shadow
Diocese de Dili > NOTÍCIAS > Notícias > Arcebispo de Dili Ordena Frater nain Tolu ba grau Diaconado

Arcebispo de Dili Ordena Frater nain Tolu ba grau Diaconado

19 Março 2020 (DCAD) – Iha Solenidade Festa São José, Virgem Santa Maria nia kaben nian ne’e, Arcebispo Arquidiocese de Dili Dom Virgílio do Carmo da Silva, SDB ordena foinsae nai tolu; Frater Florindo de Jesus (Aileu). Fr. Helio da Costa Nunes (Maubisse), no Fr Inocencio Barreto Lopes (Maubisse) ba grau diaconado nian, iha SE Catedral Arquidiocese de Dili.

Arcebispo Arquidiocese de Dili Dom Virgílio do Carmo da Silva, SDB dehan iha nia homilia katak Iha Solenidade Festa São José, Virgem Santa Maria nia kaben nian ne’e, ita haksolok tanba dala ida tan ita sente duni Na’i Maromak nia domin boot oinsa mai ita nia Arquidiocese hodi bolu tan foinsa’e nain tolu husi ita nia leet, atu hakat besik liu tan ba Na’i Maromak, atu Na’i Maromak consagra sira, atu sira bele saran sira nia an serbi de’it Na’i Maromak no ninia povo.

 “Ita hotu nia sorumutuk dader ida nee ninian sai realidade ida tanba foinsae nain tolu nebe hatudu sira nia prontidão atu hatan ba Na’i Maroamk nia bolu. Sira ida-idak iha sira nia história; iha sira nia nakukun no sira nia dúvidas. Liu husi experiência sira nee hotu, sira mos comprende duni no laos buka sira nia hakarak de’it, maibe buka Maromak nia vontade. Sira aprende atu mate ba sira nia hakarak atu moris de’it ba Na’i Maromak, dehan Arcebispo de Dili Dom Virgílio do Carmo da Silva, SDB iha ninia homilia iha SE Catedral Dili.

Arcebispo de Dili Dom Virgílio do Carmo da Silva haktuir, simu ordenação diaconado laos tan ona hanesan jovem bai-bain, maibe imi joven ministro Maromak nian.

“Wainhira imi hili hakarak atu sai diácono katak imi tem que renuncia total, halo mudança ida, halo opção ida nebe fundamental hodi husik buat hotu, hanoin de’it atu fo, atu saran an tomak atu serbi Maromak. Husik buat hotu katak husik sasan sira mundo ne’e nian hodi halo tuir de’it Maromak nia vontade hanesan São José. Iha ordenação ninian frase nebe temi bebeik “Fiar iha buat nebe o lê, hanorin buat nebe o fiar, moris tuir buat nebe o hanorin”. Kaer ba iha Amo Papa ninia carta nebe wainhira koalia kona ba ida frase ne’e, nu’udar ministro Maromak ninian, Papa dehan “La to’o de’it atu hatene interpreta Maromak ninia liafuan, maibe buat nebe precisa fo atenção liu mak precisa hakbesik Maromak nia liafuan ho fuan ida nebe nakloke harohan ninian”, hateten Arcebispo de Dili Dom Virgílio do Carmo da Silva. (Alin Soares)

Leave a Reply

Your email address will not be published. Required fields are marked *