shadow
Diocese de Dili > NOTÍCIAS > HOMILIA DO BISPO > Solenidade São José, Esposo da Virgem Maria

Solenidade São José, Esposo da Virgem Maria

Iha Solenidade Festa São José, Virgem Santa Maria nia kaben nian ne’e, ita haksolok tanba dala ida tan ita sente duni Na’i Maromak nia domin boot oinsa mai ita nia Arquidiocese.

NIA hatudu mai ita hodi bolu tan foinsa’e nain tolu husi ita nia leet, atu hakat besik liu tan ba Na’i Maromak, atu Na’i Maromak consagra sira, atu sira bele saran sira nia an serbi de’it Na’i Maromak no ninia povo.

Wainhira Na’i Maromak bolu ema ida, NIA bolu ba knar ida, ba missão ida. Ida ne’e laos novidade ida mai ita, basá desde uluk mai to’o ohin loron Na’i Maromak continua bolu ema ho nia dalan oi–oin, ho nia maneira rasik.

Nune’e atu realiza Maromak nia plano aliança domin nian ne’e, Na’i Maromak livremente fihir ema ida hosi ema seluk nia le’et. Hanesan iha história salvífica ninian Na’i Maromak fihir Abraão atu hosi nia graça no bença Na’i Maromak ninian bele daet ba ema hot-hotu. Laiha ema ida nebe bele dehan katak nia meresse ou nia soi duni ba ida ne’e.

Salvação ne’e Na’i Maromak nia don ida. Certamente NIA fo ba ida nebe hatene ho fuan no laran buka moris tuir Maromak nia plano. NIA fo ba hirak nebe hatene tau sira nia an iha Maromak nia domin.

Abrão fiar iha Maromak nia Liafuan. Maromak sei haraik ba nia oan ida, nia tau confiança tomak iha Maromak maske susar, maibe nia fiar la nakdoko. Fiar iha Maromak hatudu iha nia haraik an no fiar iha Maromak hatudu nia hatene atu halo tuir. Ida ne’e mak São José sai figura boot iha história salvação ninian. Tan ne’e, ohin Santa Kreda iha mundo rai klaran hateke ba nia nudar modelo liu-liu ba aman no chefe da familia.

São José ema nebe justo ho Maromak ho mos nia maun-Alin sira. ida nee hatudu liu-liu iha São José ninia relação ho Virgem Maria. Wainhira nia hanoin atu husik Maria, maibe Na’i anjo mosu ba nia dehan; José David nia oan keta tauk simu Maria nu’udar ó nia kaben basá nia kous hodi Espírito Santo nia kbiit.

São José consege tama iha Na’i Maromak nia mehi. Tan nee hader husi mehi José halo tuir buat nebe Anjo dehan ba nia. São José cumpre Maromak nia vontade maske nia lori hela dúvida boot. Saida mak ema sei koalia kona ba ida nee! Nee mak ita dehan momento nebe nakukun iha São José nia moris. Nakukun boot ida iha nia moris iha nebe nia rasik mos susar atu enfrenta basá ida ne’e mistério boot ida.

Maluk doben sira!!

Ita celebra daudaun Solenidade São José nian iha tempo quaresma. Durante tempo hirak nia laran, Santa Kreda convida ita atu fila fali ba Maromak. Fila fali atu descobre Maromak nia vontade mai ita ida idak. Maromak nia vontade sai realidade iha ita nia moris exige mos ita atu mate ba ita nia an no mate ba ita nia plano, mate ba ita nia mehi sira.

Ida ne’e mak São José buka hatudu mai ita iha nia moris. São José nia dúvida no nia nakukun sai maka’as liu tan wainhira nia defende no preocupa tebes ho nia hakarak. Maibe wainhira nia husik Maromak nia mehi sai nia mehi. Wainhira nia aprende atu sai Maromak nia vontade, aprende atu abandona nia an ba Maromak nia vontade, mate ba nia an, mate ba nia plano mak São José bele simu Maromak nia hakarak ne’e ho paz no serenidade.

Maluk doben sira!!

Iha contexto ida nee São José convida mos ita atu la buka manan de’it, maibe aprende atu comprende malu, aprende atu mate ba ita nia hakarak, nunee ita bele construi dame, unidade iha família laran.

São José la hanion de’it atu salva virgem Santíssima, maibe nia hanoin liu Maromak nia plano atu salva humanidade tomak.

Ita hotu nia sorumutuk dader ida nee ninian sai realidade ida tanba foinsae nain tolu nebe hatudu sira nia prontidão atu hatan ba Na’i Maroamk nia bolu.

Sira ida-idak iha sira nia história; iha sira nia nakukun no sira nia dúvidas. Liu husi experiência sira nee hotu, sira mos comprende duni no laos buka sira nia hakarak de’it, maibe buka Maromak nia vontade. Sira aprende atu mate ba sira nia hakarak atu moris de’it ba Na’i Maromak.

Ne’e duni, imi simu ordenação diaconado ona imi laos ona hanesan jovem bai-bain, maibe imi joven ida ministro Maromak nian. Wainhira imi hili hakarak atu sai diácono katak imi tem que renuncia total, halo mudança ida, halo opção ida nebe fundamental hodi husik buat hotu, hanoin de’it atu fo, atu saran an tomak atu serbi Maromak. Husik buat hotu katak husik sasan sira mundo ne’e nian hodi halo tuir de’it Maromak nia vontade hanesan São José.

Iha ordenação ninian frase nebe temi bebeik “Fiar iha buat nebe o lê, hanorin buat nebe o fiar, moris tuir buat nebe o hanorin”. Kaer ba iha Amo Papa ninia carta nebe wainhira koalia kona ba ida frase ne’e, nu’udar ministro Maromak ninian, Papa dehan “La to’o de’it atu hatene interpreta Maromak ninia liafuan maibe buat nebe precisa fo atenção liu mak precisa hakbesik Maromak nia liafuan ho fuan ida nebe nakloke harohan ninian”.

São José laos pregador ida, maibe husi nia experiência moris nian, hakarak fo hanoin mai ita hotu, liu-liu ba imi nain 3 katak, eficiência imi nia ministério diaconado nian ne’e, sei hetan liu-liu iha imi nia intimidade ho Na’i Maromak, fiar buat nebe imi lê, hanorin buat nebe imi fiar, moris tuir buat nebe imi hanorin.

São José Jesus nia aman hakiak, mahein Uma Kreda ninian, cuida nia família ho Espírito serbi ho haraik an ninian. Mai ita aprende husi nia siléncio hodi hatene serbi Na’i. Ita harohan atu Na’i hanorin ita tuir exemplo São José ninian atu ita bele moris tuir projecto da vida ida mak tuir Maromak nia vontade, ita harohan atu ita hotu aprende husi São José atu halo ita nia moris hanesan knananuk ida hodi hahi Na’i Maromak.

Leave a Reply

Your email address will not be published. Required fields are marked *