shadow
Diocese de Dili > NOTÍCIAS > REFLEXÃO > CATÓLICO BANATI JESUS NIA JEJUM

CATÓLICO BANATI JESUS NIA JEJUM

Reflexão & Leituras Primeira Domingo QUARESMA /Ano A/2020

Gén 2,7-9; 3, 1-7, Rom 5, 12-19, Mat 4,1-11

 

Primeira Leitura                           Gén. 2, 7-9; 3, 1-7

Lia husi Livro Génesis:

Na’i Maromak halo ema ho rai rahun. Nia huu íis ida, moris nian, husi ema inus; nune’e’e, ema sai buat moris ida. Na’i Maromak kuda toos ida iha Edén, iha loron-sae; Nia tau, ema nebé Nia halo, iha nebá. Maromak halo moris ai-horis oi-oin, fuan mesak furak, di’ak atu han; Ai-horis moris nian iha toos klaran no mos ai-horis hatene di’ak no hatene aat nian. Balada sira hotu nebé  Na’i Maromak halo, samean mak laran kman liu atu bobar. Samean dehan ba feto: “Tebes ka? Maromak dehan ba imi: imi labele han ai-fuan hirak iha toos laran ne’e?” Feto hatan ba samean: “Ami bele han ai-fuan hirak iha toos laran. Maibé, kona ba a i-fuan nebé iha toos klaran, Maromak dehan mai ami: imi keta han nia; kona de’it mos labele. Keta halo imi mate”. Samean hatan ba feto: “Lae ida! Imi sei la mate. Maromak hatene katak, wainhira imi han ai-fuan ne’e, imi nia matan nakloke, imi sei sai hanesan Maromak, imi hatene di’ak no aat”. Feto haré ba ai ne’e nia fuan di’ak tebes atu han, matan kan, ai-di’ak ida atu fo matenek. Nia ku’u ai-fuan ba han; hafoin nia fo ba nia laen nebé hamutuk ho nia; nia laen mos han. Sira Na’in rua nia matan nakloke, sira hatene katak, sira nia isin tanan. Tan ne’e sira suku ai figueira tahan, hodi taka-an.

Maromak Futar Lia.

 

Salmo Responsorial                                                                                                                        Sal. 50 (51), 3-4. 5-6a. 12-13. 14-17

Refrão : Na’i, ami sala! Hanoinami!!! Repete-se

Na’i, sadia ami, tan Ita laran di’ak,

Tan Ita laran luak, kasu ami salan;

Hamós hau nia hahalok aat,

Kasu hau nia salan hotu. Refrão

 

Hau fiar ba hau salan,

Hau salan hetan nafatin iha hau oin

Na’i, hau sala hasoru Ita,

Hau halo sala iha Ita oin. Refrão

 

Maromak, haraik neon founmaihau,

Halo hau klamar nabilan.

Keta soe hau husi Ita futar oin,

Keta hadook hau husi Ita neon. Refrão

 

Segunda Leitura (Format Longa)                                                                                                                                      Rom. 5, 12-19

Lia husi São Paulo nia surat ba sarani sira iha Roma:

Maun-alin sira: Salan tama iha mundo hodi ema ida de’it; husi salan tam mate. Nune’e’e, mate tama iha ema hot-hotu, basá, ema hotu sala. Hori uluk too Moises nia Lei, mundo iha salan. Maibé, Lei ida la iha karik, ema nebé halo salan, la sala. Maibé, mate iha kedas ona, husi Adão too Moises, ba mos sira nebé la sala hanesan Adão; Adão, Jesus Cristo nebé atu mai ne’e nia ilas. Maibé, tulun la simu leet hanesan sala. Tan ema ida de’it nia salan, ema barak hetan aat; maibé, Maromak nia graça liu tan fali: ho ema ida de’it – Jesus Cristo, nia tulun ema wain tebes hetan di’ak. Tulun ne’e la hanesan salan ema ida de’it nian:salan mesak ida ne’e, lori ema ba terus; maibé, tulun simu leet, nebé mai tuir salan barak, lori ba di’ak. Tan ema mesak ida nia salan, mate tama husi ema mesak ida ne’e; liu tan fali; ema sira nebé simu graça barak no tulun justiça nian, sei hetan moris husi ema ida mesak, Jesus Cristo. Tan ema ida mesak nia salan, susar mai too hotu; nune’e’e mos, hodi hahalok di’ak ema mesak ida nian, ema hotu hetan di’ak nebé fo moris. Tan ema ida mesak la kohi halo tuir, ema barak sai maksalak; nune’e’e mos, tan ema ida mesak halo tuir, ema barak sai lós.

