shadow
Diocese de Dili > NOTÍCIAS > Notícias > CRISTÃO EUCARÍSTICO: LORI CRISTO BA SARANI SIRA NO LORI SARANI SIRA BA CRISTO (CRISTÃO CRISTOCÊNTRICO)

CRISTÃO EUCARÍSTICO: LORI CRISTO BA SARANI SIRA NO LORI SARANI SIRA BA CRISTO (CRISTÃO CRISTOCÊNTRICO)

DCAD – Iha Sexta-Feira, loron 14 fulan Fevereiro tinan 2020,  Comunicação Arquidiocese de Dili (CADD), realiza hikas Talk Show ida iha Estúdio Rttl.ep Caicoli, Dili ho nia tópico “CRISTÃO EUCARÍSTICO” ne’ebe ho nia subtema “HODI CRISTO HO CRISTO IHA CRISTO BA AMAN MAROMAK”,  ho objetivo atu lori Cristo ba sarani sira no lori sarani sira ba Cristo (Cristão Cristocêntrico). Tema refere mak sai hanesan tema Pastoral ba ano letivo foun 2020-2024 Arquidiocese Dili nian. Iha Talk Show ne’e ninia orador sira hanesan Vigário Episcopal Assunto Pastoral Pe. Juvito Rêgo de Jesus Araujo, Mestre Ribeiro housi hosi grupo Leigo Maria Paróquia Becora nian no Aloyso Fernandes Acólito hosi Paróquia Becora.

Vigário Episcopal Assunto Pastoral Pe. Jovito Rêgo de Jesus Araujo iha Talk Show ne’e acentua liu parte inportante sira iha vida Eucaristia ne’e rasik katak; Sacrosantum Concilium concidera Eucaristia ne’e hanesan We Matan no Kakuluk Fiar Sarani ninian. Celebração Eucaristia ne’e hanesan primeira celebração, última celebração no única celebração katak nunca repete. Ne’e katak Eucaristia ne’e celebração real. Ne’e duni, Cristão Eucarístico katak ema ne’ebe prepara nia an tama ba Eucaristia, halo nia an sai Eucaristia no nia sai Eucaristia moris.

“Ita celebra Eucaristia laos memória ida, maibe Eucaristia ne’e real. Iha neba laos repetição ceia Pascal, maibe mistério ida ne’e halo fali dala ida tan iha Altar nia leten. Ita ba participa iha momento ida ne’ebe Jesus rasik presente real iha neba. Hodi hahu kedas mai, celebração Eucarística ne’e mai hamutuk ho Jesus nia terus no mate. Iha Liafuan sira ne’ebe temi duni iha Eucaristia nia laran hanesan; Iha kalan molok Nia atu saran An ba mate Nia kaer Pão no Tua haraik bensa fo ba nia escolante sira hodi dehan simu ba hotu-hotu han no hemu; halo ida ne’e hodi hanoin Ha’u”, tenik Vigário Episcopal Assunto Pastoral Pe. Jovito Rêgo de Jesus Araujo.

Vigário Episcopal Assunto Pastoral Pe. Jovito Rêgo de Jesus Araujo reforça tan katak “Iha fatin hotu-hotu vida devocional ne’e forte los, maibe iha vida Eucarística ne’e ladun. Arquidiocese hili tema ida ne’e atu sarani hirak ne’ebe participa iha Eucaristia ne’e bele lori transformação ba sira nia an no ba mundo. Ida ne’e mak sai centro vida sarani nian no ida ne’e mak sarani sira tem que descobre atu bele hetan força housi kbiit ida ne’e”.

Relaciona ho condição sira hodi lori ita ba celebração Eucarística nian Vigário Episcopal Assunto Pastoral Pe. Jovito Rêgo de Jesus Araujo hateten; “Condição ida uluk liu tem que iha graça nia laran (Estado de Graça) katak laiha sala boot ne’ebe sata netik nia hasoru ho Jesus Cristo iha Eucaristia. Condição seluk mak Jejum. Ema sira uluk ninian pratica duni condição ida ne’e, katak iha kalan sira hahu reserva ona sira nia fuan ho laran no físicamente katak lahan no hemu buat ruma to’o ba comunga. Ne’e hatudu katak ema prepara isin no klamar. Ohin loron ita bele dehan condição ida ne’e todan teb-tebes; ho media comunicação sira, televisão, ho buat sira ne’e hotu ema la prepara nia an diak. Ikus-ikus la tau ona loron tomak ida Jejum, maibe oras ida de’it. Ne’e katak oras ida antes ne’e labele han buat ida to’o ba comunga. Ohin loron sarani sira barak iha hela celebração nia laran sei nata hela rebuçado sira. Ne’e katak la prepara an ona. Tuir lolos ema sira hanesan ne’e labele ba comunhão. Oras ida de’it ita halo Jejum ne’e katak ne’e tem que sai hanesan critério fundamental ida ba isin no klamar.

Iha fatin hanesan Sr. Ribeiro housi hosi grupo Leigo Maria Paróquia Becora ninia experimenta kona ba Eucaristia ne’e katak “Hanesan sarani ha’u experimenta Eucaristia ne’e hanesan we matan moris nian, hanesan mos força no acção de graça ida. graça Eucaristia ne’ebe ha’u hetan no smiu, ha’u lori mai concretiza iha moris lor-loron família nian. nia hatutan tan katak Atu celebra didiak Eucaristia Hau nia preparação sira fahe ba parte rua; prepara Isin no klamar nian. prepara parte isin nian significa oinsa atu halakon egoista sira, buka le no reflete Maromak nia liafuan sira, sharin Bíblia hamutuk iha família. No preparação klamar nian mak Sacramento Confessa ne’e rasik.

Biban hanesan Aloysio Fernandes, Acólito hosi Paróquia Becora hateten; “Hanesan Acólito Eucaristia ne’e sai hanesan sinal Agradecimento nian ida, tanba ita rasik simu graça hosi Na’i Maromak liu hosi Eucaristia no lori graça ne’e ba moris lor-loron nian. Hanesan servidor iha Altar precisa mos prepara condições sira; físicamente no mos Espiritualmente. Tanba Eucaristia ne’e sai mos hanesan centro moris Acólito ida nian. Ne’e duni, atu ha’u bele servi didiak iha Altar uluk nanain tem que servi tiha lai iha moris lor-loron nian, hafoin lori ba hasae ba Maromak iha Eucaristia. Nune’e mos hetan tiha graça housi Eucristia ne’e lori fila fali ba moris lor-loron nian”. (Jornalista: Aloysio / Editor: Angelson Soares)

Leave a Reply

Your email address will not be published. Required fields are marked *