shadow
Diocese de Dili > NOTÍCIAS > LETURA DIÁRIA > Sábado, V Semana Tempo Comum (ANO A)

Sábado, V Semana Tempo Comum (ANO A)

Primeira Leitura                        Ez. 37. 21-28

Lia  housi Profecia Ezequiel nian:

Na’i Maromak lia tun nune’e: “Ha’u atu hasai Israel oan sira housi nação sira leet; housi fatin nebé sira ba. Ha’u sei halibur sira housi fatin tomak atu lori sira ba fali sira rain. Ha’u sei halo sira sai povo ida de’it, iha rai nebá, iha foho sira Israel nian, ho liurai ida de’it nebései ukun sira hotu. Sira sei la halo nação rua. Sei la fahe mós sira iha reino rua. Sira sei la hafo’er-an tan ho sira lulik, sira nia lala’ok áat no sira nia salan tomak. Ha’u sei hasai sira housi salan nebé sira halo, tan sira laran la metin; sei hamos sira atu sira sai Ha’u Nia povo, Ha’u sai sira nia Maromak. Ha’u atan David sei sai sira nia liurai; hafoin sei iha bibi-atan ida deit ba sira tomak. Sira sei rona Ha’u Nia ukunfuan, sei simu Ha’u Nia lei hodi moris tuir lolós. Sira sei hela iha rai nebé Ha’u fó ba Ha’u atan Jacob, rai nebé imi bei-ala sira uluk hela ba. Iha nebá sira rasik sei hela ho sira oan ho mós sira oan sira nia oan, ba nafatin. Ha’u atan David sei sai nafatin sira nia liurai. Ha’u sei halo ho sira moruk dame nian, moruk ida rohan la’ek, Ha’u ho sira. Ha’u ho sira. Ha’u sei halo sira hela metin, sai wa’in liu tan hodi tau iha sira leet ba nafatin, Ha’u Nia fatin santo. Ha’u sei hela metin iha sira klaran; Ha’u, sira nia Maromak, sira Ha’u nia povo. Nação sira sei hatene katak Ha’u mak Na’i, nebé halo Israel sai santo, wainhira Ha’u nia fatin santo iha sira klaran nafatin”.

Maromak Futar Lia.

 

Salmo Responsorial                                                                                                                         Jer. 31. 10, 11-12ab, 13 (R. cf. 10d)

Refrão : Hanesan bibi-atan bali nia bibi sira, nune’e mós bali ita!!! Repete-se

Nação sira, ona Na’i futar lia,

Fó hetene lia ne’e iha rai kiik dook nian ba;

Ida be halo Israel namkari, halibur fali nia,

Sei bali nia, hanesan bibi-atan

Bali nia bibi sira. Refrão

 

Tan Na’i soi Jacob,

Hasai nia housi ida be maka’as liu nia liman.

Hodi haklalak ksolok nian

Sira sei to’o Sião nia tutun, mai buka Na’i nia bensa. Refrão

 

Iha ne’e, fetora sei dansa ho ksolok;

Hanesan ne’e mós klosan ho katuas sira.

Ha’u sei halo nia taka-metan nakfila ba ksolok;

Fó laran kmaan ho ksolok iha terus nia fatin. Refrão

 

Aclamação                                                                                                                                                                                           Ez. 18. 31

Refrão : Maksoyn, glória no biit ba Jesus Cristo, ami Na’in!! Repete-se

Hakribi imi salan hotu, Na’I lia tun,

hakiak fuan foun ida no espírito foun ida. Refrão

 

Evangelho                                                                                                                                                                                      Jo. 11. 45-56

Na’i Jesus Cristo nia Evangelho nu’udar São João haktuir:

Iha tempo nebá, haré tiha buat nebé Jesus halo, judeu barak nebé ba haré Maria, fiar Nia, maibé sira balun ba fó hatene ba fariseu sira buat nebé Jesus foin halo. Amlulik boot sira no fariseu sira halibur hamutuk hodi dehan: “Ita atu halo sá lós tan ema ne’e halo milagre barak? Ita husik nia nune’e karik, ema hotu sei fiar Nia, hafoin Romano sira sei mai hasai housi ita, ita nia templo ho nação tomak”. Maibé sira ida naran Caifás, amlulik boot ba tinan nebá, hateten ba sira: “Imi la hatene buat ida! Imi la hatene katak, di’ak liu ba imi, ema ida de’it mak mate ba povo, liu fali nação tomak lakon!” Nia la dehan ne’e tan nia an rasik, maibé tanba nia mak amlulik boot iha tinan ne’e; nia si’ik katak Jesus sei mate tan nação no la’os ba nação deit, maibé atu halibur hamutuk ho neon ida deit Maromak nia oan sira namkari lemo rai. Hahu housi loron ne’e, sira futu lia atu oho Nia.

Tan ne’e, Jesus la la’o ona iha judeu sira nia leet. Nia husik rai ne’e ba cidade Efraim, besik rai fuik maran hodi hela iha nebá ho nia escolante sira.

Páscoa judeu sira nian besik ona. Ema barak sa’e ba Jerusalém housi rai nebá atu hamós an ba festa. Sira buka Jesus hodi dehan ba malu: “Imi hanoin sá? Nia sei mai iha festa?”

Lia Maksoyn.

Leave a Reply

Your email address will not be published. Required fields are marked *