shadow
Diocese de Dili > NOTÍCIAS > LETURA DIÁRIA > III Domingo Quaresma (ANO A)

III Domingo Quaresma (ANO A)

Primeira Leitura                         Ex. 17, 3-7

Lia housi Livro Êxodo:

Iha loron hirak nebá, povo Israel terus ba hamrook, hahú hasouru Moisés, dehan: “Tan sá, ó hasai ami housi Egipto? Atu oho ami, oho ami nia oan sira, ho balada sira?” Tan ne’e, Moisés foti lian ba Na’i: “Ha’u halo sá lós ba povo ida ne’e? Koi-kois sira atu tuda mate ha’u!” Na’i dehan ba Moisés: “Ó liu housi Povo nia leet, hili katuas nian balu. Kaer iha liman oé nebé uluk ó hodi baku mota Nilo, imi hahú la’o. Ha’u sei iha ó nia oin, iha fatuk boot leten, iha foho Horéb. Ó sei baku fatuk boot ne’e, wé suli housi nia, povo sei bele hemu. Moisés halo hanesan ne’e, iha katuas Israel sira oin. Nia tau naran fatin ne’e: Massá no Meribá, katak: “Koko” no “Halolon”, basá, Israel oan sira haksesuk malu, hodi koko Maromak; sira dehan: “Maromak iha, ka la iha ita nia leet”.

Maromak Futar Lia.

 

Salmo Responsorial                                                                                                                                      Sal. 94 (95), 1-2. 6-7. 8-9ab

Refrão : Rona ohin Na’i nia lia, keta taka imi laran!!! Repete-se

Ma’i hotu, hananu haksolok,

Mai hahí ita Maksoyn.

Hahí haksolok ba hasouru ita Na’in,

Hananu knananuk ba ita Na’in. Refrão

 

Mai tuku tur ba rai,

Hana’i ita Na’in nebé halo ita moris.

Na’i, ita nia Maromak;

Ita nia povo Nia bibi oan. Refrão

 

Rona ohin Na’i nia lian, keta taka imi laran.

Hanesan iha Meribá, eh iha loron Massá,

Iha rai fuik-maran:

Imi nia beia-ala sira halo Ha’u iha nebá,

Sira sadik Ha’u, maski haré Ha’u nia kbiit. Refrão

 

Segunda Leitura                                                                                                                                                                   Rom. 5, 1-2, 5-8

Lia housi São Paulo nia Surat ba sarani sira iha Roma:

Maun-alin sira: Ita ema mós, tan fé; ne’e duni, ita Na’in Jesus Cristo, ita damen ho Maromak. Hodi Jesus Cristo, ita hetan tulun nebé ita simu iha fé. Ita sai boot, tan hatene katak ita sei tama iha Maromak nia glória. Ita sei la hein leet de’it, basá, hodi Espírito Santo nebé ita simu housi Maromak nia domin tama iha ita nia fuan. Wainhira ita sei kbiit laek, to’o ona loron, Cristo mate ba ema maksalak sira. Susar, ba ema ida fo an ba mate tan ema sala laek; mate tanba ema di’ak ida, ema ruma kala sei barani  fo an ba mate. Ne’e duni, Maromak hatudu Nia domin mai ita nune’e: Cristo mate tan ita, wainhira ita sei ema maksalak.

Maromak Futar Lia.

 

Aclamação                                                                                                                                                                                      Jo. 4, 42, 15

Refrão : Hahí nafatin, hasai kbiit ba Liurai!! Repete-se

Na’i, Ita mundo nia Maksoyn;

Haraik wé moris mai ami,

Atu keta hamrook teni. Refrão

 

Evangelho (forma Longa)                                                                                                                                                               Jo. 4, 5-42

Na’i Jesus Cristo nia Evangelho nu’udar São João haktuir:

