shadow
Diocese de Dili > NOTÍCIAS > REFLEXÃO > FIEL BA MAROMAK NO CUIDADO MEDSOS

FIEL BA MAROMAK NO CUIDADO MEDSOS

Reflexão & Leituras DOMINGOQUARESMA II/Ano A/2020

Gén. 12,1-4a; 2Tim 1,8b-10; Mt 17,1-9

 

Primeira Leitura                   Gén. 12, 1-4ª

Lia housi Livro Génesis:    

Iha loron hirak nebá, Na’i lia tun ba Abraão: “Husik tiha ó nia rain, ó nia parenti sira, ó nia aman sira nia uman, ba rai nebé Ha’u sei hatudu ba ó. Ha’u sei halo ó sai nação boot ida. Ha’u sei fó bensa ba ó, Ha’u fó naran boot ida ba ó, ó rasik sei sai nu’udar bença ida. Ha’u sei fó bensa ba ema nebé fó bensa ba ó; Ha’u sei fó malisan ba ema nebé fó malisan ba ó. Tan ó, nação sira hotu rai nian, sei simu bensa”. Abraão bá, tuir Na’i haruka.

Maromak Futar Lia.

 

Salmo Responsorial                                                                                                                 Sal. 32 (33), 4-5. 18-19. 20. 22 (R. 22)

Refrão : Na’i, ami hein Ita Boot laran luak!!! Repete-se

Na’i nia lian, lialós;

buat hotu mosu tuir Nia hakarak.

Na’i Nia domin nakonu iha rai-klaran. Refrão

 

Na’i tau matan ba Nia atan sira,

ba sira nebé hein iha Nia domin,

atu hasai sira klamar housi mate,

atu fo moris iha susar laran. Refrão

 

Ita neon hein ita Na’in,

Na’i sadia ita, tahan ita.

Haraik Ita Boot nia tulun,

Na’i, ami hein Ita. Refrão

 

Segunda Leitura                                                                                                                                                                     2 Tim. 1, 8b-10

Lia housi São Paulo nia Surat ba Timóteo:     

Doben: Hodi Maromak nia kbiit, terus hamutuk ho ha’u, tan Evangelho. Maromak soy ita, bolu ita atu sai santo laós hodi ita nia hahalok di’ak, maibé, hodi Nia hakarak no Nia tulun. Graça ne’e ita simu housi Jesus Cristo houri nebé kedas; ohin loron, foin hatudu housi Jesus Cristo, ita nia Maksoyn. Nia halakon mate; hodi Evangelho, Nia halo nabilan moris no moris rohan laek.

Maromak Futar Lia.

 

Aclamação

Refrão : Na’i Jesus Cristo, ami hahí hana’i Ita!! Repete-se

Housi kalohan nabilan ida laran,

Aman Maromak lia tun mai:

“Ne’e, Hau Oan doben liu. Imi rona Nia ba”. Refrão

 

Evangelho                                                                                                                                                                                          Mt. 17, 1-9

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lori Pedro, Tiago ho nia alin João, mesa-mesak ba foho áas ida. Nia nakfilak-An iha sira oin: Nia oin nabilan hanesan loron, Ninia hatáis mutin hanesan roman. Mosu Moisés ho Elias, ko’alia ho Nia. Pedro hahú dehan ba Jesus: “Na’i, di’ak liu ita hela ona iha ne’e. Ita hakarak karik, ha’u halo taka-baluk tolu: ida ba Ita, ida ba Moisés, ida ba Elias”. Nia sei ko’alia hela, kalohan nabilan ida taka tiha sira; housi kalohan laran, lian ida dehan: “Ida ne’e, Ha’u nia Oan doben tebes, nebé Ha’u tau Ha’u domin. Imi rona Nia ba”. Rona lia-fuan hirak ne’e, sira monu taka oin ba rai, hakfodak teb-tebes. Jesus besik ba sira, hodi dehan: “Imi hamriik tiha ba, keta ta’uk”. Sira foti matan, la haré tan ema ida; sira haré de’it Jesus. Tun housi foho, Jesus hanourin sira: “Imi keta haktuir ba ema ida, buat nebé imi haré, wainhira Mane-Maksoyn la dauk moris hias housi mate”.