Maromak Futar Lia.

 

Segunda Leitura (Format Breve)                                                                                                                                Rom. 5, 12. 17-19

Lia husi São Paulo nia surat ba sarani sira iha Roma:

Maun-alin sira: Housi ema ida de’it, salan tama iha mundo; housi fali salan, tama mate. Nune’e, mate tama iha ema hotu, basá, sira hotu sala. Tan ema ida mesak nia salan, mate mai housi ema mesak ida ne’e; lós liu tan fali, sei hetan moris ema sira nebé simu graça barak no tulun justiça nian housi ema ida mesak, Jesus Cristo. Hanesan, housi ema ida mesak nia salan, susar mai to’o ema hotu, nune’e mos, housi ida mesak nia hahalok di’ak, ema barak hetan di’ak nebé fó moris. Hanesan, tan ema ida de’it la halo tuir, ema barak sai maksalak, nune’e mos, tan ema ida de’it halo tuir, ema barak sai lós.

Maromak Futar Lia.

 

Aclamação                                                                                                                                                                                            Mt. 4, 4b

Refrão : Ami Hahí Cristo, Maromak nia lia-fuan!! Repete-se

La moris de’it ho ai-han, maibé,

ho lia-fuan nebé mai husi Maromak. Refrão

 

Evangelho                                                                                                                                                                                            Mt 4, 1-11

Na’i Jesus Cristo nia Evangelho nu’udar São Mateus haktuir:

Iha tempo nebá, Espírito Santo lori Jesus ba rai-fuik maranatu Demónia babeur Nia. Jesus halo jejum loron hatnulu, kalan hatnulu, liu tiha Nia hamlaha. Babeur-Na’in hakbesik ba Nia, hodi dehan: ”o Maromak Oan sa, dehan ba fatuk hirak ne’e, atu sira nakfilak ba pão”. Jesus dehan ba nia: “hakerek nanis ona, ema moris laós ho ai-han de’it, maibé, ho lia-fuan sira hotu, nebé sai husi Maromak futar ibun”. Demónio lori Nia ba tau iha templo tutun, dehan: “o Maromak Oan sa, soe-An took ba kraik. Basá, hakerek nanis ona: Maromak sei hanorin Nia anjo sira, kona ba O, sira sei simu O iha sira liman, keta halo O nia ain baku ba fatuk ruma”. Jesus hatan, dehan:”hakerek nanis ona: keta babeur o nia Na’in,  o nia Maromak”. Demónio lori fali Nia ba foho ass teb-tebes ida; hatudu tiha reino hot-hotu mundo nian, hamutuk ho nia riku-soin, nia dehan: ”hau fo buat sira ne’e hotu ba O, karik O hakneak, adora hau”. Jeus hatan, dehan: “sai husi ne’e, satanás, basá, hakerek nanis: adora de’it o nia Na’in, o nia Maromak; ba nia mesak de’it mak o hasae o nia hamulak”.  Nune’e’e, demónio husik tiha Nia. Anjo sira mai kedas servi Jesus.

Lia Maksoyn.

 

Reflexão:

CATÓLICO BANATI JESUS NIA JEJUM

 

Leitura sira Semana nee, endereça (mengarahkan) ita tempo Qauresma nebé iha prática considera nudar tempo penitência no conversão. Primeira Leitura fo imagem kona ba ema nia ksolok nebé Maromak haraik maibé, ema uza sala livre vontade hodi halo sala.

