron nebé Maromak hatudu Nia hirus. Nai Maromak dehan:”Hau sei husik de’it iha imi leet povo ida nebé moris ki’ik, moris di’ak. Israel oan sira nebé sei moris, sei buka de’it mahan iha Maromak naran. Sira sei la han matak tan, sira sei la dehan tan lia bosok, iha sira nia ibun, sei la hetan tan lia bobar ida. Maibé, sira sei bele han, hodi tur hakmatek; ema ida sei la book sira.’’

Maromak Futar lia.

 

Salmo Responsorial                                                                                                                                   Sal. 145(146), 7, 8-9a, 9bc-10

Refrão : Rahun di’ak ba ema sira be ki’ak housi laran, basá, sira soy Reino Lalehan!!! Repete-se

Na’i, tahan ho justiça kiik sira,

Haraik ai-han ba sira be hamlaha,

Fo liberdade ba sira be dadur. Refrão

             

Na’i halo matan delek sira haré,

Tahan ema sira kbiit laek,

Hadomi ema sira hahalok mós. Refrão

 

Na’i tahan ema sira nebé la’o rai,

Fó han-hemu ema oan ki’ak no faluk,

Maibé, taka dalan ba ema aat.  Refrão

 

Segunda Leitura                                                                                                                                                                       1Cor. 1, 26-31

Lia housi São Paulo nia surat ba sarani sira iha Corinto:

Maun alin sira: imi sira be Maromak bolu ona, imi haré to’ok, imi sê: iha imi leet, la iha ema matenek barak, tuir bain-bain nian, ema boot mos la wa’in, ema kmaus mos la barak. Ida nebé ema hanoin katak bulak, mak Maromak hili atu halo bilán ema matenek sira; ida nebé ema hanoin katak kbiit la iha, mak Maromak hili atu halo  moe ida nebé maka’as; ida nebé fo’er, nebé ema hakribit iha rai, ne’e mak Maromak hili: hili ida nebé folin la iha atu halo lakon tiha  ida nebé folin.  Nune’e, criatura ida la bele foti-an iha Maromak futar oin.  Hodi nia mak imi hamutuk ho Cristo Jesus, Jesus nebé mai housi Maromak, hodi sai matenek, sai justiça, sai moris santo, no mos sai maksoyn mai ita. Nune’e, tuir hakerek ona, ema nebé hahi-an, sei hahi-an iha Maromak’’.

Maromak Futar Lia.

 

Aclamação                                                                                                                                                                                          Mt. 5, 2-3

Refrão : Aleluia, Aleluia!! Repete-se

Rahun di’ak ba ema sira be ki’ak husi laran, basá, sira soy Reino lalehan.

Rahun di’ak ba sira be tanis, basá, sira sei hetan laran kman. Refrão

 

Evangelho                                                                                                                                                                                        Mt. 5, 1-12a

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus haré ema lubun boot, Nia sa’e ba foho. Hafoin, Nia tur tiha, Escolante sira besik ba Nia. Nia hahu hanourin sira, hodi dehan nune’e:‘’ksolok ba ema ki’ak, sira nebé ki’ak iha laran basá, Reino Lalehan sira nian. Ksolok ba sira nebé haraik-an, basá, sira sei simu rai hanesan liman–rohan. Ksolok ba sira nebé hamlaha no hamrook ba justiça, basá sira sei bosu. Ksolok ba sira nebé laran luak, basá sira sei hetan di’ak. Ksolok ba sira nebé laran mós basá, sira sei haré Maromak. Ksolok ba sira nebé buka Dame, basá ema sei bolu sira Maromak oan. Ksolok ba sira nebé ema duni, fo terus tan buka justiça basá, Reino Lalehan sira nian. Ksolok ba imi, wainhira tan Há’u ema hateten aat imi, duni imi hodi foti lia bosok oin-oin hasoru imi. Imi haksolok ba, hahi ba, basá imi nia kolen iha Lalehan wa’in liu.

Lia Maksoyn.

Leave a Reply

Your email address will not be published. Required fields are marked *