shadow
Diocese de Dili > NOTÍCIAS > LETURA DIÁRIA > Sexta-Feira, VI Semana iha Tempo Comum (ANO A)

Sexta-Feira, VI Semana iha Tempo Comum (ANO A)

Primeira Leitura                Tg. 2. 14-24, 26

Lia housi São Tiago nia Surat:

Maun-alin sira: Ema manan sá wainhira nia dehan katak nia iha fiar, maibe nia la iha hahalok? Nia fiar ne’e bele soi nia? Alin eh feton ida kuran hatais no ai-han karik, no imi dehan: “La’o iha dame ba, taka isin didiak no han ba to’o bosu”, maibé la fó buat ida ba nia isin, imi manan sá? Ne’e duni, fiar mesak de’it, wainhira hahalok la iha, fiar ne’e mate liu.

Maibé ema ida dehan karik, “Ó iha fiar no ha’u iha hahalok”. Hatudu ó nia fiar nebé hahalok la iha, no ha’u sei hatudu ha’u nia fiar ho ha’u nia hahalok. Imi fiar katak Maromak mesak ida de’it. Ne’e di’ak. Diabo sira mós fiar ne’e, hodi nakdedar. Beikten! Imi hakarak haré katak fiar nebé hahalok la iha sai folin laek? Ita aman Abraão la hetan justiça housi nia hahalok wainhira nia sarani nia oan Isaac iha altar leten? Imi haré katak fiar moris ho nia hahalok, no fiar sai lolós ho hahalok, no halo tuir Escritura nebé dehan, “Abraão fiar Maromak, no Maromak sura ida ne’e nu’udar nia justiça”. No ema hanaran nia, Maromak nia belun.

Imi haré katak ema hetan jusiça housi hahalok, la’os housi fiar de’it. Basá, nu’udar isin nebé haketak an housi klamar, mate, nune’e, fiar nebe haketak an housi hahalok, mós mate.

Maromak Futar Lia.

 

Salmo Responsorial                                                                                                                           Sal. 111(112). 1-2, 3-4, 5-6 (R. 1b)

Refrão : Rahun di’ak ba ema be hadomi no ksolok iha Na’i Nia ukunfuan!!! Repete-se

Rahun di’ak ba ema nebé hamta’uk Na’i,

No haksolok iha Nia ukunfuan.

Nia bei-oan sira maka’as iha rai,

Derasaan ema laran mós nian hetan bensaun wa’in. Refrão

 

Iha nia uma, iha aihan no riku-soin wa’in,

Ema sei la haluha nia laran di’ak.

Nia nabilan ba ema laran lós sira

Nu’udar naroman iha nakukun;

Nia laran mós, laran-luak no laran di’ak. Refrão

 

Ksolok ba ema nebé laran luak no laran di’ak,

No tau matan ba nia riku-soi tuir justiça.

Ema laran mós tuba rai metin,

Ema temi nafatin nia naran. Refrão

 

Aclamação                                                                                                                                                                                         Jo. 15. 15b

Refrão : Aleluia. Aleluia!! Repete-se

Na’i dehan: Ha’u bolu imi belun, tan Ha’u dehan ona ba

Imi buat hotu nebé Ha’u rona housi Ha’u Aman. Refrão

 

Evangelho                                                                                                                                                                                     Mc. 8. 34-39

Na’i Jesus Cristo nia Evangelho nu’udar São Marcos haktuir:

Iha tempo neba, Jesus bolu fali ema lubun boot, hamutuk ho Nia escolante sira, hodi dehan ba sira: “Ema sé hakarak tuir Ha’u, sei hakribi nia an, simu nia cruz, hodi la’o tuir Ha’u. Basá, ema nebé hakarak soi nia moris, nia sei lakon moris ne’e. Maibé ema nebé lakon nia moris tanba Ha’u, no tanba Lia-Foun, ema ne’e sei soi duni nia moris. Tebes duni, sá mak ema ida hetan, wainhira manán mundo tomak, maibé nia lakon nia moris? Hodi sá ema ida bele troca nia moris? Nune’e, ema ruma móe karik tan ba Ha’u, no tan ba Ha’u Nia Liafuan sira, iha ema laran áat no sala na’in sira ne’e nia leet, Oan Mane Maksoyn mós sei moe ba nia, wainhira fila hikas mai iha Nia Aman Nia Glória hamutuk ho Santo Anjo sira”.

Jesus hateten lolós tan, ba sira: “Tebes duni, Ha’u dehan ba imi: Iha ne’e, iha ema balun nebé iha imi nia leet, sei la koko mate, wainhira seidáuk haré Maromak Nia reino nebé sei mai ho nia kbiit”.

Lia Maksoyn.

Leave a Reply

Your email address will not be published. Required fields are marked *