shadow
Diocese de Dili > NOTÍCIAS > Notícias > CARTA PASTORAL

CARTA PASTORAL

QUARESMA : TEMPO ATU HALO CONVERSÃO

 

Reverendos/as Padres, Madres,

Religiosos/as no Sarani doben sira

Mak Na’i Jesus Cristo Hadomi

 

“Ita mate tiha ona ho Cristo, ita bele fiar katak ita sei moris duni hamutuk ho Nia “(Rm 6,8).

 

 PRIMEIRA PARTE

1.Sentido Quaresma ba ita ema sarani

Ita sei hanoin hetan kona ba hau nia Carta Pastoral Quaresma nian iha tinan uluk, 2019, nebé koalia kona ba sentido loron há’at-nulo. Ne’e nu’udar símbolo ida, hodi halo preparação diak liu no naruk liu ba festa boot liu hot-hotu ba ita sarani, basá ita prepara ita an atu celebra Nai Jesus Cristo nia terus, nia mate no moris hias housi mate, nebé hanaran mistério Páscoa. Sa ida mak ita sarani sei halo iha tempo Quaresma ne’e atu prepara didiak ita an? Tuir mai, ita sei hahu ita nia catequese kona ba sentido Quarta-feira Cinzas, domingo sira iha tempo Quaresma  no  sei ramata ita nia catequese iha celebração boot liu kona ba Nai Jesus Cristo nia terus, Nia mate noNia  moris hias. No ida be ikus ne’e nu’udar mensagem central ita nia fiar sarani.

 

  1. História kona Quarta-feira Cinzas

Cinzas eh ahi-kdesan ne’e prática ida nebé mai housi kedas Antigo Testamento. Nune’e ita bele hare exemplo balun hanesan: profeta Jeremias nebé dehan: “Ó oan, hau nia povo hatais karol ba, tur iha ahi-kdesan. Hatais luto nu’udar oan mesak…” (Jer 6,26). Iha fatin seluk, Nai dehan tan:“ Taka imi an ho ahi-kdesan, bibi atan sira, basá to’o tiha ona loron imi atu mohu hotu ona” (Jer 25,34). No iha livro profeta Jonas dehan: “Ema sira iha Nínive fiar duni Maromak, sira halo jejum no hatais karol housi boot too kiik. Noticia ne’e to’o iha liurai Nínive nia tilun, ne’e duni, nia sai housi nia fatin aas, hasai tiha nia hatais furak, taka an ho karol no tur iha ahi-kdesan laran” (Jn 3,5-6).

Ita hare katak Cinzas tuir sentido citação sira be temi tiha ona iha leten, hodi liga ba sarani sira uluk liu nia moris, la iha hanoin ruma nebé koalia kona ba Quaresma. Maibé nu’udar prática ida be Kreda local sira halao nu’udar sinal excomunhão ba sarani sira housi sira nia família no comunidade tamba sira halo sala público no sala boot, hanesan: apostasia (ema sarani husik nia fiar oficialmente), heresia (nega doutrina Kreda nu’udar dogma), crime no adultério. No iha século VII, prática excomunhão ne’e habelar ba Kreda local barak hodi hahu ho rito público ida iha Quarta-feira Cinzas. Uluk knanain exige housimaksalak sira confessa uluk sira nia sala mesa-mesak, hafoin, sira  apresenta sira an ba bispo sira no hakerek publicamente sira naran iha lista ema sira be halo penitência, hofoin prepara sira an atu hetan absolvição iha Quinta-feira-Santa.

Iha sorin seluk, sira sai housi comunidade nebé sira hela ba, hodi banati tuir Adão no Eva, nebé Maromak duni sai housi Paraíso. Sira hela ketak iha fatin luan ida iha liur hodi hatudu katak sira hadera-an. Prática ne’e, atu hanorin ita ema sarani katak sala haketak ema ho Maromak, hocomunidade sarani no ho nia familia. Sira hahu hatais karol no usa ahi-kdesan nu’udar penitente público, basá sira halo sala be ema hotu hatene. Sira la han aihan balun, la hemu álcool, la haris, la tesi sira fuk no husik sira hasan-rahun sai naruk. Iha Diocese balun prática ne’e  bele lori tinan ida eh naruk liu tan depende ba bispo.

Wainhira tempo ne’e lao dadaun ba oin to’o ohin loron, Kreda celebra Quarta-feira cinzas atu hahu loke tempo Quaresma, iha mundo tomak no mos iha loron ne’e sarani sira halo Jejum no Abstinência. Prática ne’e la todan ona hanesan iha tempo uluk liu, maibé ita moris tuir deit nia espírito, katak buat be folin liu mak halo mudança ba ita ema ida-idak nia moris eh “halo conversão” hodi lao tuir Evangelho nia hanorin, nu’udar preparação atu bele celebra diak liu Santa Páscoa.

