shadow
Diocese de Dili > NOTÍCIAS > LETURA DIÁRIA > Sábado, VI Semana iha Tempo Comum (ANO A)

Sábado, VI Semana iha Tempo Comum (ANO A)

Primeira Leitura                       Tg. 3. 1-10

Lia housi São Tiago nia Surat:

Maun-alin sira: Keta imi barak sai mestre, basá imi hatene katak Maromak sei tesi lia ho laran tós liu mai ita nebé hanourin. Ita hotu halo sala barak; no ema ida la halo sala karik ho nia liafuan, ema ne’e ema lós duni, hodi hatene ukun nia isin nia baluk sira hotu. Ita tau besi iha kuda nia ibun atu sira halo tuir ita nia haruka, hodi nune’e ita bele ukun sira nia isin tomak. Haré mós ró: maski ró bele boot liu no anin maka’as book nia, ró na’in bele ukun nia ba fatin nebé nia hakarak ho ai kabelak kiik ida. Ita nia nanal, ita nia isin nia baluk oan ida de’it, maibé nia bele loko an kona ba buat boot liu.

Ahi kiik ida bele han ai-laran boot hira! Nanal hanesan ahi ida, mós hanesan mundo áat ida nebé hela iha ita nia isin. Nia bele hafo’er ita isin tomak no nia bele halo ita an tomak sunu ho ahi inferno nian. Ema bele hamaus balada sira siak no fuik sira, manu sira, ular no ikan sira, maibé ema ida seidauk bele hamaus nia nanal. Nia hanesan flagelo be la hakmatek, nakonu ho veneno be bele oho ema. Ho nanal, ita hahí ita Na’i, ita Aman, no ho nanal mós ita hateten áat ema nebé Maromak nia ilas. Housi ibun ida de’it suli sai liafuan bensa nian no mós lia fo’er. Buat ida hanesan ne’e la bele, maun lain sira!

Maromak Futar Lia.

 

Salmo Responsorial                                                                                                                              Sal. 11(12). 2-3, 4-5, 7-8 (R. 8a)

Refrão : Na’i, Ita hatau ami!!! Repete-se

Na’i, haraik tulun ba, sira be fiar Ita, la iha ona;

La haré ona iha ema sira leet, hahalok fó laran tomak.

Sira bosok malu hela,

Lia bosok barak iha sira ibun,

Ni sira fuan rua-rua hela. Refrão

 

Na’i, halakon ibun sira be bosok,

No nanal sira be ko’alia ho loko an,

Be dehan: “Ami kbiit iha ami nia nanal,

Ami ibun sei tahan ami’

Nia mak ami na’i!”. Refrão

 

Na’i nia liafuan mak mós tebes,

Hanesan osan mutin be nabilan liu.

Na’i, Ita hatau ami,

Tahan ami ba nafatin housi derasaan ne’e. Refrão

 

Aclamação                                                                                                                                                                                              Mc. 9. 6

Refrão : Aleluia, Aleluia!! Repete-se

Lalehan nakloke no rona lian housi Aman: “Ida ne’e mak

Ha’u Oan doben be Ha’u hadomi tebes, imi rona Nia bá”. Refrão

 

Evangelho                                                                                                                                                                                         Mc. 9. 2-13

Na’i Jesus Cristo nia Evangelho nu’udar São Marcos haktuir:

Iha tempo neba, Jesus lori Pedro, Tiago no João, mesak ba foho áas tebes ida. Nia nakfila-an iha sira oin. Nia hena sira sai nabilan, mutin teb-tebes. Ema ida iha rai ne’e la bele halo mutin liu. Hafoin, Moisés ho Elias mosu hodi ko’alia daudaun ho Jesus. Pedro hahu ko’alia hodi dehan ba Jesus: “Mestre, di’ak oinsá ita hôrik ona iha ne’e! Ita halo taka baluk tolu: Ida ba Ita, ida ba Moisés, ida seluk ba Elias”. Tebes, nia la hatene atu dehan sáida lós, tan sira ta’uk teb-tebes. Kalohan ida tun mai, taka tiha sira. Housi kalohan ne’e, rona lian ida: “Ida ne’e mak Ha’u Oan doben be Ha’u hadomi tebes; imi rona Nia ba”. Teki-tekir, hateke hale’u, sira la haré tan ema ida; Jesus mesak hamutuk ho sira.

Tun housi foho mai, Jesus dehan ba sira atu keta haktuir ba ema ida buat nebé sira haré, wainhira Mane Maksoyn la dauk moris hi’as housi mate. Ne’e duni, sira husu ba Jesus nune’e: “Tan sá escriba sira dehan katak Elias tenki mai uluk liu atu hadi’a buat hotu. Maibé, tan sá mak Escritura hateten kona ba Mane Maksoyn katak Nia sei terus maka’as hodi ema hewai Nia ho laran áat? Maibé, Ha’u dehan ba imi katak Elias mai tiha ona, no ema sira halo tiha ba nia nu’udar sira hakarak tuir lolós Escritura haktuir kona ba nia”.

Lia Maksoyn.

Leave a Reply

Your email address will not be published. Required fields are marked *