Iha tempo nebá, Jesus to’o tiha cidade Samaria nian ida, naran Sicar, besik toos nebé Jacob fo hela ba José. Jacob nia wé-matan iha nebá. Jesus la’o kole ona, Nia tur iha wé-matan. Loron besik fahe-rua. Feto Samaria nian ida mai kuru wé. Jesus dehan ba nia: “Fó wé mai Ha’u, atu hemu”. Escolante sira ba cidade, hola ai-han. Feto hatán ba nia dehan: “Oin sá mak Ó ema Judeu ida, husu wé mai ha’u, ema Samaritana?” Ema Judeu sira ho ema Samaritano sira la haré malu di’ak. Jesus simu hodi dehan: “Ó hatene karik Maromak nia tulun, ó hatene karik Ema nebé dehan ba ó: ‘Fó wé mai Ha’u hemu’, ó mak sei husu ba Nia, Nia sei fó wé moris ba ó”. Feto dehan ba Nia: “Na’i, Ita kuru fatin ida la iha, wé-matan mos klean. Ita hetan wé moris oin sá? Ita kala boot liu fali ami nia aman Jacob, nebé fó wé-matan ne’e mai ami, nia rasik hemu, nia oan sira, nia balada sira mos hemu?” Jesus hatán: “Ema nebé hemu wé ne’e sei hamrook fali. Se hemu wé nebé Ha’u fó, sei la hamrook tan. Wé nebé Ha’u fó ba nia, sai nu’udar wé-matan ida iha nia suli ba moris rohan laek”. Feto dehan: “Na’i, fó wé ne’e mai ha’u, atu ha’u keta hamrook, atu keta mai kuru tan iha ne’e”. Jesus dehan: “Ba bolu ó nia laen, imi na’in rua mai”. Feto hatán: “Ha’u laen la iha”. Jesus dehan: “Ó dehan lós, ó laen la iha; basá ó iha laen lima; ida be ó iha daudaun ne’e, laós ó nia laen. Kona ba ne’e, ó hateten lós”. Feto hatán: “Na’i, ha’u haré Ita Profeta. Ami nia bei-ala sira adora iha foho ida ne’e; imi dehan fali katak iha Jerusalém mak ema sei adora”. Jesus dehan tenik: “Feto, ó bele fiar iha Ha’u: loron sei to’o, imi sei adora Aman, iha foho ne’e mos lae, iha Jerusalém mos lae. Imi adora buat nebé imi la hatene; ami adora buat nebé ami hatene, basá, Maksoyn mai housi Judeu sira. Maibé, loron atu to’o daudaun ona – loron to’o duni ona – ema sira nebé adora lolós, sei adora lolós Aman tuir Espírito, basá, Aman hakarak ema adora Nia nune’e. Maromak Espírito duni; ema sira nebé adora Nia, adora lolós Nia, tuir Espírito”. Feto dehan ba Nia: “Ha’u hatene katak Messias sei mai, ida be naran Cristo. Nia mai, Nia sei hanourin buat hotu”. Jesus hatán: “Ha’u duni mak ko’alia daudaun ho ó ne’e”. Escolante sira mos to’o mai ona. Sira hakfodak, tan haré Jesus ko’alia hela ho feto ida; maibé sira ida la husu ba Nia: “Ita hakarak sá ida!” eh “Tan sá Ita ko’alia ho nia?” Feto husik tiha wé fatin, nia ba cidade hateten ba ema sira: “Imi mai haré Mane ida, nebé hateten sai buat hotu nebé ha’u halo. Nia mak Messias karik?” Sira sai housi cidade, ba buka Jesus: Escolante sira dehan ba Jesus: “Mestre, han ba!” Jesus dehan ba sira: “Ha’u iha ai-han ida imi la hatene!” Escolante sira husu ba malu: “Ema ruma lori ai-han mai Nia karik?” Jesus dehan ba sira: “Ha’u nia ai-han, halo tuir Ida be haruka Ha’u mai Nia hakarak, hodi halo buat Nia haruka. Imi la dehan katak sei hela tan fulan haat atu sohi ai-fuan? Maibé, Ha’u dehan ba imi: imi foti matan, haré ba toos: tasak hotu ona, hein atu sohi. Ema be sohi, manán osan, hodi ku’u ai-fuan ba moris rohan laek; nune’e ema nebé kuda toos, sohi ho ksolok. Ida ne’e hatudu lolós lia nebé rona fila-fila: ‘Ida kuda tiha, ida seluk sohi’. Ha’u haruka imi sohi buat nebé imi la kuda. Ema seluk tiha mak kaer serviço, imi mai hetan de’it buat sira halo”. Ema barak housi cidade Samaria nian fiar iha Jesus, tan feto dehan: “Nia dehan buat hotu nebé ha’u halo”. Tan ne’e, ema Samaritano sira mai hasouru Jesus, husu ba Nia, atu hela hamutuk ho sira. Nia hela iha nebá loron ruma. Barak liu tan fiar, tanba Nia lia-fuan; ne’e duni, sira dehan ba feto ne’e: “Laós tanba buat sira ó dehan, mak ami fiar. Ami rasik rona, ami hatene katak Nia, lós duni, Maksoyn mundo nian!”