           Ne’e duni, iha Quarta-feira Cinzas, ita hotu simu ahi-kdesan iha ita nia re’en-to’os no Nailuluk hato’o liafuan hirak ne’e: “ Hanoin ba katak, ó ne’e  rai-rahun no ó sei fila ba rai” (Gn 3, 19). Eh ita rona mos liafuan hirak housi Evangelho São Marcos nian: “Hakribit imi salan, fiar iha Evangelho” (Mc 1,15). Mensagem ba ita ema sarani mak Kreda hakarak atu ita hatene didiak katak  ita ne’e nu’udar sala na’in, ho atitude haraik-an, hakarak mate bahahalok sira be la tuir Nai Maromak nia hakarak, katak ukunfuan domin, halo diak ba ema seluk liu housi ita nia “’obra de caridade”. Ne’e duni, ita hakas an  atu halo funu hasoru sala sira  iha Quaresma nia laran, no laran metin iha Maromak nia laran luak, basá nia  la hakarak ema maksalak nia mate, nune’e ita bele moris ba vida foun ida hatumutuk ho Maromak wainhira Páscoa liu tiha.

Concreto liu, Quaresma ne’e, oportunidade especial ida nebé Kreda fo mai ita hotu  atu halo renovação ba ita nia moris  iha programa tolu nebé ita  rona tiha ona iha Evangelho São Mateus (cf. Mt 6, 1-6. 16-18). Uluk liu, HALO HAHALOK DIAK/CARIDADE. Daruak: halo ORAÇÃO no ikus liu: JEJUM, eh PENITÊNCIA.

 

  1. Primeiro domingo: Jesus halo Penitência

            Iha primeiro domingo Quaresma, ita rona katak Nai Jesus hadook an tihaba rai-fuik maran iha loron ha’atnulu no kalan ha’atnulu nia laran hodi halo penitência, la’os atu hamos nia sala, tamba nia sala laek, maibé nu’udar preparação naruk  atu hahu nia misaun foun salvação nebé Aman Maromak tau iha nia kabaz atu halao iha nia moris nu’udar ema. Hanesan ita rona iha primeira leitura katak ita nia bei-ala sira uluk liu, Adão no Eva halo tiha sala tamba sira hanoin deit an  hodi hakarak sai boot hanesan Maromak , nune’ehadook an tiha housi Maromak no sira la soi ona atu hola parte iha ksolok rohan laek ho Maromak. Maibé Jesus Cristo, Maromak Oan mai iha mundo liu housi nia moris, hatudu se mak Maromak ba ema. Katak Maromak ne’e domin no laran luak no nia domin a’as liu Nia hatudu iha kruz leten, hanesan São João dehan: “ La iha domin nebé bo’ot liu, sela’e ida be saran nia moris ba nia belun sira” (Jo 15,13 ).Ne’e duni ita nia bei-ala sira uluk nian lori mate mai mundo, maibé Jesus lori fali moris mai ita.

Iha rai-fuik maran Nia hetan tentação oin tolu kona ba ema nia necessidade básica sira (aihan, poder no riku-soyn)  maibé Nia la monu ba tentação ne’e ida tambá Nia halo tuir deit Nia Aman lalehan nia hakarak.Ho ida ne’e Jesus hakarak tau Aman lalehan nu’udar centro baNia moris tomak no centro ba Nia Missão iha mundo.

 

  1. Segundo domingo: Jesus nakfilak-An

Iha segundo domingo Quaresma, Nai Jesus sae ba foho Tabor ho apóstolo nain tolu: Pedro, João no Tiago. Iha foho leten ne’e, Nia nakfilakAn no apostolo sira koko ksolok no hakmatek lalehan nian. Tamba ne’e mak Pedro ibun lalais dehan ba Jesus atu halo tenda tolu (ida ba Moisés, ida ba Elias no ida ba Jesus) no sira hakarak hela deit ona iha foho leten ne’e. Tekil-tekil, sira rona lian ida dehan: “Ida ne’e, Hau nia Oan doben tebes, nebé Hau tau Hau domin. Imi rona Nia ba” (Mt 17,5). Jesus bandu sira atu labele fo sai sira nia experiência furak no ksolok ne’e wainhira Nia seidauk moris hias housi mate. Nune’e,Nia atu hanorin sira katak atu koko moris rohan laek, hanesan experiência be sira koko ona iha foho leten ne’e, sira precisa tuir Nai Jesus nia ain-fatin: terus, mate no ikus mai moris hias. Ne’e atu dehan katak cruz  ne’e nu’udar dalan ida atufo moris, maski nu’udar escândalo ba ema fiar laek sira, maibé dom no salvação ba ema fiar nain sira, basá Jesus manan tiha ona mate.