Lia Maksoyn.

 

Reflexão:

FIEL BA MAROMAK & CUIDADO MEDSOS

 

Papa Francisco husu sarani sira atu hapara ona trata malu liu husi media social hanesan Facebook. Papa dehan; ita moris iha atmosfera ida nebé poluido ho propaganda política, ataque verbal, defama malu, tolok malu, hatene utiliza didiak internet ba sociedade ida que justo.

Buat nebé Maromak hakarak mak oinsa durante Quaresma nee, ita cumpri obrigação sarani ao mesmo tempo nudar Timor oan, lalika cria confusão ho issu Corono, lalika provoca malu iha facebook, lança propaganda política, defama lider nacional sira tan deit interece política.

Nudar Timor oan, ita precisa orgulho no tulun malu hodi resolve rasik ita nia problema rai laran, koko esforsu-an hodi resolve rasik ita nia pecado ho Maromak iha sacramento confessa. Koko halo tuir Maromak nia ukun fuan hodi hatudu dignidade nudar sarani no nudar Timor oan.

Ita passa ona semana ida iha tempo exame quaresmal; hodi jejum, abstinência, caridade, esmola,…nst. Leitura sira semana nee bad-badak deik maibé mensagem nebé contida iha laran mesak kmanek no hanorin ita oinsa fiel (setia) ba Maromak hanesan Jesus Cristo fiel.

Iha Antigo Testamento too ohin loron, figura Abraão sai exemplo ba Fiar no fidelidade atu ita banati tuir. Nia sempre rona no halo tuirMaromak nia ordem, até Maromak husu nia sacrifica ninia oan mane mos, nia la hakiduk. Tanba fidelidade ida nee mak Abraão sai exemplo mos ba maluk judeu sira, muçulmano sira iclui Cristão sira. 

Iha Testmento Foun, figura Jesus, nudar relata iha Evangelho, iha foho tutun Tabor justificado nudar Maromak Oan, nebé ita precisa rona hodi halo tuir Ninia lia-fuan.Nudar iha Testamento Tuan, Abraão muda total lalaok história Israel, nunee mos Jesus iha Testamento Foun halo mudança ba ita nia lalaok iha mundo nee.Oras nee, li-liu durante época Quaresmal, ita convidado dala ida tan hodi conhece klean personalidade Abraão ho Jesus atu nunee, ita mos bele banati tuir sira nia lalaok oinsa fiel no moris tuir Maromak nia ordem.

Abraão: Maromak bolu hodi realiza Maromak nia plano, tan nee nia husik ninia rain, riku soin no parente sira hodi halo viagem ba rai dook nebé Maromak indica. Nia tenke ba rai nebé nia rasik seidauk hatene,maibé, Maromak rasik promete ba nia graça wain la nahas; nia sei sai aman povo ida ho ninia gerção sira be buras, horik iha rai ida nakonu ho bani wen no susu ben nebé garante prosperidade.

Primeira Leitura husi livro Génesis sobre Abraão, ita hatene netik informação oitoan katak Israel nudar rai (povo) escolhido nebé nunca dook husi Maromak nia proteção.Povo (Israel) geração Abraão Maromak protege laos hodi salva sira husi destruição deit maibé, Maromak haruka sira hodi sai matadalan ba salva,cão rai sira hotu.

