shadow
Diocese de Dili > NOTÍCIAS > LETURA DIÁRIA > II Domingo Quaresma (ANO A)

II Domingo Quaresma (ANO A)

Primeira Leitura                   Gén. 12, 1-4ª

Lia housi Livro Génesis:    

Iha loron hirak nebá, Na’i lia tun ba Abraão: “Husik tiha ó nia rain, ó nia parenti sira, ó nia aman sira nia uman, ba rai nebé Ha’u sei hatudu ba ó. Ha’u sei halo ó sai nação boot ida. Ha’u sei fó bensa ba ó, Ha’u fó naran boot ida ba ó, ó rasik sei sai nu’udar bença ida. Ha’u sei fó bensa ba ema nebé fó bensa ba ó; Ha’u sei fó malisan ba ema nebé fó malisan ba ó. Tan ó, nação sira hotu rai nian, sei simu bensa”. Abraão bá, tuir Na’i haruka.

Maromak Futar Lia.

 

Salmo Responsorial                                                                                                                 Sal. 32 (33), 4-5. 18-19. 20. 22 (R. 22)

Refrão : Na’i, ami hein Ita Boot laran luak!!! Repete-se

Na’i nia lian, lialós;

buat hotu mosu tuir Nia hakarak.

Na’i Nia domin nakonu iha rai-klaran. Refrão

 

Na’i tau matan ba Nia atan sira,

ba sira nebé hein iha Nia domin,

atu hasai sira klamar housi mate,

atu fo moris iha susar laran. Refrão

 

Ita neon hein ita Na’in,

Na’i sadia ita, tahan ita.

Haraik Ita Boot nia tulun,

Na’i, ami hein Ita. Refrão

 

Segunda Leitura                                                                                                                                                                     2 Tim. 1, 8b-10

Lia housi São Paulo nia Surat ba Timóteo:     

Doben: Hodi Maromak nia kbiit, terus hamutuk ho ha’u, tan Evangelho. Maromak soy ita, bolu ita atu sai santo laós hodi ita nia hahalok di’ak, maibé, hodi Nia hakarak no Nia tulun. Graça ne’e ita simu housi Jesus Cristo houri nebé kedas; ohin loron, foin hatudu housi Jesus Cristo, ita nia Maksoyn. Nia halakon mate; hodi Evangelho, Nia halo nabilan moris no moris rohan laek.

Maromak Futar Lia.

 

Aclamação

Refrão : Na’i Jesus Cristo, ami hahí hana’i Ita!! Repete-se

Housi kalohan nabilan ida laran,

Aman Maromak lia tun mai:

“Ne’e, Hau Oan doben liu. Imi rona Nia ba”. Refrão

 

Evangelho                                                                                                                                                                                          Mt. 17, 1-9

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lori Pedro, Tiago ho nia alin João, mesa-mesak ba foho áas ida. Nia nakfilak-An iha sira oin: Nia oin nabilan hanesan loron, Ninia hatáis mutin hanesan roman. Mosu Moisés ho Elias, ko’alia ho Nia. Pedro hahú dehan ba Jesus: “Na’i, di’ak liu ita hela ona iha ne’e. Ita hakarak karik, ha’u halo taka-baluk tolu: ida ba Ita, ida ba Moisés, ida ba Elias”. Nia sei ko’alia hela, kalohan nabilan ida taka tiha sira; housi kalohan laran, lian ida dehan: “Ida ne’e, Ha’u nia Oan doben tebes, nebé Ha’u tau Ha’u domin. Imi rona Nia ba”. Rona lia-fuan hirak ne’e, sira monu taka oin ba rai, hakfodak teb-tebes. Jesus besik ba sira, hodi dehan: “Imi hamriik tiha ba, keta ta’uk”. Sira foti matan, la haré tan ema ida; sira haré de’it Jesus. Tun housi foho, Jesus hanourin sira: “Imi keta haktuir ba ema ida, buat nebé imi haré, wainhira Mane-Maksoyn la dauk moris hias housi mate”.

Lia Maksoyn.

Leave a Reply

Your email address will not be published. Required fields are marked *