shadow
Diocese de Dili > NOTÍCIAS > REFLEXÃO > Conversão, muda hanoin

Conversão, muda hanoin

Waldimiro Afonso VIANA

Estudante Teologia iha Instituto de Filosofia e de Teologia – ISFIT Dom Jaime Garcia Goulart,

no Seminarista iha Seminário Maior São Pedro no São Paulo Fatumeta, Dili.

oras ne’e estuda iha Pontificio Universidade Urbaniana, Roma

 

Ita besik ona remata tempo Quaresma. Lia bolu: «Convertei-vos!» (cfr. Mc 1,5; Mt 4, 17); Fila imi fuan! Fila imi laran! Muda imi hanoin! Sai lia convite ba festa Pascoa. Metanoia, lia grega ida ne’e composto husi meta (hakat-liu/para além) no noia (hanoin/conhecimento). Baibain metanoia traduz ba conversão, muda hanoin. Ou hakat-liu hanoin nebé sala. Fila direção, fila-fila ba origem. Hakat-liu o nia hanoin (an). Basá iha mundo ne’e «Para além de hau, iha mos ema seluk». Laos Hau mesak deit mak existe maibe existe mos o, nia, ita, sira, imi no ami. Para além de Hau, existe mos O. Naran katak keta iha Nia entre O ho Hau. Hehehe!

Muda hanoin. Tansa? Tamba ita nia “hahalok” depende ba ita nia “hanoin”. Ita nia modo de agir depende ba ita ninia modo de pensar. Maske dalaruma hanoin los, maibe halo sala, ne’e normal, basá ita ema. Expressão latina ida dehan: Errare humanum est, perseverare autem diabolicum. Halo sala, ne’e hahalok ema nian; hela iha sala, ne’e hahalok diabo nian.

Muda hanoin. Sê mak sai fundamento? Maromak rasik. Iha ne’e, metanoia significa fila direção, fila-fali ba origem. Maromak mak ita nia origem. Basá sala/pecado hado’ok ita husi Maromak. Metanoia mos significa hakat-liu ita nia hanoin (an). Muda ita nia hanoin (an) atu «hanoin tuir Maromak nia hanoin». Maromak ninia hanoin/hakarak – ita bele dehan – mak humanidade tomak nia diak. Labele hanoin an deit. Muda hanoin an (egoismo, partidarismo, grupuísmo…) hodi hanoin ba humanidade tomak.

Muda hanoin. Tempo Quaresma prepara ita atu celebra festa Pascoa liu husi jejum (tahan an rasik), oração (relação ho Maromak) no caridade (relação ho ema seluk). Nune’e metanoia hatudu atitude ida nebé «molok hanoin an, hanoin uluk Maromak, hanoin ema seluk no hanoin mos natureza». Se o protege natureza, natureza sei protege o. Se natureza hatauk o, Maromak sei cuidado o. Labele hanoin an deit. Nudar namorado, hanoin uluk o nia namorada. Nudar kaben-nain, hanoin uluk o nia káben. Nudar aman/inan, hanoin uluk oan sira. Nudar politico, hanoin uluk povo, la tauk lakon poder. Nudar nailulik, hanoin uluk sarani sira nia diak. Nudar funcionario, hanoin uluk atendimento publico. Nudar medico, hanoin uluk paciente nia saúde. Hanesan negociante, hanoin uluk consumidor, keta hanoin deit lucro bo’ot. Hanesan condutor, hanoin uluk passageiro nia vida, keta ansi atu to’o lalais fatin destinado. Hanesan jornalista, hanoin uluk atu hato’o notícia certa e precisa, keta dirige opinião publica. Hanesan Pntl/F-Fdtl, hanoin uluk segurança/estabilidade maske vida rasik iha risco, nst

Muda hanoin. Muda an. Iha mundo animal nian, ida nebé mak bele sai exemplo? Borboleta. Sei kiik [seidauk iha poder] nia nu’u ular-oan be hatauk ema. Maibe wainhira bo’ot [hetan poder] nia muda an ba borboleta nebé halo ema barak gosta hakbesik ba nia. Diferente ho samea. Sei kiik deit hatauk ona, sa tan bo’ot. Samea truka kulit maibe la muda an. Hanesan mos ho ema/grupo ou organização nebé naran truka tun sae. Posição muda ba mai. Maibe nia an nafatin deit. Nune’e ita la iha progresso. Iha sociedade ida nebé egoista, ema hanoin an deit, sistema bele muda ba mai, ninia an la muda, ita mate fatin. Sistema hafoun beibeik maibe ema tuan [laiha hanoin foun] la muda ninia hanoin, ita mak nune’e hela deit. Sistema maske ladun diak, ema tuan [maibe ho hanoin foun], iha esforço maximo, serviço ho boa vontade sem egoismo, hau fiar katak iha progresso maske neineik. Nune’e Quaresma tempo atu halo mudança: muda ita nia hanoin, muda ita nia an, laos troka kulit.

Muda hanoin. Muda naran. Muda an. Iha Biblia, personagem barak nebé bele sai exemplo ba conversão. Iha Antigo Testamento, ita bele aprende husi liurai David, ukun nain nebé muda nia hanoin, muda nia an, reconhece nia sala iha Maromak nia oin. Iha Novo Testamento, ita bele aprende husi São Pedro: husi Simão muda naran [muda an] ba Pedro. Hafoin São Paulo: husi Saulo muda naran [muda an] ba Paulo. Pecador maibe convertido. Pecador maibe perdoado. Iha duni sira nia an nebé transformado ne’e mak Jesus confia Ninia Igreja!

Muda hanoin. Wainhira o sei foinsa’e, o ninia hanoin, sim, sei focus ba o nia an rasik – laos egoismo – maibe wainhira kaben-nain ona, o sei hanoin uluk ba o nia família nia diak. Hafoin wainhira o sai governante karik, o sei hanoin uluk povu tomak nia diak. Keta sai governante nebé hanoin deit nia an, nia familia, nia grupo, nia partido… Povo mak hili ita ba “ukun” no labele lori fali “ukun” ne’e hanehan povo!  

Muda o nia hanoin, muda o nia an iha dalan ba festa Pascoa!

 

Roma, Março 2020

2 comments on “Conversão, muda hanoin

Leave a Reply

Your email address will not be published. Required fields are marked *