shadow
Diocese de Dili > NOTÍCIAS > LETURA DIÁRIA > Quarta-Feira, VI Semana iha Tempo Comum (ANO A)

Quarta-Feira, VI Semana iha Tempo Comum (ANO A)

Primeira Leitura                      Tg. 1. 19-27

Lia housi São Tiago nia Surat:

Ha’u maun-alin doben sira, imi hatene ida ne’e ba: Imi ida-idak pronto kedas atu rona, bele neneik iha koália no kleur atu hirus, basá, ema nia hirus la fó sai Maromak nia justiça. Nune’e, imi hadook-an tiha housi hakaran áat hotu no hahalok áat sira seluk; simu ho laran liafuan nebé kuda ona iha imi: nia mak sei soi imi klamar. Imi sei buka moris tuir liafuan, la’os atu rona de’it hodi bosok imi-an rasik. Ida be rona no la moris tuir liafuan, nia hanesan ema ida nebé haré nia oin iha lalenok. Nia haré tiha didi’ak nia oin, hafoin haluha kedas nia ilas oin sa lós. Maibé, ida nebé tau neon no laran metin iha lei lós nian, be lei liberdade nian, no káer metin nia – la’os hanesan ida be rona de’it hafoin haluha, maibé, ida nebé moris tuir lolós – sei hetan laran ksolok iha buat hotu be nia halo.

Ema ruma hanoin katak nia besik Maromak, maibé la hatene ukun nia nanal karik hodi bosok nia fuan, ema ne’e nia religião folin laek. Religião momós no lolós iha Maromak, ita Aman, Nia oin mak ne’e: Tau matan ba oan kiak no feto faluk sira iha sira nia susar, no hadook an housi mundo ne’e nia hahalok áat.

Maromak Futar Lia.

 

Salmo Responsorial                                                                                                                      Sal. 14(15). 2-3ab, 3cd-4ab, 5 (R. 1b)

Refrão : Na’i, sé mak bele hôrik iha Ita kadunan? Repete-se

Ou         : Hanourin ami, Na’i: sé mak bele hôrik iha Ita kadunan? Repete-se

Ema nebé moris hodi la halo sala,

Moris tuir justiça no ko’alia lialós ho laran tomak;

Ema nebé la foti lia bosok hodi du’un matak. Refrão

 

Ema nebé halo tuir nia juramento,

Maski nia hetan susar, la empresta nia osan hodi husu funan,

La kohi hatatan ema laran maus;

Ema hanesan ne’e sei la monu. Refrão

 

Aclamação                                                                                                                                                                                        Ef. 1. 17, 18

Refrão : Aleluia. Aleluia!! Repete-se

Ita Na’i Jesus Cristo nia Aman ita laran nia matan

Atu ita bele haré esperança nebe Maromak bolu ita ba. Refrão

 

Evangelho                                                                                                                                                                                     Mc. 8. 22-26

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ho Nia escolante sira to’o iha rai Betsaida. Ema lori ba Nia ema matan delek ida. Sira husu ba Nia atu tau liman ba nia. Jesus káer ema matan delek ne’e  nia liman hodi lori nia ba liur. Hafoin tau káben ba nia matan, halolo liman ba nia hodi husu: “Ó haré buat ruma?” Nia foti matan hodi dehan: “Ha’u haré ema barak hanesan ai-hun barak, sira la’o hela”. Tuir mai, Jesus tau Nia liman  ba ema ne’e nia matan nia leten, nia hahú haré mós:  nia matan di’ak fali no bele haré momós buat hotu. Nune’e, Jesus haruka ema ne’e ba uma hodi dehan: “Ó keta tama iha knua nia laran”.

Lia Maksoyn.

Leave a Reply

Your email address will not be published. Required fields are marked *