São Paulo fo esperança iha ninia carta ba sarani sira iha Roma hodi halo comparação no hatudu katak ita nia salan sira hanesan mos Adão nia salan. Maibé, São Paulo notific akatak; iha nebé mak ema monu ba salan tanba fraqueza humana, iha neba Maromak nia graça perdão husi Maromak.

Evangelista Mateus relata katak laos deit ema salan nain hanesan ita nobun mak monu ba tentação maibé, Jesus rasik mos enfrenta tentação nee. Salmo 51 expressa vontade ema nian hodi reconhece-an iha Maromak nia futar oin tenik: “Nai, ami sala! Hanoin ami!”.

Buat nebé estranho iha missa Quarte Feira Cinzas mak; ema wain nebé nadodon mai missa hodi simu ahu-kdesan. Balu la tuir missa completo maibé, sira forma deit hodi simu ahu-kdesan iha rentos.  Maske Domingo tempo bai-bain ema oitoan deit mak mai participa missa, enquanto too Cinzas ema nakonu naresin iha aredor Igreja. Motivo husi nee ita bele nota buat rua: 1) Ema hot-hotu tauk mate, 2) Ema hot-hotu hatene-an hela katak; mai husi rai rahun. 

Apartir de quarta feira cinzas, ita hahu dadaun ona tempo quaresma. Cinzas ka ahu-kdesan be ita simu iha rentos significa; ita ema mai husi rai no sei fila ba rai. Ahu kdesan mos tulun ita atu hatene haraik-an no la haluha-an, la haluha dever eh obrigação nudar ema Católico nebé simu ona graça liu husi we Baptismo. Nunee, tempo quaresma hafanun hikas ita nia hanoin tomak hodi hatene halo oração, halo penitência ka hakribi salan sira, fo esmola, tulun ema mukit sira no mos halo funu hasoru ita nia hahalok aat nebé la expressa ita nia-an hanesan ema sarani. Lalaok hirak nee mak prática concreta  nebé sai hanesan odamatan entrada ba festa páscoa –  Ressurreição de Cristo.

Iha quarta feira cinzas, wainhira amu lulik kose ahu-kdesan ba ita nia rentos, ita rona lia fuan be tenik; hakribit imi salan, fiar Evangelho (Mc 1,15). Ho lia fuan badak ida nee, ajuda ita hodi fihir no banati tuir sentido sacrifício nebé Nai Jesus Kristu rasik husik hela ona mai ita. Liu husi we Baptismo, ita nia pecado original kasu tiha ona maibé, hanesan criatura fraco, ita sempre monu fil-fila ba tentação sira, monu ba Maromak falsu, monu ba ideologia bosok sira, monu ba doutrina falsa testemunha jeova no pior liu tan hamout ita nia condição nudar povo Maromak nian iha nakukun pecado nebé tuir los ita bele hasees tiha.

Wainhira simu batismo iha mota Jordão, Jesus proclamado nudar Maromak Oan (Mt 3,17). Liu tiha evento nee, Jesus tenke enfrenta tentação tipo 3 conforme Evangelho relata, durante loron 40 iha deserto. Relato nee lori ita ba hanoin Moises nia jejum durante loron 40 (Êx. 34, 28; Deut. 9, 9-18). Tentação Jesus nian mos halo ita hanoin tentação nebé povo Israel enfrenta nudar Maromak nia povo (Os, 11, 1; Deut. 8, 5). Jesus nia acto hodi responde perante tentação 3 nee, reflecte mos iha Deut. 8, 3; 6, 16; 13).

Husi Jesus acto perante tentação sira ho povo Israel nia lalaok reflecte diferença acto mak hanesan: povo Israel falha (gagal) hodi enfrenta tentação sira enquanto Jesus consegue supera tentação hodi hatudu Ninia fidelidade (kesetiaan), firmesa, hodi comprova Ninia dignidade nudar Maromak Oan.

