shadow
Diocese de Dili > NOTÍCIAS > Notícias > AMU PAPA FRANCISCO IHA LORON 4 FULAN ABRIL 2020 HATOÓ MENSAGEM BADAK IDA MAI ITA MOLOK ITA CELEBRA SEMANA SANTA TINAN 2020 NIAN NE’E

AMU PAPA FRANCISCO IHA LORON 4 FULAN ABRIL 2020 HATOÓ MENSAGEM BADAK IDA MAI ITA MOLOK ITA CELEBRA SEMANA SANTA TINAN 2020 NIAN NE’E

Maluk doben sira, Boa noite

Ohin kalan hau iha possibilidade atu hakat tama toó ba iha imi nia uma ho maneira ida oinseluk, la hanesan baibain.

Se imi hatan hau hakarak koalia itoan ho imi iha tempo balun nia laran iha period dificil no terus nian ida neé. Hau hanoin iha imi ninia familia wainhira imi moris hela iha moris ida la hanesan baibain hodi hadok-an moras nee ninia daet. Hau hanoin iha labarik sira no foin sae sira iha sira ninia moris nebe labele sai ba liur hodi ba escolar, hodi halao sira ninia moris.

Hau hanoin iha hau nia fuan laran familia sira hotu, especialmente sira nebe iha sira ninia familia doben balu moras hela ou infelizmente tem que luto hela tamba lakon familia balun tan Corona Virus ou tamba buat seluk mos.

Iha loron hirak nee hau hanoin bebeik iha ema sira nebe iha solidão nia laran, no sira nebe sente dificil liu hasoru momento ida neé. Liu-liu hau hanoin iha ema otas sira nebe hau hadomi tebes. Hau labele haluha mos sira nebe moras tamba Corona Virus, sira nebe halo hela tratamento iha hospital, hau hatene generosidade husi ema sira nebe mak tau sira-an iha risco hodi halo tratamento hasoru pandemia ida neé hodi garantia serviço essencial sira ba sociedade. Heroi tebes, husi loron ba loron, horas ba horas.

Hau hanoin mos sira hotu nebe sente apertado tamba dificuldade economica nian no preocupa ho serviço, ho future. Hau hanoin mos sira hotu nebe oras nee iha hela cadeia nia laran nebe sente mos tauk hasoru epidemia nee ba sira ninia-an  rasik no ema sira nebe sira hadomi liu. Hau hanoin iha ema sira nebe horik fatin laiha, sira laiha uma ida be bele hamahan netik sira.

Momento ida dificil tebes ba ita hotu. Ba ita barak dificl tebtebes. Amu Papa hatene ida nee. No ho liafuan hirak nee nia hakarak hateten ba hotu-hotu ninia besik ho ita no hadomi tebes ita. Ita hotu hamutuk buka atu usa didiak tempo ida neé hodi buka sai generoso, fo tulun ba maun alin sira nebe precise tulun, bele mos buka atu tulun maluk sira nebe sente mesmesk ka iha solidão nia laran liu husi telephone ka meios sociais sira.

Mai ita harohan ba Naí, ba maluk hotu nebe hasoru prova iha Italia no iha mundo. Mas que ita isola-an hela maibe ita ninia hanoin no ita ninia espirito bele lao ba dook ho creatividade domin nian. Ohin loron ita percisa ida ne’e, creatividade domin nian neé.

Tebes, ita celebra la hanesan baibain Semana Santa ida neé nebe hatudu no rezumo mensagem Evangelho nian kona ba Maromak ninia domin be rohan laek. No iha silencio ita nia cidade sira nian, rona toó mai ita Evangelho Pascoa.

Apostolo Paulo hateten: “No Nia mate ba ema hotu, hodi nune’e sira hotu nebe moris, la moris tan ona ba sira an rasik mesak deit maibe, Moris ba Nia nebe mate no moris hias fali ba sira” (2Cor, 5:15).

Iha Jesus be moris hias, moris manan tiha ona mate. Fiar pascoa nian ida nee haburas ita nia esperança. Hau hakarak fahe ida nee ho imi iha kalan ida neé. Esperança ba tempo ida diak liu nebe ita sai diak liu tan, ikus mai soi ita husi buat at no husi pandemia ida neé. Ne’e esperança ida, esperança la hamosu laran susar, laos ilusão ida, mas esperança ida.

Hamutuk hakbesik-an ba malu, ho domin no ho paciência ita bele prepara hamutuk iha loron hirak neé tempo ida diak liu.

Hau agradece ba imi hotu tamba bele husik hau hakat tama toó ba imi nia uma laran. Halo imi nia laran sai maus ba sira nebe terus, ba labarik kiik sira, ba ema otas sira. Hatete ba sira katak Amu Papa hamutuk ho ita no harohan atu nune Naí soi lalais tiha ita husi buat at. No husu ba imi hotu, harohan mai hau.

 

 

Bom jantar.

 

Até breve.

 

Papa Francisco, Vaticano 4 de Abril 2020.

https://youtu.be/hrJ6mg3vZrA,  Traduzido por: Departamento Comunicação da Arquidiocese de Dili

 

Leave a Reply

Your email address will not be published. Required fields are marked *