Lia Maksoyn.

 

Evangelho (Forma Breve)                                                                                                                     Jo. 4, 5. 15. 19b-26. 39a. 40-42

Na’i Jesus Cristo nia Evangelho nu’udar São João haktuir:

Iha tempo nebá, Jesus to’o tiha cidade Samaria nian ida, naran Sicar, besik toos nebé Jacob fo hela ba José. Jacob nia wé-matan iha nebá. Jesus la’o kole ona, Nia tur iha wé-matan. Loron besik fahe-rua. Feto Samaria nian ida mai kuru wé. Jesus dehan ba nia: “Fó wé mai Ha’u, atu hemu”. Escolante sira ba cidade, hola ai-han. Feto hatán ba nia dehan: “Oin sá mak Ó ema Judeu ida, husu wé mai ha’u, ema Samaritana?” Ema Judeu sira ho ema Samaritano sira la haré malu di’ak. Jesus simu hodi dehan: “Ó hatene karik Maromak nia tulun, ó hatene karik Ema nebé dehan ba ó: ‘Fó wé mai Ha’u hemu’, ó mak sei husu ba Nia, Nia sei fó wé moris ba ó”. Feto dehan ba Nia: “Na’i, Ita kuru fatin ida la iha, wé-matan mos klean. Ita hetan wé moris oin sá? Ita kala boot liu fali ami nia aman Jacob, nebé fó wé-matan ne’e mai ami, nia rasik hemu, nia oan sira, nia balada sira mos hemu?” Jesus hatán: “Ema nebé hemu wé ne’e sei hamrook fali. Se hemu wé nebé Ha’u fó, sei la hamrook tan. Wé nebé Ha’u fó ba nia, sai nu’udar wé-matan ida iha nia suli ba moris rohan laek”. Feto dehan: “Na’i, fó wé ne’e mai ha’u, atu ha’u keta hamrook, atu keta mai kuru tan iha ne’e”. Ha’u haré Ita Profeta. Ami nia bei-ala sira adora iha foho ida ne’e, maibé imi dehan katak adora fatin iha Jerusalém”. Jesus dehan tenik: “Feto, ó bele fiar Ha’u: loron sei to’o, imi sei adora Aman laós iha foho ne’e ka Jerusalém. Imi adora buat nebé imi la hatene; ami adora buat nebé ami hatene, basá, Maksoyn mai housi Judeu sira. Maibé, loron sei to’o – loron to’o duni ona – wainhira ema sira ne’e hadomi lolós, sei adora Aman tuir Espírito no lialós, basá, Aman hakarak ema adora Nia nune’e. Maromak Espírito duni; Nia emar sira be adora Nia, adora tuir Espírito no lialós”. Feto dehan ba Nia: “Ha’u hatene katak Messias, ida be bolu katak Cristo sei mai. Nia mai, Nia sei hanourin buat sira ne’e hotu”. Jesus hatán: “Ha’u duni mak ko’alia daudaun ho ó ne’e”. Ema barak housi cidade Samaria fiar Jesus, tanba feto ne’e dehan: “Nia dehan mai ha’u buat hotu nebé ha’u halo”. Tan ne’e, Samaritano sira nebé mai hasouru Jesus, husu ba Nia atu hela hamutuk ho sira. Nia hela ho sira loron rua. Sira barak liu fiar, tan Nia liafuan, ne’e duni sira dehan ba feto ne’e: “ Oras ne’e ami fiar, laós tanba liafuan hirak nebé ó dehan. Ami rasik rona, ami hatene katak Nia, lós duni, Maksoyn mundo nian!”

Lia Maksoyn.

Leave a Reply

Your email address will not be published. Required fields are marked *