Abraão halo tuir saida mak Maromak haruka tuir nia capacidade no caridade. Exemplo mak Abraão ajuda fahe ninia plantação ba ninia subrinho Lot tuir ninia precisa (Gén 13). Abraão mos luta hodi salva população Sodoma no Gomora husi destruição (castigo todan) (Gén. 18, 22-23). Husi sorin seluk, Abraão mos hatudu duni ninia vontade hodi estabelece paz ho ema seluk, wainhira mosu desentendimento (Gén. 21, 22-34).

Abraão nia atitude no lalaok coragem basea ba pano de fundo nebé descreve iha primeira leitura. Maromak halo abraão brani hodi tenik:”Hau (Maromak) sei halo o sai nação (povo) boot ida… Tan o, nação hotu rai nian, sei simu benção” (Gén. 12, 2-3).Antes nee, iha relato Génesis 11, haktuir construção torre de Babel nebé aas too loro leten.

Maibé, tuir mai Maromak destrui tiha torre refere tanba ema hirak harí torre nee orgulho demais ho saida mak sira halo (Egoisme).Consequência husi destruição torre nee, afinal hamosu caos (kekacauan) no hostilidade (permusuhan) entre povo. Pelo contrário, Abraão Maromak bolu hodi sai benção, katak construi unidade no fraternidade nudar ema no povo. Nee mak Maromak nia benção. 

Jesus: Evangelho semana nee descreve sobre Jesus.Haré no rona tiha história Abraão nian nudar ‘pai da fé’, ita bele halo pergunta; será que ita ida-idak mos fiel hanesan Abraão? Se Maromak haruka ita, ita pronto hanesan Abraão? Tan Abraão sempre fiel no cumpri Maromak nia haruka.Ita rona no halo tuir ona Maromak nia haruka iha Jesus Cristo? Abraão fiel ona ba nia vocação hodi ba rai dook husik buat hotu. Oinsa ita nobun ohin loron nebé fiel ba Jesus Cristo?

Saida mak Jesus deseja ba ita, la diferente ho saida mak Maromak haruka ba Abraão. Ponto principal mak; ita rona hodi halo tuir saida mak Maromak haruka iha Mandamento sira. Talves ohin loron ita hanoin katak vocação nee refere deit ba religioso sira, padre sira, bispo sira. Maibé, por natureza ita hotu nebé sente-an pertence ba Igreja Católica (sarani), ita nia vocação hodi halo tuir ukun fuan Maromaknian. Na realidade ita nia fiar nudar sarani fraca, desafio barak, dúvida, maibé, ita nia convicção ba Maromak halo ita aten brani hodi cumpri netik ukun fuan balu iha moris nee.

Ita precisa fiar katak Maromak mak determina ita nia direção moris. Hanesan Abraão husi ninia rai hodi ba rai dook, nunee mos ita nudar sarani, Maromak husu ita atu husi ita nia kaan ten riku soin, kaan ten poder, gosta halo propaganda política iha medsos, la halo ação caritativo, halo projecto la qualidade, fo esmola koalia barak, ajuda ema posting iha facebook,…nst.

Buat nebé Maromak hakarak mak oinsa durante Quaresma nee, ita cumpri obrigação sarani ao mesmo tempo nudar Timor oan, lalika cria confusão ho issu Corono, lalika provoca malu iha facebook, lança propaganda política, defama lider nacional sira tan deit interece política.

Nudar Timor oan, ita precisa orgulho no tulun malu hodi resolve rasik ita nia problema rai laran, koko esforsu-an hodi resolve rasik ita nia pecado ho Maromak iha sacramento confessa. Koko halo tuir Maromak nia ukun fuan hodi hatudu dignidade nudar sarani no nudar Timor oan.

Papa Francisco husu sarani sira atu hapara ona trata malu liu husi media social hanesan Facebook. Papa dehan; ita moris iha atmosfera ida nebé poluido ho propaganda política, ataque verbal, defama malu, tolok malu, hatene utiliza didiak internet ba sociedade ida que justo. Assim Seja e Bem Haja (Ignas)

Leave a Reply

Your email address will not be published. Required fields are marked *