Ne’e duni, Kreda husu ba ita ema sarani ida-idak atu fiar makas hodi lao tuir Maromak nia hakarak, hanesan aman Abraão, nu’udar ita nia modelo fiar-nain hodi lao tuir deit Maromak nia plano. Halo tuir Maromak nia hakarak ba ita ema sarani katak, ita precisa fo  sasin kona ba ita fiar liu housi ita nia hahalok diak iha família laran, iha ita nia relação ho maluk sira no mos iha ita nia vida social, política no dalan oi-oin hodi hatudu katak ita ne’e ema sarani duni hodi moris tuir valor Evangelho.

 

SEGUNDA PARTE

Tempo Quaresma, iha Igreja primitiva (iha tempo Kreda hahu moris), seluk fali housi tempo ida penitência no conversão nian, tempo Quaresma sai mos tempo ida hodi prepara catecúmeno sira nebé sei simu batismo, iha Sábado Santo, nebé sei hala’o iha kalan Vigília Pascal. Tamba ne’e, iha domingo tolu, molok tama semana santa, mosu tema batismal ho simbolo sira hanesan: We, iha diálogo ho feto Samaritana, (halakon hamrook no fó moris); Roman, iha cura ba ema matan delek (Roman fiar);  Vida (moris), iha fó moris ba Lázaro  nebé mate hakoi tiha loron tolu (Vida foun ho Cristo Ressuscitado):

 

  1. Terceiro domingo: We halakon hamrook no fó moris

Jesus nia pedido ba feto Samaritana: “fo we mai hau atu hemu” (Jo 4, 7) nebé hatoo iha liturgia domingo ba datoluk Quaresma nian ne’e hatudu paixão boot Maromak nian ba ema hotu-hotu no Nia hakarak hamoris iha ita sarani ida-idak nia fuan hakarak (desejo) “hamrook”  ba dom (karan) “we nebé naksulin ba moris rohan laek” (Jo 4, 14): ida ne’e mak dom (karan) Espírito Santo, nebé halo sarani sira sai “ema sira nebé adora lolós” nebé bele reza ba Aman Maromak “iha espiritu no lialós” (Jo 4, 23). Housi diálogo entre Jesus no feto Samaritana ne’e, sira too ba compreensão mutua, no feto samaritana ne’e too descobre katak nia hamrook ne’e klean liu fali hamrook bai-bain nebé Jesus deit maka bele halakon nia hamrook ne’e: “Na’i, fó we ida ne’e mai hau atu hau keta hamrook tan, no hau lalika mai tan kuru we iha ne’e.” (Jo 4, 15).  We ida ne’e deit mak halakon ita nia hamrook ba buat diak sira, halakon ita nia hamrook ba lialos no halakon ita nia hamrook ba buat furak nian! We ida ne’e deit, Maromak Oan fo ona mai ita, nebé naksulin rega rai-fuik-maran klamar nebé la-hakmatek no insatisfeita, “wainhira seidauk hakmatek iha Maromak”, tuir liafuan furak sira Santo Agostinho nian.

 

  1. Quarto domingo: Roman Fiar nian hodi hare ba Jesus

Domingo ema matan delek housi-hahu-moris kedas, aprezenta Cristo nu’udar roman mundo nian. Evangelho fanu ita ida-idak ho pergunta: “O fiar Mane Maksoin?” “Hau fiar, Na’i” (Jo 9, 35.38). Ho ksolok, ema matan-delek-hahu housi moris ne’e hatán ba pergunta Jesus nian ne’e, hodi ema-fiar-nain hotu nia lian, hodi ita hotu nia lian. Nune’e, milagre cura ema matan-delek-hahu-moris ne’e sai sinal nebé Cristo hakarak loke ita nia matan fuan nian atu ita bele hare moos no atu ita nia fiar sai klean liu tan no ita bele reconhece iha Nia ita nia Maksoin mesak deit no la iha seluk tan. Jesus rasik dehan: “Wainhira Hau sei iha mundo, hau mundo nia naroman” (Jo 9, 5). Loos, Nia leno halo naroman nakukun sira (egoismo, orgulho, autosuficiência) ita nia moris nian atu ita haré no hatene katak ida ne’e lori ita se’es housi Maromak, no buka halo conversão hodi moris nu’udar “oan naroman nian” nebé buka pratica obra sira Maromak nian atu nune’e hakiak no hamoris iha ita nia moris hahalok laran luak, justiçano lialós nian (cf. Ef 5, 8 – 14).

