shadow
Diocese de Dili > NOTÍCIAS > LETURA DIÁRIA > Quinta-Feira, VI Semana iha Tempo Comum (ANO A)

Quinta-Feira, VI Semana iha Tempo Comum (ANO A)

Primeira Leitura                         Tg. 2. 1-9

Lia housi São Tiago nia Surat:

Maun-alin sira: Nu’udar fiar na’in iha Jesus Cristo, Na’i glória nian, imi keta fihir ema. Ema ruma mosu karik iha imi leet kadeli osan mean nian no hatais mesak furak, no mós ema kiak ida hatais mesak áat, no imi fó laran ba ema ho hatais furak hodi dehan, “Mai tur iha ne’e, favor”, maibé dehan ba ema kiak, “Hamriik iha nebá!” ka “Tur iha ha’u nia ain”, imi la fihir ema, hodi sai lia na’in ho hanoin áat?

Rona ba, mau alin sira. Maromak la hili mundo ne’e nia ema kiak sira atu sai riku iha fiar no liman-rohan na’in reino nian nebé Nia hakotu ba sira nebé hadomi nia? Maibé imi la hamta’uk ema kiak ne’e. La’os ema riku sira mak hanehan imi? La’os sira ne’e mak lori imi ba tribunal? La’os sira mak hateten áat naran di’ak nebé Maromak fó ba imi? Imi halo tuir lolós karik Na’i nia ukunfuan, tuir Escritura, “Hadomi ó nia maluk nu’udar ó nia an rasik”, imi halo di’ak duni. Maibé, imi fihir ema karik, imi halo sala, no ukunfuan rasik fó sala ba imi.

Maromak Futar Lia.

 

Salmo Responsorial                                                                                                                           Sal. 33(34). 2-3a, 4-5, 6-7 (R. 7a)

Refrão : Ema kiak harohan, Na’i rona nia lian!!! Repete-se

Ha’u sei hahí Na’i loron kalan,

Nia rahun di’ak iha nafatin ha’u ibun.

Ha’u klamar fó glória ba Na’i;

Sira be haraik-an rona no haksolok. Refrão

 

Ha’u sei haksolok ho Na’i,

Ita sei hahí hamutuk Nia naran.

Ha’u buka Na’i, Na’i rona ha’u;

Nia hasa’i ha’u housi buat áat hotu. Refrão

 

Imi fila ba Na’i, imi sei hetan ksolok;

Imi sei la moe lerek.

Ema kiak harohan, Na’i rona nia lian,

Soi nia housi buat áat hotu. Refrão

 

Aclamação                                                                                                                                                                                 Jo. 6. 63c, 68c

Refrão : Aleluia. Aleluia!! Repete-se

Na’i, Ita nia futar liafuan mak espírito no moris.

Ita mak iha liafuan moris rohan laek nian. Refrão

 

Evangelho                                                                                                                                                                                      Mc. 8. 27-33

Na’i Jesus Cristo nia Evangelho nu’udar São Marcos haktuir:

Iha tempo neba, Jesus ho Nia escolante sira, la’o ba knua sira Cesareia de Filipe nian. Tuir dalan, Jesus husu ba Nia escolante sira: “Ema sira dehan katak Ha’u sé?” Escolante sira hatan hodi dehan: “João Baptista: balun dehan Elias, seluk dehan fali katak Ita ema duína ida”. Jesus husu fali ba sira: “Be imi dehan ha’u sé?” Pedro simu kedas hodi dehan: “Itaboot mak Messias”. Jesus bandu sira atu la bele hateten sai ba ema ida.

Tuir mai, Jesus hanourin sira katak Mane Maksoyn sei terus barak, katak, ema katuas sira, sacerdote ulun sira ho escriba sira, sei hakribi Nia, sei oho Nia. Maibé, liu loron tolu. Nia sei moris hi’as. Jesus fó hatene sai ida ne’e momós kedas ba sira. Pedro ba dook tiha uit-oan ho Jesus, hahu haksiak Jesus. Maibé, Jesus fila kotuk, haré Nia escolante sira, Nia haksiak Pedro hodi dehan: “Satanás, dook tiha housi Ha’u Nia oin, basá, ó la buka Maromak Nia hakaran, maibé, ó buka de’it ema nia hakaran”.

Lia Maksoyn.

 

Leave a Reply

Your email address will not be published. Required fields are marked *