shadow
Diocese de Dili > NOTÍCIAS > REFLEXÃO > IDA NEE HAU NIA OAN DOBEN NEBE HAU HADOMI, IMI RONA NIA BA. HAMRIK TIHA KETA TA’UK

IDA NEE HAU NIA OAN DOBEN NEBE HAU HADOMI, IMI RONA NIA BA. HAMRIK TIHA KETA TA’UK

Maun alin doben sira, oras ne’e ita iha ona semana daruak tempo quaresma nian. Tempo ida nebé tuir orientação ita ninia bibi atan arquidiocese Dili nian hateten katak “Tempo atu ita hakribit ita ninia salan sira”. Tempo nebé Nai Maromak tamba ninia laran luak bolu ita ema sala nain sira fila fali ba Nia liu husi dalan hakribi ita ninia salan. Iha Ninia futar Liafuan sira be hato’o mai ita durante semana dahuluk quaresma nian fo tada mai ita katak hakribi salan ne’e hahalok ida nebé lori ita ba moris no moris hamutuk ho Maromak, hakribi salan sira  atu ita bele sai Maromak ninia oan lolós no diak ka perfeito nudar ita ninia Aman Maromak iha lalehan diak ou perfeito. Ne’e duni ita halo conversão ka hakribi ita ninia salan sira uluk nanain laos atu halo tuir lei no regra sira deit maibé liu liu atu ita ema siratbele hakbesik an fila fali ba Maromak no ba Maun alin sira hodi moris lolós nudar familia Maromak ninia familia. Hatudu lolós iha ita nia laran moras ba salan hodi husu perdão ba malu, dame malu no domin malu lolós ho Maromak no ho maun alin sira.

 

Doben Maun alin sira, tuir roman Na’i Maromak ninia futar Liafuan iha domingo ida ne’e nian hanorin dehan quaresma mos katak RONA HODI LAO TUIR NA’I MAROMAK HO FIAR NO CONFIANÇA TOMAK” nune’e deit mak ita ema sira bele hetan moris ida digno lolós to’o moris rohan laek. Hahu kedas husi Evangelho be Aman Maromak rasik lia tun mai ita hodi husu ita Rona ninia Oan doben Jesus Cristo, iha primeira leitura Abraão Aman fiar nian rona tiha Maromak koalia ba nia, nia ho fiar metin hamrik lori ninia familia husi hela rai nebé nia horik ba hodi lao tuir Maromak ba to’o rai nebé Maromak sei haraik ba nia ho ninia familia. No São Paulo iha II leitura hanorin hela ita katak ita hotu hetan moris lolós no moris rohan laek laos tamba ita ninia hahalok diak sira maibé tamba Maromak be bele halo hotu hotu ne’e ninia kbiit, tamba ita hatene hatudu nafatin ita ninia fiar no laran metin ba Maromak iha buat hotu-hotu mas que dala balun ita hasoru terus no susar boot.

 

Evangelho haktuir mai ita katak iha foho tabor nia leten Aman Maromak liatun mai ita dehan “Ida ne’e mak Hau nia Oan doben nebé Hau hadomi liu, imi rona Nia ba”. Iha lian ne’e Aman Maromak apresenta Jesus mai ita nudar Maromak ninia Oan ka nudar Ninia Oan doben liu hodi husu mai ita atu rona Jesus Cristo basá Jesus Cristo mak Maksoin ema no buat hotu nian, laiha tan seluk. Tamba ne’e Aman Maromak husu mai ita atu rona nia hodi moris tuir ninia moris no ninia hanorin sira. Aman Maromak ninia futar liafuan ne’e concencializa mos ita atu ita ninia rona ba Jesus ne’e hatudu iha moris concreto nebé bele hahu kedas ona iha ita ninia uma laran ba to’o ema sira nebé moris haleu ita iha ita ninia moris ne’e rasik. Hatudu iha Inan ho aman sira ninia rona malu, oan sira ninia rona inan ho aman no rona malu entre sira iha buat hotu be sira halao iha sira nia moris. Rona ita ninia maluk sira seluk, sira nebé hela hamutuk ho ita, sira nebé serviço hamutuk ho ita, sira nebé hanoin no hakarak la hanesan ho ita, no seluk seluk tan. Maromak iha ninia hanorin sira wainhira dehan rona laos katak rona deit, maibé rona implica mos halo tuir ou lori ba to’o hahalok concreto buat sira nebé ita rona husi Maromak no ita ninia rona malu sira.

 

Maluk doben sira atu bele halo nune’e uluk nanain ita tem que  iha fiar metin ba Maromak, ita tem que hatudu-an nudar ema fiar Nain iha Maromak, nudar ema nebé tau Maromak ninia hakarak mak uluk liu no ita ninia hakarak sira la sai uluk. Abraão ita aman fiar nian hatudu lolós sentido rona Nai Maromak, Fiar iha Nai Maromak no halo tuir Na’i Maromak ninia hakarak ne’e mak oinsa. Haktuir iha primeira leitura katak Abraão rona Maromak haruka nia atu husik hela ninia rain hodi lao ba fatin foun nebé Maromak promete sei haraik ba Nia, nia halo tuir ho laran metin los tamba nia Fiar iha Maromak ninia futar Liafuan ne’e. Nune’e mas que la hatene fatin ne’e iha nebé no fatin ne’e oinsa los, tamba deit fiar Abraão husik nia rain ho nia emar sira hodi lao durante tinan barak ninia laran ba fatin ne’e. Iha ninia caminhada Abraão lao hamutuk nafatin ho Maromak, fiar metin nafatin iha Maromak, rona nafatin Maromak no lao tuir nafatin dalan nebé Maromak hatudu ba nia iha momento ba momento, iha loron no tinan hodi ikus mai nia ho ninia familia to’o duni iha rai nebé Maromak promete ba Nia. Tamba hatene rona hodi halo tuir Maromak no tamba hatudu nafatin ninia fiar no fidelidade ba Maromak, Nai Maromak halo Abraão sai Aman fiar nian, halo nia derasan sai wain nudar povo ida, povo ida be comcerteza sai especial no Maromak hili sai nudar ninia povo. Husi Abraão no husi povo ida ne’e mak Nai Maromak haraik mos benção ba rai no povo hotu hotu iha rai klaran ne’e nudar Maromak dehan nanis ona ba Abraão. Benção ida ne’e mak haktuir mai ita iha segunda leitura katak Maksoin ba ema hotu tamba Jesus Cristo no liu husi Jesus Cristo Maromak ninia Oan doben. Ema hotu nebé rona hodi moris tuir Nia sei hetan moris no moris rohan laek.

 

Doben maun alin sira iha tempo quaresma ne’e mai ita hakasan moris tuir dalan moris quaresma nian hodi liu husi, Jejum, abstinência, penitência, oração, misericordia, caridade, humildade no confiança ita BUKA HAMETIN NO HABOOT ITA NINIA FIAR BA MAROMAK NO BUKA RONA MAROMAK HODI MORIS TUIR MAROMAK NINIA FUTAR LIAFUAN SIRA BE SAI WE MATAN MORIS LOLÓS NO MORIS ROHAN LAEK NIAN MAI ITA EMA SIRA NE’E IHA ITA NINIA MORIS LORO-LORON.

AMEN.

Becora, II D. Quaresma-A, Por: Pb.

Leave a Reply

Your email address will not be published. Required fields are marked *