shadow
Diocese de Dili > NOTÍCIAS > Notícias > HANOIN HIKAS TINAN 75 EXISTÊNCIA MISSÃO ERMERA

HANOIN HIKAS TINAN 75 EXISTÊNCIA MISSÃO ERMERA

DCAD – Paróquia Nossa Senhora de Lourdes Ermera hanoin hikas tinan 75 existência missão Ermera nian iha loron 14 fulan Fevereiro 2020 ho missa Ação de graça ne’ebe preside hosi Arcebispo de Dili Dom Virgílio do Carmo da Silva, SDB, iha Igreja Paroquial Paróquia Nossa Senhora de Lourdes Ermera. Iha celebração ne’e participa hosi Vigário Forânea Ermera nian, Padre Párocos Vigararia Ermera ninian, Padres Bainaca sira, Membros do Governo, Membro Parlamento, Presidente Município ho nia estrutura; housi Posto Administrativo to’o sucos no Aldeias,  Madres, Seminaristas, Veterano, Mestres Catequistas, Inan-aman no sarani tomak Paróquia Ermera nian. celebração ne’e hahu iha dader tuku 10:00 dader no remata iha tuku 2:00 lorokarik Otl.

Arcebispo de Dili Dom Virgílio do Carmo da Silva, SDB iha ninia discurso sira uluk nanain nia hato’o nia votos Parabens ba sarani Ermera tomak ba celebração 75 existência missão Ermera nian. No iha ocasião ne’e nia acentua mos papel saida mak ita sei halo depois de celebração 75 existência missão Ermera nian no celebração sira hanesan ne’e husik hela mensagem saida ba ita.

“Ita hateke fila ba kotuk durante tinan 4 nia laran hanesan bispo iha Diocese Dili nia laran, liu-liu lao haleu Vigararia Ermera ninian, halerik ida ne’ebe ha’u nafatin rona entre pro ho contra; fila fali ba iha tara bandu ne’ebe sarani Ermera rasik mak halo ho amo sira liu-liu ha’u nia predecessor Dom Alberto ninia presença nune’e mos Presidente iha tempo neba ninia presença, sarani Ermera halo tiha tara bandu ida, maibe iha tempo hirak ne’e nia laran ita nia compromisso, ita nia fidelidade ba ita nia liafuan, ita nia kaben ne’ebe ita tafui ne’e hanesan ita haluha tiha ona. Tan ne’e bolu atenção nafatin ba naiulun sira Ermera nian katak, se ita boot sira hanoin katak ida ne’e la relevante ona então kore tiha ba. Se hanoin sei relevante então buka atu kesi metin fila fali tanba imi mak uluk halo ho imi nia liberdade tomak. Ne’e duni ha’u la obriga maibe atu fo hanoin deit ba ita boot sira. ne’e duni, iha tinan 75 Ermera ninian ne’e atu lori ita fila fali ba ita nia fidelidade no ba ita nia promessa sira. Tanba ne’e mak ha’u dehan tem que hateke ba kotuk hodi fo coragem no hateke ba kotuk ba buat ne’ebe ita la gosta. Ida ne’e mak sadik ita atu husik hela recordação ne’ebe diak ba povo no Uma Creda Ermera ninian”.

Iha fatin hanesan Vigário Forâneo Ermera Pe. Arnaldo Frederico de Deus iha nia mensagem ba sarani paroquiano Ermera liu-liu kona ba oinsa atu sai dame nain no brani nafatin atu sasin fiar nian hodi hasoru desafio sira ne’ebe oras ne’e ita enfrenta iha ita nia rain no ita nia Creda.

“iha mundo ita rona virus ida naran Virus Corona, maibe iha ita nia rain mosu virus ida naran Ema la rona. Tan ne’e ita buka atu rona nafatin ba serviço pastoral diocese ninian, ita nia creda timor ninian hodi brani fo sasin nafatin fiar ne’e ba sociedade”.

Pe. Pároco Paróquia Nossa Senhora de Loudes Pe. Deonildo de Andrade iha ninia discurso sublinha liafuan ne’ebe dehan ‘tempo muda, mos ita ema’. “iha tempo sira liu ba fatin ne’e nakonu ho café laran maibe ohin ne’e nakonu ho ema. Ne’ebe ita hare duni katak fiar ida ne’e desemvolve hosi tempo ba tempo. Los duni, ohin loron tempo moderno, ema mos começa buka sentido da vida iha buat barak. maibe hanesan Paroquiano iha Paróquia ida ne’e buka atu hakasan sai Cristão Eucarístico”, tenik Pe. Deonildo de Andrade. (Angelson)

Leave a Reply

Your email address will not be published. Required fields are marked *