shadow
Diocese de Dili > NOTÍCIAS > Notícias > Fundação São Paulo hamutuk ho RAEBIA Organiza Evento Kuda Ai-Oan Iha Dare

Fundação São Paulo hamutuk ho RAEBIA Organiza Evento Kuda Ai-Oan Iha Dare

ITE DARE – Fundação São Paulo da Diocese de Dili (FSPDD) hamutuk ho ONG RAEBIA Timor-Leste, organiza evento kuda ai-oan 7100 ba fase dahuluk iha Suco Dare Sukulau. Atividade nee realiza iha sexta feira, 21 fevereiro 2020, iha Comando Laulara, Dare, ho objetivo atu conserva bee matan sira existe iha suco Dare. Participa iha evento nee; Arcebispo de Dili, Sec. Estado Meio Ambiente, Representante husi Ministério Agricultura e Pescas, diretor ONG RAEBIA, Autoridades locais, no bainaca sira husi Embaixador União Europeia, França, Aústria, Bélgica, Itália ho nia comitiva, envolve mos grupo agricultor suco Dare, estudante UNPAZ, colêgio Dare, Paulo VI, Seminário Balide no Maloa, São José Operário, Sacrojes, no mos grupos sira seluk.

Arcebispo de Dili Dom Virgílio do Carmo da Silva, SDB hateten “Atividade kuda ai-oan, ida nee hanesan iniciativa ida nebe hola parte iha projeto serviço hamutuk Fundação São Paulo no ONG RAEBIA nebe hetan apoio ida husi União Europeia. Projeto nee lao tinan rua ona hodi halao reflorestação iha rai Dare. Wainhira ita hateke husi Dili sae mai ida nebe matak nafatin mak rai Dare. Maibe ita hare ameaça boot ida tanba ema hahu loke estrada, população hahu sae mai hela, então ai sira nebe matak nee neneik menus tanba estraga. Tan ida nee, diocese Dili halo plano atu oinsa mak recupera fila fali rai Dare. Tanba nee, obrigação ida ba timoroan hotu atu hatene cuida ai horis no mos hatene kuda ai oan atu rai Timor nee matak no furak nafatin”.

Andrew Jacobs, Embaixador União Europeia iha TL hateten; “Atu combate mudança climática tanto iha Europa no iha mundo sai hanesan prioridade essencial ida ba União Europeia. Presidente comissão Europeia nian foin lalais nee anuncia kona ba acordo verde Europeio ho ninia visão central mak atu halo clima neutra iha tinan 2050”.

Embaixador nee reafirma tan katak, “timoroan sira enfrenta mos consequência negativo husi acontecimento global ida nee mos, mak hanesan temperatura nebe as, bailoron naruk no erosão sira tanto iha área costeiras no mos iha foho sira. hanesan ita bele hare experiência iha Dare nee rasik. Nee duni, Ita precisa halo adaptação atu nunee comunidade sira bele desemvolve sira nia moris. Ida nee mak objetivo projeto União Europeia nian no implementa hela husi Fundação São Paulo. Reflorestação sei protege rai ho kuda ai-oan ho tipo diferente hodi fo rendimento ba comunidade ita iha futuro”.

Pe. Augusto do Carmo Martins, Presidente Conselho Administrativo e Administrador Geral FSPDD iha nia discurso hateten “Objetivo iha evento kuda ai-oan iha fatin ida nee atu fo hanoin nafatin mai ita hodi hatene ita nia obrigação atu serviço hamutuk hodi recupera fila fali ita nia meio ambiente perante mudança climática nebe ita koko no sente ona iha ita nia moris. Evento ida nee nudar evento abertura ba ita nia actividade kuda ai-oan. Nunee Fundação São Paulo no ONG RAEBIA Timor-Leste sei halo calendário ida liu-liu iha tempo Quaresma nian atu grupo ida-idak iha ita nia bairro laran, iha ita nia Paróquia no iha diocese laran sei halo acção quaresmal hakat mai kuda ai-oan iha Dare molok ita nia udan ben menus”.

Iha fatin hanesan Sec. Estado Meio Ambiente Deométrio do Amaral de Carvalho iha ninia disrcurso mos hateten “Ohin ita mai iha fatin nee ita consegue unifica ita nia posição atu salva ita nia casa comum. Atu salva ita nia casa comum ita tem que halibur duni kbiit hotu iha diversidade política, diversidade raça, cultura. Tanba ida nee ita hotu-hotu iha responsabilidade boot tebes atu halo acção hanesan nee. Ohin ita hotu iha direito atu hemu bée mos, maibe keta haluha bée mos nebe ita hemu nee ita empresta husi geração sira. Tanba ida nee ita nia responsabilidade atu protege bée matan sira, protege rai nia buras atu iha futuro geração sira nafatin bele hetan bée mos no bele iha rai nebe fertil hodi produz ai-han ba sira. (Angelson)

Leave a Reply

Your email address will not be published. Required fields are marked *