shadow
Diocese de Dili > NOTÍCIAS > LETURA DIÁRIA > IV Domingo Quaresma (ANO A)

IV Domingo Quaresma (ANO A)

Primeira Leitura          1 Sam. 16, 1b, 6-7, 10-13a

Lia housi Livro Samuel nian:

Iha loron hirak nebá, Na’i lia tun ba Profeta Samuel: “Tau mina nakonu iha nia fatin, atu lori. Ha’u atu haruka ó ba Jessé, Belém nian, basá, Ha’u hili nia oan ida ba liurai”. Wainhira Profeta to’o, sira hotu mai hasouru nia; Samuel haré sira ida naran Eliab nia hanoin iha laran: “Ida ne’e Na’i hili atu simu mina mak ne’e duni”. Maibé, Na’i dehan ba Samuel: “Ó  keta haré nia housi de’it liur, ka nia ain-aas ne’e, basá, Ha’u hakribit nia. Maromak la haré nu’udar ema haré: ema haré housi liur de’it; Na’i haré fuan”. Jessé haruka nia oan na’in hitu liu housi Samuel oin, maibé Samuel dehan ba nia: “Na’i la hili sira ne’e ida”. Nia husu ba Jessé: “Ó nia labarik sira mak ne’e hotu?” Jessé hatán: “Sei iha ida kiik liu, nebé hein balada”. Samuel dehan ba nia: “Haruka bolu nia, basá, nia la mai, ita la tur iha mesa”. Jessé haruka bolu nia: nia fuuk mean, matan, matan kmook, oin furak. Na’i dehan ba Samuel: “Ó hamriik, kose mina liurai ba nia; nia mak ne’e duni!” Samuel kaer mina fatin, kose mina ba nia, iha nia maun sira leet. Housi loron ne’e ba oin, Na’i nia Espírito tama iha David.

Maromak Futar Lia.

 

Salmo Responsorial                                                                                                                                     Sal. 22 (23), 1-3a. 3b-4. 5. 6

Refrão : Na’i, ha’u nia dalan di’ak; Ha’u sei la hetan susar!!! Repete-se

Na’i, ha’u nia dalan di’ak, ha’u sei la susar:

Halo mahan iha fatin matak,

Lori ha’u ba wé-matan kmook,

Haraik kbiit mai ha’u. Refrão

 

Hala’o ha’u iha dalan lós,

Atu hahí Nia naran.

Sei liu housi nakukun, maibé la tauk:

Ita la’o ho ha’u, Ita tahan ha’u. Refrão

 

Iha ema aat sira oin,

Ita hadi’a hela fatin di’ak mai ha’u.

Tau mina-morin iha ha’u ulun;

Ha’u nia hemu fatin nakonu. Refrão

 

Ita nial aran luak no di’ak

Hala’o ha’u iha ha’u nia moris tomak.

Sei hela iha Na’i nia kadunan

Wainhira ha’u sei moris. Refrão

 

Segunda Leitura                                                                                                                                                                              Ef. 5, 8-14

Lia housi São Paulo nia Surat ba sarani sira iha Êfeso:

Maun-alin sira: Uluk imi nakukun, ohin loron imi naroman, tan hamutuk ho Na’i. Imi buka moris tuir naroman oan. Basá, naroman mak haki’ak laran luak, justice no lialós. Imi keta tuir hahalok nakukun nian sira, basá, sira la folin buat ida; imi hakribit tiha sira, basá, buat nebé ema sira ne’e halo, ita moe atu dehan. Buat hotu nebé aat, naroman mak hatudu sai, basá, buat hotu ema hare, tan naroman. Tan ne’e ema dehan: “Hadér, ó be toba ne’e, hamriik housi mate sira leet, Cristo nabilan iha ó!”.

Maromak Futar Lia.

