shadow
Diocese de Dili > NOTÍCIAS > LETURA DIÁRIA > Terça – Feira, II Semana Tempo Quaresma (ANO A)

Terça – Feira, II Semana Tempo Quaresma (ANO A)

Primeira Leitura                Is. 1. 10, 16-20

Lia housi Livro Isaías nian:

Ulun sira Sodoma nian, rona Na’i nia futar lia ba; povo Gomorra nian sée tilun ba Ita nia Maromak nia ukunfuan: “Hafase imi an, hamos imi-an, hadook housi ha’u oin imi nia hahalok áat wa’in sira. Keta halo sala tan. Imi buka halo di’ak. Buka justiça ba; tulun ema nebé ema seluk hanehan. Tau matan ba oan kiak no feto faluk nia lia. Na’i dehan. Nune’e mai Ita ko’alia kona ba Ita nia lialós. Imi nia salan sira bele sai nu’udar escarlate; sira sei sai mutin hanesan maho-wen; bele mean karik hanesan hena mean púrpua; ikus mai sei sai hanesan kábas lan. Imi na’in rasik hakarak halo tuir karik, imi sei han rai ne’e nia bokur. Maibé, imi lakohi karik, imi hatudu imi laran áat, imi sei mate ho surik. Nune’e mak Na’i ko’alia tiha”.

Maromak Futar Lia.

 

Salmo Responsorial                                                                                                            Sal. 49(50). 8-9, 16bc-17,21 e 23 (R. 23b)

Refrão : Ba ema lós, ha’u sei hatudu Maromak Nia maksoyn!!! Repete-se

La’os tan ó nia sacrifício mak Ha’u sirak ó;

Ó nia buat-karan sira iha nafatin Ha’u oin.

Ha’u la simu karau oan housi ó uma,

La simu mós bibi oan sira housi ó nia luhan. Refrão

 

“tan sá ó ko’alia resin kona ba Ha’u ukunfuan,

No lori Ha’u aliança iha ó ibun;

Ó nebé la simu Ha’u lia hanourin

No hewai Ha’u nia liafuan sira? Refrão

 

Ó halo tiha buat ne’e, Ha’u nonok lerek;

Ó hanoin katak Ha’u hanesan ó,

Ema nebé hasa’e sacrifício hahi nian mak hana’i Ha’u.

Ba ema nebé tuir dalan lós,

Ha’u sei fó Maromak nia maksoyn. Refrão

 

Aclamação                                                                                                                                                                                           Ez. 18. 31

Refrão : Hahi ba Ita Jesus Cristo, Liurai Glória rohan laek nian!! Repete-se

Hakribi imi salan hotu, Na’i dehan,

Hakiak fuan oun ida no espírito foun ida. Refrão

 

Evangelho                                                                                                                                                                                       Mt. 23, 1-12

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba ema lubun boot ida no ba nia escolante sira, nune’e: “Em Fariseu no Escriba sira tur ona iha Moisés nia fatin. Imi buka halo tuir buat nebé sira hateten, maibé keta tuir sira nia hahalok; tan sira hateten, maibé la halo. Sira kesi naha halo todan hodi tau ba ema nia kbás; maibé sira rasik la book naha ne’e ho sira liman fuan. Sira halo buat hot-hotu atu ema haré sira; sira buka de’it fatin boot atu tur iha mesa; buka de’it fatin boot no di’ak iha sinagoga; buka de’it ema hotu atu haksolok sira iha fatin hot-hotu; hakarak ema halia sira ‘Mestre’. Maibé, imi keta husik ema halia imi ‘Mestre’; tan imi nia Mestre ida de’it, imi hotu mesak maun-alin. Iha rai, keta husik ema bolu imi ‘Aman’; tan imi aman ida de’it, Aman Lalehan. Keta husik bolu imi ‘Doutor’; tan imi nia doutor ida de’it mak Messias. Imi nebé mak boot liu, sei sai atan. Ema nebé foti-an, sei hatun nia; ema nebé haraik-an, sei hahi nia”.

Lia Maksoyn.

Leave a Reply

Your email address will not be published. Required fields are marked *