shadow
Diocese de Dili > NOTÍCIAS > Notícias > QUARESMA: CONVERSÃO MOTIVA ITA ATU HALO CARIDADE HO HARAIK AN

QUARESMA: CONVERSÃO MOTIVA ITA ATU HALO CARIDADE HO HARAIK AN

DCAD – Iha dadalia ida ho Pe. Justino Tanec nebe haknar-an hanesan Liturgista iha Ariquidiocese Metropolitan de Dili no Decano Filosofia iha Instituto de Filosofia e Teologia (ISFIT) Dom Jaime Garcia Goular Fatumeta Dili, (19/02) kona ba oinsa prática sira nebe atu lori ita prepara diak liu tan ba Festa Páscoa.

“Litúrgicamente, comemoração nee ita celebra fil-fila (repete) tinan-tinan. Maibé, wainhira ita reflecte klean hosi fuan laran, celebração cinzas nee nudar momento oportuno atu ita hatene-an; ita mai hosi nebe no sei ba nebe,” dehan Pe. Justino Tanec.

Pe. Justino Tanec haklean tan katak; “ita hahu ita nia quaresma ne’e ho quarta-feira cinzas; ita tau sinal oan ida ou sinal cruz ho ahi kdesan iha ita nia rentos. Pelo menos Santa Igreja hanoin iha sentido haat husi Ahi Kdesan nee rasik; I) ita ema iha ita nia masa Berlaku, ita expire, ita caducidade, ita ema fraco. Nee katak loron ida ita sei fila fali ba rai. II) Penitência; inportância husi penitência nee rasik mak ita nia fuan hodi muda ita nia hahalok, ita nia hanoin. Tanba ita simu Ahu kdesan hatudu duni katak ita iha converção iha penitênçia ida ne’e. III) Hatudu ita nia Oração Intensivo; Uluk ema sira nebe atu reza la para, sira tau Ahi kdesan iha sira nia rentos. Ne’e katak sira halo oração intensivo. IV) Ressurreição; Maske ita iha caducidade, iha limitação, maibe ita nia isin ne’e iha folin. Tanba ne’e mak Jesus Cristo mate hodi salva ita nia isin no klamar hetan moris foun”.

Liu tan nee, Pe. Justino Tanec haklean tan; “Tempo Quaresma nudar tempo oportuno atu feto eh mane hetan convite hodi reflecte kona ba experiência moris nudar Cristão (Católico). Tempo Quaresma durante loron haat nulu (40 dias) exige atitudes importante 3 hanesan;  esmola, jejum ho oração bebeik. Esmola significa fo/fahe buat balu husi saida mak ita hetan iha mundo nee, tan lalaok nee lori ita sees husi hahalok kaan ten (avareza). Jejum nudar abstinência ba alimentos (hahan) ho bebidas, ho vício toman aat sira seluk hanesan fuma cigarro, droga, aborto, prostituição, tráfico humano no jogos  ilícito sira.  Oração hafurak liutan lalaok esmola ho jejum: (oração com o coração). Nee significa ita nia oração precisa mai husi fuan laran”.

Tuir Santa Igreja Católica ninia hanoin, iha atitude tolu hosi sentido Jejum, Oração no Esmola. Hosi prática tolu ne’e, iha ninia primeiro sentido; ‘atu lori ita no prepara didiak ita nia fiar ba Festa Páscoa’. Segundo sentido hosi atitude tolu ne’e; ‘hanesan mandamento ida’. Terceiro sentido hosi atitude tolu ne’e; Exteriorização ou manifestação hosi penitência interior. katak halo Jejum, oração no fo esmola, ida ne’e hatudu ita hot-hotu halo conversão Interior, exterior no Espiritual nian.

Pe. Justino Tanec haktuir mos tan katak “Catecismo Igreja Católica No. 1438 pelo menos hato’o prática balun oinsa ita halo Jejum no Abstinência. Prática liu husi exercício Espirituais. Pelo menos durante Jejum nia laran ita intensiva ita nia Exercício sira hodi aprofunda ita nia vida Espiritual. Nue’e mos liu husi Liturgia Penitência nian hanesan Confessa atu nune’e bele reconhece ita nia fraqueza no litimação hodi nune’e ita hametin ita nia confiança iha Maromak. katak ita Maromak mak ita hetan perfeição no hetan kbiit. Iha mos prática sira seluk hanesan halo Peregrinação hanesan penitencia ida ba Santuário sira ho voluntariamente.

Jornalista : Alin/Marta

Editor: Angelson Soares

Leave a Reply

Your email address will not be published. Required fields are marked *