 

Aclamação                                                                                                                                                                                           Jo. 8, 12b

Refrão :  Ami hahí Cristo, Maromak lia-fuan!! Repete-se

Na’i ko’aliá: Ha’u mundo nia naroman;

Sê tuir Ha’u, sei hetan naroman. Refrão

 

Evangelho (forma Longa)                                                                                                                                                            Jo. 9, 1-41

Na’i Jesus Cristo nia Evangelho nu’udar São João haktuir:

Iha tempo nebá, Jesus liu daudaun, Nia haré ema ida matan delek houri moris mai. Escolante sira husu ba Nia: “Mestre, sê lós mak halo sala, nia, ka nian inan-aman sira, mak nia moris mai matan delek?” Jesus hatán ba sira: “Nia la sala, nia inan-aman sira mos la sala; maibé, ne’e atu hatudu buat hirak Maromak halo iha nia. Ita lolós kaer serviço, wainhira sei loron, hodi halo Ida be haruka Ha’u mai ne’e Nian serviço”. Dehan tiha ne’e, Nia tafui ba rai, halo taho ho kabén, hafoin, Nia kose taho ne’e ba matan delek nia matan, hodi dehan ba nia: “Ó fase iha wé-matan Siloé nian”. Siloé katak “haruka ba”. Nia ba fase, fila mai, nia haré. Ema sira nebé hela besik nia, ho sira hotu nebé uluk haré nia husu esmola, husu ba malu: “Laós ida ne’e mak uluk, tur husu esmola?” Balun dehan: “Nia!” Balun fali dehan: “Laós nia! Atu hanesan nia!” Nia rasik dehan: “Ha’u duni!” “Ema ida be naran Jesus ne’e, halo taho, kose mai ha’u nia matan, hodi dehan: “Ba fase iha Siloé. Ha’u ba fase, ha’u hahú haré”. Sira husu tan: “Nia iha nebé?” Nia hatán: “Ha’u la hatene”. Sira lori ema be uluk matan delek ne’e ba fariseu sira. Loron nebé Jesus halo taho, hodi loke nia matan ne’e, loron sábado ida. Fariseu sira mos husu ba nia, oin sá nia hahú haré? Nia dehan ba sira: “Jesus tau taho mai ha’u nia matan, hafoin ha’u ba fase, oras ne’e ha’u haré”. Fariseu balun dehan: “Ema ne’e la mai housi Maromak, basá, nia la halo tuir sábado”. Balun dehan: oin sá  mak ema maksalak ida bele halo milagre ida hanesan ne’e?” Sira lia la tuir malu. Sira husu fali ba matan delek ne’e: “Ó dehan to’ok, ida be loke ó nia matan ne’e, nia ema sê?” Nia hatán: “Profeta ida”. Judeu sira lakohi fiar katak ema ne’e uluk matan delek hafoin hahú haré: sira bolu ida be foin matan di’ak ne’e nia inan-aman. Sira husu nune’e ba sira: “Ida ne’e mak imi nia oan, ida be imi dehan moris mai matan delek? Nusá mak nia oras ne’e haré?” Nia inan-aman hatán: “Ami hatene katak ida ne’e ami nia oan, moris mai matan delek. Maibé, ami la hatene, halo nusá mak oras ne’e nia hare, sê mak loke nia matan, ami la hatene. Imi husu nia ba; nia otas ona: nia rasik ko’alia”. Nia inan-aman ko’alia hanesan ne’e, tan sira ta’uk Judeu sira. Basá, judeu sir alia la tuir malu ona: ema ruma fiar karik katak Jesus mak Messias, duni sai kedas housi Sinagoga. Tan ne’e, mak nia inan-aman dehan: “Nia otas ona, imi husu ba nia”. Sira bolu dala ida tan ema oan be uluk matan delek ne’e, hodi dehan ba nia: “Ó hahí Maromak ba. Ami hatene katak ema ne’e maksalak”. Nia hatán: “Nia ema maksalak ka lae, ha’u la hatene. Ha’u hatene de’it katak uluk ha’u matan delek, oras ne’e ha’u haré”. Sira husu ba nia: “Nia halo sá ida ba ó? Oin sá mak Nia loke ó nia matan?” Nia hatán: “Ha’u dehan ona ba imi, imi la rona! Tan sá imi hakarak rona hikas? Imi mos hakarak sai Nia Escolante ka?” Sira hateten aat nia, hodi dehan: “Ó mak nia Escolante: ami Moisés nia escolante. Ami hatene katak Maromak ko’alia ba Moisés; maibé ida ne’e, ami la hatene, Nia mai housi nebé!” Nia hatan: “Lós duni, ida ne’e halo ita sai hakfodak: imi la hatene Nia mai housi nebé, maibé Nia loke ha’u nia matan! Ita hatene katak Maromak la rona ema maksalak sira; maibé ema ruma oração-na’in karik, halo tuir Maromak nia hakarak, Maromak rona nia. Houri uluk liu to’o oras ne’e, seidauk rona katak ema maksalak ida loke matan delek houri moris, nia matan. Nia la mai karik housi Maromak, Nia la bele halo buat ida”. Sira hatá ba nia: “Ó moris tomak iha sala laran, ó hakarak hanourin fali ami?” Sira duni sai nia. Jesus rona katak sira duni sai nia. Liu tiha, Jesus hetan nia, dehan ba nia: “Ó fiar Mane-Maksoyn?” Nia hatán: “Na’i, Nia sé, atu ha’u nia fiar iha Nia?” Jesus hatán: “Ó haré tiha ona Nia; Nia mak ko’alia daudaun ho ó”. Ema oan dehan: “Na’i, ha’u fiar!” Nia hakneak iha Jesus futar oin. Jesus dehan: “Atu halo justiça ida, mak Ha’u mai iha mundo ne’e: ema sira be la haré, sei haré; ema sira be haré, sira matan delek”. Fariseu balun be hamutuk ho Nia, rona lia-fuan hirak ne’e, sira husu ba Nia: “Ami mos matan delek?” Jesus hatán ba sira: “Imi matan delek karik, imi la halo salan. Maibé, tanba imi dehan: ‘ami haré, imi nia salan hela nafatin”.

