shadow
Diocese de Dili > NOTÍCIAS > LETURA DIÁRIA > Terça – Feira, VII Semana Tempo Comum (ANO A)

Terça – Feira, VII Semana Tempo Comum (ANO A)

Primeira Leitura                            Tg. 4. 1-10

Lia housi São Tiago nia Surat:

Doben sira: Tan sá iha funu, tan sá imi istori malu? La’os tanba imi nia hakarak áat halo funu iha imi laran? Imi hakarak buat ida, maibé imi la hetan nia, tan ne’e imi halo funu. Imi la iha, basá imi la husu. Imi husu, maibé imi la simu, basá imi husu la lós: atu usa ba imi nia hakarak áat.

Ema laran áat! Imi la hatene katak wainhira imi habelun ho mundo, imi halo funu hasouru Maromak? Ne’ duni, ema nebé hakarak habelun mundo halo nia an Maromak nia funu baluk. Imi hanoin katak Escritura hateten leet de’it wainhira nia dehan, “Maromak hakarak ba Nia mesak de’it Espírito nebé Nia tau iha ita nia laran”. Maibé Nia fó graça barak liu, tan ne’e mak Escritura dehan, “Maromak la gosta ema loko an, maibé fó graça ba ema nebé haraik an”. Ne’e duni, hakru’uk ba Maromak. Halo funu hasouru diabo no nia sei halai dook housi imi. Hakbesik ba Maromak, no Nia sei hakbesik imi. Hamós imi nia liman, imi ema maksalak sira; hamós imi nia fuan, imi ema laran makerek sira. Hakribi imi nia sala hodi tanis ba. Halo imi nia hamnasa nakfila ba mataben, no imi nia laran haksolok ba laran nakraik. Haraik an ba iha Maromak futar oin; Nia sei foti imi.

Maromak Futar Lia.

 

Salmo Responsorial                                                                                                       Sal. 54(55). 7-8, 9-10a, 10b-11a, 23 (R. 23a)

Refrão : Saran ba Na’i, ó nia lalaok sira no Nia sei tulun ó!!! Repete-se

Ha’u dehan: Ha’u iha karik liras,

Hanesan manu falur sira atu semo no hasouru hakmatek,

Ha’u sei halai ba to’o dook

Hodi hela iha rai fuik maran. Refrão

 

Ha’u sei halai hasouru heli-an fatin,

Housi ani fuik no laloran boot.

Na’i, halo sira sai rungu-ranga,

Halo sira lian hafahe malu. Refrão

 

Basá ha’u haré de’it iha cidade,

Lia la tuir malu no oho malu;

Loron kalan sira haleu muro sira,

Iha laran ukun injustice no laran makerek. Refrão

 

Saran ba Na’i, ó nia hahalok sira:

Nia sei tulun ó,

Basá, Nia la husik ema laran lós

La’o sala dalan ba nafatin. Refrão

 

Aclamação                                                                                                                                                                                           Gal. 6. 14

Refrão : Aleluia. Aleluia!! Repete-se

Ha’u gaba-an de’it iha Na’i Jesus Cristo nia Cruz.

Housi Na’i nia cruz, mundo mate ona mai ha’u, no ha’u mate ona ba mundo. Refrão

 

Evangelho                                                                                                                                                                                      Mc. 9. 30-37

Na’i Jesus Cristo nia Evangelho tuir São Marcos:

Iha tempo nebá, Jesus ho nia escolante sira hákat liu ba Galileia sorin. Nia lakohi atu ema ruma hatene, basá, Nia hakarak hanourin Nia escolante sira. Nia lia tun ba sira, dehan: “Ema sei saran mane maksoin ba ema áat sira liman. Ema áat sira sei oho Nia, maibé, Nia mate tiha, liu loron tolu, sei moris hi’as”. Jesus nia escolante sira la hatene lia hirak ne’e katak s’a, maibé, sira ta’uk hela atu husu Nia.

To’o tiha iha Cafarnaum, tama iha uma laran, Jesus husu ba sira: “Imi haksesuk malu kona ba saida iha dalan?” Maibé, sira nonok hela, basá, sira haksesuk malu kona sira ida nebé mak boot liu. Nune’e, Jesus tur tiha, bolusira na’in sanulu resin rua hodi dehan ba sira: “ se hakarak boot liu sira seluk, sei sai ikus liu hotu, sei sai hot-hotu nia atan”. Jesus kaer tiha labarik oan ida, tau tiha nia iha sira nia klaran, hako’ak tiha nia hodi dehan ba sira: “Ema nebé simu labarik oan ida hanesan ida ne’e hodi Ha’u Nia naran, nia simu Ha’u-An rasik. Ema nebé simu Ha’u, nia la simu Ha’u, maibé, simu ida nebé haruka Ha’u mai”.

Lia Maksoyn.

Leave a Reply

Your email address will not be published. Required fields are marked *