shadow
Diocese de Dili > NOTÍCIAS > LETURA DIÁRIA > Quarta – Feira, V Semana Tempo Quaresma (ANO A)

Quarta – Feira, V Semana Tempo Quaresma (ANO A)

Primeira Leitura  Dan. 3. 14-20, 91-92, 95

Lia  housi Profecia Daniel nian:

Iha loron hirak nebá, Nabucodonosor, liurai Babilónia nian, hateten ba klosan Israel na’in tolu: “Los duni ka la’e, Sidrac, Misac no Abdénago, imi la hahí hana’i ba ha’u nia maromak; imi mós la adora estatua osa mean nebé ha’u haruka hari? Di’ak, oras ne’e rona tiha trombeta, flauta, cítara, lira, harpa, saltério, gaita ho buat oi-oin be lian, imi sei hakru’uk hodi adora estátua nebé ha’u haruka halo. Imi lakohi karik adoa nia, ema sei so’e kedas imi iha ahi lakan boot nia laran. Maromak nebé lós mak sei hasai imi housi ha’u liman?” Sidrac, Misac, ho Abdénago hatan ba liurai Nabucodonosor: “Liurai, ami hanoin katak lalika hatan ba ó kona ba buat ne’e. Ami nia Maromak nebé ami hahí hanai bele karik hasai ami housi ahi lakan boot nia laran no mós housi ó nia liman, Nia sei hasai duni ami. Maski nia la halo karik ne’e, ó hatene kedas ona, ami sei la hahí hana’i ó nia maromak; ami mós sei la adora ilas osan mean nebé ó haruka hari”. Nune’e, Nabucodonosor hirus teb-tebes. Nia oin nakfilak tiha iha Sidrac, Misac ho Abdenágo sira oin. Nia haruka tau ahi halo manas maka’as liu bai-bain dala hitu. Nia fó ordem ba nia emar funu-na’in sira nebé forti liu atu futu Sidrac, Misac ho Abdénago hodi so’e sira ba ahi lakan boot nia laran. Tuir mai, Nabucodonosor hakfodak, hamriik lalais, husu ba nia emar sira: “Ita la so’e sira na’in tolu futu metin?” Sira hatan: “Lós duni, liurai”. Nia simu hodi dehan: “Maibé ha’u hare ema na’in háat la kesi, la’o ba mai iha ahi laran; la terus buat ida; ida háat ne’e hanesan Maromak sira nia oan”.

Nabucodonosor foti lian dehan nune’e: “Di’ak tebes, Sidrac, Misac ho Abdénago sira nia Maromak; tan haruka Nia Anjo atu hasai Nia atan sira nebé fiar Nia. Sira la halo tuir liurai nia ordem hodi hasusar sira nia isin lolon atu labele hahí hana’i ba nar-naran maromak seluk nebé la’os sira nia Maromak”.

Maromak Futar Lia.

 

Salmo Responsorial                                                                                                                         Dan. 3. 52, 53, 54, 55, 56 (R. 52b)

Refrão : Ami hahí, hawelok Ita nafatin!!! Repete-se

Na’i, kmanek wa’in ba Itaboot,

Ami aman sira nia Maromak.

Kmanek wain ba Ita naran boot no santo tebes;

So’i simu hahí no glória ba nafatin. Refrão

 

Kmanek wa’in ba Ita

Iha tempo santo Ita glória nian;

So’i simu hahí no glória ba nafatin.

Kmanek wa’in ba Ita trono liurai nian,

So’i simu hahí no glória ba nafatin. Refrão

 

Kmanek wa’in ba Itaboot

Be hatene borus rai horun sira;

Hatodan-An iha querubim sira fohon,

So’i simu hahí no glória ba nafatin.

Kmanek wa’in ba Itaboot iha Lalehan,

So’i simu hahí no glória ba nafatin. Refrão

 

Aclamação                                                                                                                                                                                             Lc. 8. 15

Refrão : Glória ba Ita, Na’i,  Maromak moris Nia Oan Mane!! Repete-se

Ksolok ba sira nebé rona Maromak Nia liafuan ho neon no laran hodi fó fuan,     

tan sira laran metin. Refrão

 

Evangelho                                                                                                                                                                                       Jo. 8. 31-42

Na’i Jesus Cristo nia Evangelho nu’udar São João haktuir:

Iha tempo nebá, Jesus lia tun ba judeu sira be fiar ona Nia: “Imi halo tuir nafatin karik Ha’u nia liafuan, imi Ha’u nia escolante duni; imi sei hatene lialós; lialós ne’e mak sei fó liberdade ba imi”. Sira hatan ba Nia: “Ami Abraão nia bei-oan; ami la’os ema ida nia atan. Oinsá ó hateten: ‘Imi sei hetan liberdade?’” Jesus hatan ba sira: “Tebes, tebes duni, Ha’u dehan ba imi; ema hotu nebé halo sala, nia sala nia atan. Atan la hela nafatin iha uma. Ne’e duni, Oan Mane fó karik liberdade ba imi, imi sei hetan duni liberdade. Ha’u hatene katak imi Abrão nia bei-oan, maibé imi hakarak oho Ha’u tamba Ha’u nia liafuan la tama iha imi. Ha’u dehan buat nebé Ha’u hare ona iha Ha’u Aman, imi halo buat nebé imi rona hateten housi imi aman”. Sira hatan ba Nia: “Ami Aman Abraão!” Jesus hateten teni ba sira: “Imi Abraão nia oan karik, imi sei halo hahalok be nia halo. Maibé la’e, imi buka buka oho Ha’u, Ha’u be dehan ba imi lialós nebé Ha’u rona housi Maromak. Abraão nia hahalok la’os nune’e! Imi halo imi nia aman nia hahalok!” Sira hateten ba Nia: “Ami la’os oan la tuir lei; ami iha Aman ida de’it mak Na’i Maromak!” Jesus hatan ba sira: “Na’i Maromak imi nia Aman karik, imi mós iha domin mai Ha’u, tan housi Maromak mak Ha’u mai. Tamba Ha’u la mai housi Ha’u-An rasik; Nia mak haruka Ha’u mai”.

Lia Maksoyn.

Leave a Reply

Your email address will not be published. Required fields are marked *