Lia Maksoyn.

 

 

Evangelho (forma Breve)                                                                                                                                Jo. 9, 1. 6-9. 13-17. 37-38

Na’i Jesus Cristo nia Evangelho nu’udar São João haktuir:

Iha tempo nebá, Nia haré ema ida matan delek houri moris mai. Nia tafui ba rai, halo taho ho kabén; hafoin, Nia kose taho ne’e ba matan delek nia matan, hodi dehan ba nia: “Ó fase iha wé-matan Siloé”. Siloé katak “haruka ba”. Nia fase tiha, fila mai, nia haré. Ema sira nebé hela besik nia, ho sira hotu nebé uluk haré nia husu esmola, husu ba malu: “Laós ida ne’e mak uluk, tur husu esmola?” Balun dehan: “Nia!” sira seluk fali dehan: “Laós! Atu hanesan nia!” Sira lori ema oan matan delek ne’e ba fariseu sira. Loron nebé Jesus halo taho, hodi loke nia matan ne’e, loron sábado. Fariseu sira mos husu ba nia, oin sá nia hahú haré. Nia dehan ba sira: “Jesus tau taho ba ha’u nia matan, hafoin ha’u ba fase, oras ne’e ha’u haré”. Fariseu balun dehan: “Ema ne’e la mai housi Maromak, basá, nia la halo tuir sábado”. Sira seluk dehan: oin sá mak ema maksalak ida bele halo milagre hanesan ne’e?” Sira lia la tuir malu. Sira husu fali ba ema ba matan delek: “Ó dehan to’ok, ida be loke ó nia matan ne’e, nia ema sê?” Ema oan hatán: “Nia Profeta ida”. Sira dehan: “Ó, ida be moris tomak iha sala laran, hakarak hanourin fali ami?” Sira duni sai nia. Jesus rona katak ema duni sai nia. Hafoin, hetan nia, Jesus dehan ba nia: “Ó fiar Mane-Maksoyn?” Nia hatán: “Maibé sê, Na’i, atu ha’u bele fiar Nia?” Jesus dehan: “Ó haré tiha ona Nia; Nia mak ko’alia daudaun ho ó ne’e”. Ema oan dehan: “Ha’u fiar, Na’i!” Nia hakneak iha Jesus futar oin.

Lia Maksoyn.

Leave a Reply

Your email address will not be published. Required fields are marked *