 

  1. Quinto domingo: Vida foun iha Cristo Ressuscitado

Wainhira, iha domingo ba dalima, Evangelho haklaken mai ita kona ba moris-hias Lazáro nian, ida ne’e lori ita ba hasoru mistério badala-ikus ita nia existência nu’udar ema: “Hau mak Moris-Hias no Moris… O fiar ne’e?” (Jo 11, 25 – 26). Ba comunidade sarani nian, ida ne’e sai momento ida atu ita hamutuk ho Marta, ho sinceridade, tau ita nia esperança tomak iha Jesus Nazaré: “Loos, Nai, hau fiar katak Ita mak Cristo, Maromak nia Oan, nebé mak mai iha mundo” (Jo 4, 27). Sai ida deit (comunhão) ho Cristo iha moris ida ne’e prepara ona ita-an hodi supera limite sira mate nian, hodi nune’e bele hetan moris rohan laek iha Nia. Tamba iha batismo, ita mate ho Cristo nebé mate, no Espírito Aman Maromak nian nebé halo Jesus Moris-hias sei haraik moris-foun mai ita (cf. Rm8, 8 – 11).

Fiar iha moris hias mate sira nian no iha esperança ba moris rohan-laek, loke ita nia matan ba sentido ikus existência ita nian: Maromak hakiak ema ba Moris-Hias no ba Moris, no, lialos ida ne’e fó dimensão autêntica no definitiva ba história ita ema nian, ba ema nia existência pessoal, ba nia moris social, ba cultura, ba politica no ba economia. Haketak an eh taka an housi/ba naroman fiar nian ne’e futuro universo tomak sei taka an iha rate nakukun la iha futuro, la iha esperança. Ida ne’e atu hatete katak ema ida wainhira sai sarani nia hetan ona kna’ar buka meios atu promove vida eh pro-vida (hakiak diálogo hodi evita conflito hodi nune’e too compreensão harii unidade, promove caridade fraterna hodi tulun ema nebé precisa, sst).

 

Conclusão

Ita nia percurso quaresmal hetan nia realização iha Triduo Pascal, liu-liu iha vigilia boot kalan Sábado Santo nian. Iha kalan Sábado Santo ne’e ita hafoun iha nia promessa batismal, ita afirma fali katak Cristo mak Nai ita nia Naroman noMoris, moris nebé Maromak rasik hatoo mai ita wainhira “ita moris fali housi We no Espírito Santo”no ita confirma fali ita nia compromisso firme hodi hatan iha ação de graças hodi nune’e ita sai Nia eskolante sira. 

Nune’e ita haré katak liturgia domingo tolu ikus Quaresma nian, molok atu tama semana santa, buka hatan ba pergunta: “Oin sa ema ida bele sai cristão eh processo oin sa ema idabele sai sarani?” Ho lian seluk baseia ba ita nia tema pastoral Arquidiocese tinan 2020 nian: “Oin sa mak ema sarani ida bele sai “Cristão Eucarístico”? Resposta ba pergunta ne’e mak: Ema ida atu sai Cristão eh sarani uluk knanain tenki simu dom Maromak nian iha we moris graça nian, batismo, ho naroman ida (Espírito Santo) no ho moris hias ba moris lolós nian.

Ita la’o tuir tiha ona caminhada Jesus nian housi Nia ba hadook-AN iha rai-fuik maran, Nia sa’e ba foho Tabor, Nia hasoru malu ho feto Samaritana iha poço Jacob nian, tuir fali Nia fo naroman ba matan-delek bele hare no ikus fo moris ba Lázaro nebé mate. Caminhada Jesus nian ne’e tenki fanu ita sarani atu, iha tempo Quaresma nia laran, buka haka’as an hodi mate ba ita nia an (sa mak sai obstáculo ba ita hakbesik ba Maromak no ba maun-alin sira) hodi nune’e bele hetan moris foun hamutuk ho Cristo nebé moris hias housi mate.

 

Paço Episcopal, 22 de Fevereiro de 2020

Iha festa Cátedral de São Pedro

 

(Mons. Virgílio do Carmo da Silva,SDB)

Arcebispo Metropolita

One comment on “CARTA PASTORAL

  1. Ir. Maria Brigida de Sousa, FMA

    Grasa boot tebes tamba bele hetan no tuir mos Arcebispo nia mensagem no surat pastoral liu husi meio ida nee.

Leave a Reply

Your email address will not be published. Required fields are marked *