Comparação nee hakarek reflecte deit ita ema nia condição pecável, frágil, humana maibé, iha condição ida nee mak possibilita Maromak hasuli Ninia graça perdão no redenção iha Cristo Jesus nia paixão. Nee significa katak maske ita monu bebeik ba sala tanba mundo nia ksolok atraido liu maibé, wainhira ita koko bebeik hodi hamrik husi sala, ida nee mak sai especial ba Maromak tan Maromak haré no hatene klean ita laran nebé fiel no arrepende bebeik.

Wainhira ita mout ona iha pecado laran, wainhira monu ona iha susar laran, certamente ita sente Maromak fila oin husi ita, ita sente Maromak subar-An ba ita, ita sente ligação ho Maromak kotu, ita sente Maromak tau naha todan iha ita kbaas. Ba ida nee, salmista reprezenta ita nobun nia fatin, nodi tatoli oração ba Maromak tenik; Nai, hatudu mai hau ita nia dalan sira; ita mak hau nia fatin salvação……………………….. Maromak perdua nain no dalan los nebé lori ema sala nain sira ba dalan diak(Cf Sl 24).

Maromak sempre rona ema sala nain sira be hatene-an, la haluha-an hodi hatene submete ba Maromak nia vontade no rona Maromak nia mandamento sira hafoin haraik-an, hakribi salan, hodi hakiak fila fali relação diak ho Maromak. Nunee, liu husi we Baptismo, ita sai ona Maromak nia povonebé livre ona husi pecado original. Maromak nebé sempre rona bebeik ita nia lian no oração halerik sira, ikus mai cumpri duni Ninia promessa nebé halo ona ho Noe hodi haruka duni nia Oan Mane mesak mai terus no kasu mundo.

Iha we Batismo ita sai ona povo Maromak nian, ita sai ona sociedadae foun ida, sociedade nebé simu moris foun iha we Batismo. Nunee, nudar Católico, ita nobun mos simu ona we Batsimonebé hanesan. We Batismo hanorin no fo hanoin bebeik katak ita nia converção, ita nia pertobatan, ita nia hakribi salan sira, sai hanesan maneira arrependimento no maneira oinsa laos halo tuir deit ita nia vontade maibé, halo tuir deit mak Maromak nia Mandamento nudar Jesus hanorin no hatudu.

Ohin loron ema barak koalia hodi fo sasin katak hau ema Católico, ami ema sarani Católico maibé, dala barak liu hahalok no lia fuan la expressa serCatólico nee. Ibun kulit koalia sai fiar Maromak maibé, iha prática hahalok la justifica lia fuan. Nudar sarani, sacrifício saida mak ita halo ona iha moruis nee hodi comprova ita nia identidade Católico?

Liu husi Evangelho no leitura sira primeiro Domingo quaresma nian nee, Jesus Cristo hakarak bolu nafatin ita hodi hanoin bebeik ita nia-an hanesan ema sala nain nebé precisa Maromak nia graça iha ita nia vida. Lalaok concreta nebé ita presiza halo iha tempo quaresma nee mak hahalok caridade, hahalok jejum hanesan Nai Jesus  halo jejum durante loron 40 iha rai fuik maran nebé laiha ai-han, kuran be, la iha toba fatin. Ita rasik mak sai autor hodi halo funu hasoru satanas; liu husi oração, confessa, fo esmola, missa bebeik, le no reflete Maromak nia lia fuan sira inclui mos açãocaritativa sira seluk nebé bele ajuda ita hamos no hakmaan todan pecadu nian. Ho nunee deit mak ita laos ona sarani KTP, sarani Natal-Páscoa, Sarani nebé laran mamuk, maibé, ita nia hakribi salan fo haris ona ita ho we Batismo, halo ita la haluha-an katak ita mai husi rai sei fila fali ba rai. Assim Seja e Bem Haja (ignasoliveira)

Leave a Reply

Your email address will not be published. Required fields are marked *