shadow
Diocese de Dili > NOTÍCIAS > LETURA DIÁRIA > Segunda – Feira, VII Semana Tempo Comum (ANO A)

Segunda – Feira, VII Semana Tempo Comum (ANO A)

Primeira Leitura                        Tg. 3. 13-18

Lia housi São Tiago nia Surat:

Doben sira: Iha imi leet, sé mak matenek no hatene? Ho nia moris di’ak, halo nia hatudu nia hahalok ho laran maus matenek nian. Maibé imi laran moras ba malu karik no hakarak buat boot sira iha imi nia laran, keta gaba an hodi bosok. Matenek hanesan ne’e la mai housi Lalehan; metenek ne’e mundo ne’e nian, isin nian, diabo nian. Basá wainhira ema hakarak buat boot ho laran moras no hanoin de’it nia-an, susar boot no hahalok áat sira sei mosu mai. Maibé matenek housi Lalehan, uluk knana’in, mak mós, hadame malu, laran maus, hanoin tuir buat nebé lós, laran luak no fó fuan di’ak barak, ko’alia lolós no la halo ema bilan. Sira nebé buka dame kari ai-hun nebé sei fó fuan justice nian.

Maromak Futar Lia.

 

Salmo Responsorial                                                                                                                                Sal. 18(19). 8, 9, 10, 15 (R. 9ª)

Refrão : Na’i nia ukunfuan lós tebes, sira haksolok fuan!!! Repete-se

Na’i nia lei lós tebes,

Hamoris ema nia laran;

Na’i nia haruka metin tebes,

Fó matenek ba ema haraik-an sira. Refrão

 

Na’i nia ukunfuna lós tebes,

Sira haksolok fuan.

Na’i nia lei sira mós tebes,

Leno ita nia matan. Refrão

 

Hamtauk Na’i, mós tebes,

Hela metin tinan-ba-tinan.

Na’i tesi lia ho lialós tebes;

Nia hanoin sira hotu mesak lós duni. Refrão

 

Simu ba Na’i, liafuan sira housi ha’u ibun,

No ha’u nia fuan nia nabotu,

Be ha’u hasa’e iha Ita futar oin;

Na’i, ha’u nia mahein no ha’u nia Maksoyn. Refrão

 

Aclamação                                                                                                                                                                                        2 Tm. 1. 10

Refrão : Aleluia. Aleluia!! Repete-se

Jesus Cristo, ita nia Maksoyn, halako mate;

Nia halo moris nabilan housi Evangelho. Refrão

 

Evangelho                                                                                                                                                                                      Mc. 9. 14-29

Na’i Jesus Cristo nia Evangelho nu’udar São Marcos haktuir:

Iha tempo nebá, Jesus, Pedro, Tiago no João, tun daudaun housi foho. To’o tiha iha fatin nebé escolante sira seluk hela ba, sira haré ema lubun boot hale’u hela sira, no escriba sira haksesuk malu ho sira. Wainhira sira haré Jesus, hot-hotu hakfodak halai ba simu Nia. Jesus husu ba sira: “Imi haksesuk malu kona ba sá lós?” Ema ida housi lubun ne’e, hatan ba Nia: “Mestre, ha’u lori ha’u nia oan mane ne’e mai Ita. Nia iha espírito nunuk iha laran. Wainhira espírito ne’e káer nia, nia sóe nia-an ba rai, kabén sai housi nia ibun, nia ruun nehan no isin sai tós. Ha’u husu ba Ita Nia escolante sira atu duni sai nia, maibé sira la la bele”.

Jesus lia tun ba sira dehan: “Imi, ema fiar laek; to’o wainhira mak Ha’u sei hôrik ho imi? To’o wainhira lós mak Ha’u sei tahan imi? Lori nia mai”. Sira lori labarik ba Jesus. Wainhira espírito áat haré Jesus, nia doko maka’as labarik ne’e to’o nia monu ba rai, kabén mutin sai housi nia ibun. Jesus husu ba nia aman: “Hori wainhira mak buat ne’e mosu ba nia?” Nia aman hatan: “Hori kiik kedas. Dala barak espírito áat ne’e sóe nia ba ahi no ba wé laran atu halo áat nia. Maibé, Ita bele karik halo buat ruma, hanoin ami no tulun ami”. Jesus hatan ba nia: “Ita bele karik?!.. Buat hotu bele de’it ba ema nebé fiar”. Tuir mai, labarik nia aman hahu hateten ho lian maka’as: “Ha’u fiar duni! Tulun ha’u nia fiar kiik ne’e”. Wainhira Jesus haré ema barak nebé hakbesik Nia, Nia siak espírito áat: “Espírito nunuk no diuk, Ha’u haruka ó sai housi nia, keta fila fali tan ba nia”. Espírito áat doko fali labarik ne’e, hakilar maka’as hodi husik nia. Labarik monu ba rai hanesan mate ida. Nune’e, ema barak dehan katak nia mate ona. Maibé, Jesus káer nia liman no halo nia hamriik, to’o nia bele hamriik mesa-mesak. Wainhira Jesus tama ona iha uma laran, escolante sira husu ba Nia: “Tan sá ami la bele duni sai nia?” Jesus hatan ba sira: “Espírito hanesan ne’e, ema bele duni sai hodi de’it hamulak”.

Lia Maksoyn.

Leave a Reply

Your email address will not be published. Required fields are marked *