shadow
Diocese de Dili > NOTÍCIAS > LETURA DIÁRIA > I Domingo Quaresma (ANO A)

I Domingo Quaresma (ANO A)

Primeira Leitura          Gén. 2, 7-9; 3, 1-7

Lia husi Livro Génesis:

Na’i Maromak halo ema ho rai rahun. Nia huu íis ida, moris nian, husi ema inus; nune’e’e, ema sai buat moris ida. Na’i Maromak kuda toos ida iha Edén, iha loron-sae; Nia tau, ema nebé Nia halo, iha nebá. Maromak halo moris ai-horis oi-oin, fuan mesak furak, di’ak atu han; Ai-horis moris nian iha toos klaran no mos ai-horis hatene di’ak no hatene aat nian. Balada sira hotu nebé  Na’i Maromak halo, samean mak laran kman liu atu bobar. Samean dehan ba feto: “Tebes ka? Maromak dehan ba imi: imi labele han ai-fuan hirak iha toos laran ne’e?” Feto hatan ba samean: “Ami bele han ai-fuan hirak iha toos laran. Maibé, kona ba a i-fuan nebé iha toos klaran, Maromak dehan mai ami: imi keta han nia; kona de’it mos labele. Keta halo imi mate”. Samean hatan ba feto: “Lae ida! Imi sei la mate. Maromak hatene katak, wainhira imi han ai-fuan ne’e, imi nia matan nakloke, imi sei sai hanesan Maromak, imi hatene di’ak no aat”. Feto haré ba ai ne’e nia fuan di’ak tebes atu han, matan kan, ai-di’ak ida atu fo matenek. Nia ku’u ai-fuan ba han; hafoin nia fo ba nia laen nebé hamutuk ho nia; nia laen mos han. Sira Na’in rua nia matan nakloke, sira hatene katak, sira nia isin tanan. Tan ne’e sira suku ai figueira tahan, hodi taka-an.

Maromak Futar Lia.

 

Salmo Responsorial                                                                                                                        Sal. 50 (51), 3-4. 5-6a. 12-13. 14-17

Refrão : Na’i, ami sala! Hanoinami!!! Repete-se

Na’i, sadia ami, tan Ita laran di’ak,

Tan Ita laran luak, kasu ami salan;

Hamós hau nia hahalok aat,

Kasu hau nia salan hotu. Refrão

 

Hau fiar ba hau salan,

Hau salan hetan nafatin iha hau oin

Na’i, hau sala hasoru Ita,

Hau halo sala iha Ita oin. Refrão

 

Maromak, haraik neon founmaihau,

Halo hau klamar nabilan.

Keta soe hau husi Ita futar oin,

Keta hadook hau husi Ita neon. Refrão

 

Segunda Leitura (Format Longa)                                                                                                                                      Rom. 5, 12-19

Lia husi São Paulo nia surat ba sarani sira iha Roma:

Maun-alin sira: Salan tama iha mundo hodi ema ida de’it; husi salan tam mate. Nune’e’e, mate tama iha ema hot-hotu, basá, ema hotu sala. Hori uluk too Moises nia Lei, mundo iha salan. Maibé, Lei ida la iha karik, ema nebé halo salan, la sala. Maibé, mate iha kedas ona, husi Adão too Moises, ba mos sira nebé la sala hanesan Adão; Adão, Jesus Cristo nebé atu mai ne’e nia ilas. Maibé, tulun la simu leet hanesan sala. Tan ema ida de’it nia salan, ema barak hetan aat; maibé, Maromak nia graça liu tan fali: ho ema ida de’it – Jesus Cristo, nia tulun ema wain tebes hetan di’ak. Tulun ne’e la hanesan salan ema ida de’it nian:salan mesak ida ne’e, lori ema ba terus; maibé, tulun simu leet, nebé mai tuir salan barak, lori ba di’ak. Tan ema mesak ida nia salan, mate tama husi ema mesak ida ne’e; liu tan fali; ema sira nebé simu graça barak no tulun justiça nian, sei hetan moris husi ema ida mesak, Jesus Cristo. Tan ema ida mesak nia salan, susar mai too hotu; nune’e’e mos, hodi hahalok di’ak ema mesak ida nian, ema hotu hetan di’ak nebé fo moris. Tan ema ida mesak la kohi halo tuir, ema barak sai maksalak; nune’e’e mos, tan ema ida mesak halo tuir, ema barak sai lós.

Maromak Futar Lia.

 

Segunda Leitura (Format Breve)                                                                                                                                Rom. 5, 12. 17-19

Lia husi São Paulo nia surat ba sarani sira iha Roma:

Maun-alin sira: Housi ema ida de’it, salan tama iha mundo; housi fali salan, tama mate. Nune’e, mate tama iha ema hotu, basá, sira hotu sala. Tan ema ida mesak nia salan, mate mai housi ema mesak ida ne’e; lós liu tan fali, sei hetan moris ema sira nebé simu graça barak no tulun justiça nian housi ema ida mesak, Jesus Cristo. Hanesan, housi ema ida mesak nia salan, susar mai to’o ema hotu, nune’e mos, housi ida mesak nia hahalok di’ak, ema barak hetan di’ak nebé fó moris. Hanesan, tan ema ida de’it la halo tuir, ema barak sai maksalak, nune’e mos, tan ema ida de’it halo tuir, ema barak sai lós.

Maromak Futar Lia.

 

Aclamação                                                                                                                                                                                            Mt. 4, 4b

Refrão : Ami Hahí Cristo, Maromak nia lia-fuan!! Repete-se

La moris de’it ho ai-han, maibé,

ho lia-fuan nebé mai husi Maromak. Refrão

 

Evangelho                                                                                                                                                                                            Mt 4, 1-11

Na’i Jesus Cristo nia Evangelho nu’udar São Mateus haktuir:

Iha tempo nebá, Espírito Santo lori Jesus ba rai-fuik maranatu Demónia babeur Nia. Jesus halo jejum loron hatnulu, kalan hatnulu, liu tiha Nia hamlaha. Babeur-Na’in hakbesik ba Nia, hodi dehan: ”o Maromak Oan sa, dehan ba fatuk hirak ne’e, atu sira nakfilak ba pão”. Jesus dehan ba nia: “hakerek nanis ona, ema moris laós ho ai-han de’it, maibé, ho lia-fuan sira hotu, nebé sai husi Maromak futar ibun”. Demónio lori Nia ba tau iha templo tutun, dehan: “o Maromak Oan sa, soe-An took ba kraik. Basá, hakerek nanis ona: Maromak sei hanorin Nia anjo sira, kona ba O, sira sei simu O iha sira liman, keta halo O nia ain baku ba fatuk ruma”. Jesus hatan, dehan:”hakerek nanis ona: keta babeur o nia Na’in,  o nia Maromak”. Demónio lori fali Nia ba foho ass teb-tebes ida; hatudu tiha reino hot-hotu mundo nian, hamutuk ho nia riku-soin, nia dehan: ”hau fo buat sira ne’e hotu ba O, karik O hakneak, adora hau”. Jeus hatan, dehan: “sai husi ne’e, satanás, basá, hakerek nanis: adora de’it o nia Na’in, o nia Maromak; ba nia mesak de’it mak o hasae o nia hamulak”.  Nune’e’e, demónio husik tiha Nia. Anjo sira mai kedas servi Jesus.

Lia Maksoyn.

Leave a Reply

Your email address will not be published. Required fields are marked *