shadow
Diocese de Dili > NOTÍCIAS > REFLEXÃO > COVID-19, SEMANA SANTA NO SOLIDARIEDADE MUNDO UNIVERSAL

COVID-19, SEMANA SANTA NO SOLIDARIEDADE MUNDO UNIVERSAL

Reflexão atu bele komprende didiak

Frei Joel Casimiro Pinto, OFM

 

                 Ita nia mundo ohin sei sofre hela pandemia bo’ot ida nebé ataka kuaze ema hotu sein predestina ema ida ou grupo balun deit.  Iha loron hirak ne’e, nu’udar observador no utente ba media sosial, konserteza ita hetan informasão barak liu housi media sociais sira. Iha facebook, hanesan exemplu ida, ema balun hato’o sira nia dispozisão ou inquetasão existencial kona ba situação aktual nebé akontese iha mundo tomak no ida nebé lori mós paniku, ta’uk no buat seluk-seluk tan. Haré ba situação nebé komesa ladiak, Igreja ho iniciativa tomak, foti decisão katak sei laiha celebração liturgiku, paraliturjia no sakramentalia sira hotu durante sei iha emergencia ida ne’e. Preokupa ho decisão ne’e, saranibalun hato’o lamentasão kona ba decisão provizoriu nebé Igreja catolica foti ne’e. Balun espressa ninia hanoin ho lia fuanmaka’as ou forte tebes:”Igreja iha nebé wainhira situação difisil ne’e? Igreja taka odamatan ba sarani no halai lakon tiha. Expresão ne’e forte no fundamental tebes atu ita observa no reflete hamutuk. Ita bele identifika pontu balun nebé fundamental ba ita nia reflexão.

 

Estado Emergencia no Semana Santa, laiha missa?

                Moras Covid-19 nebé hada’et ona housi ema ida ba ema seluk no tama to’o iha kuaze nasão 180 resin, inklui mós ita nia rai rohan oan ida nebé ita hadomi, Timor Leste. Virus ne’e hada’et lalais no iha tendencia (iha fatin balun) aumenta loron ba loron. Ho base ida ne’e mak Presidente da Republico ho pedido Governo nian, hetan aprovasão housi Parlamento Nacional dekreta ona kona ba “Estado Emergencia” liu housi decreto no. 29/2020 de 27 de março 2020, ho razaun atu hakotu korente pandemia covid-19 nebé da’et buras liu tan iha rai ida ne’e.

                Ho maneira hanesan, Igreja Catolica Timor Leste, liu housi Conferencias Episcopais, hala’o ona iha 24 de Março 2020, Comunicado Pastoral II, nebé decide atu celebração sira iha Semana Santa tinan ida ne’e sein participação fisicamente housi sarani sira. Decisão ida ne’e mós foti tuir Decreta housi Congregasão Santa ba Culto Divino no Regras Sacramentos nian iha Proto. 153/20 katak: “iha momentu ida nebé hotu-hotu luta contra Covid -19, iha tinan ida ne’e, Celebração sira ba Semana Santa hahu housi Domingo Ramós 5 abril to’o Domingo Ressureisão, 12 abril 2020 sei la akontese“.

                Buat ida nebé ita tenke hatene maka ne’e, Santo Padre Francisco no Amo Bispo sira hotu, especialmente iha Timor Leste, hakarak atu hakotu korente da’et housi Covid-19 ne’e. Laiha intensão atu hakotu sarani sira nia hakarak (kerinduan) hodi ba partecipa iha Missa. Maibé iha razaun fundamental ida katak: covid-19 da’et liu housi kontaktu fisico. Nune’e Igreja concorda atu evita virus nia da’et nebé bo’ot liu tan hodi halo decisão ba social distancing ou limitasão social. Klaru katak ida ne’e hanesan maneira ida atu hodi prevene no controla moras nia infeksão. Exemplu ida, iha missa laran, sarani tenke evita atu kumprimenta malu hodi kaer liman, hakruuk de’it ba malu; comunhão mós sei la simu ho ibun maibé mós ho liman. Hirak ne’e nu’udar decisão pastoral ida nebé Igreja foti atu hodi evita moras ne’e nia existencia continua iha ita le’et. Nune’e Santo Padre iha nia kolegialidade ho bispo sira propõe ba sarani sira atu tuir celebração Semana Santa ou Domingo bai-bain nian liu housi Live streaming ou online ba familia sira ou komunidade sira nebé iha asesu ba internet. Maibé, ba familia sira ou komunidade sira nebé iha aldeia ou foho nebé labele asesu ba internet bele selebra páscoa independentemente iha uma kain ida-idak nian.

                Hanesan bai-bain, tuir tinan liturjiku nian, Semana Santa sai nu’udar momentu importante ida ba kristaun sira hotu iha mundo tomak. Iha Vaticano, hanesan exemplu, ema barak partesipa iha missa nebé Domingo Ramós, Quinta Feira Santa to’o Domingo Resurreisão nebé preside housi Papa Francisco. Maibé iha tinan ida ne’e uniku uitoan. Tan ho presensa housi Corona Virus Covid-19 halo ita labele halibur malu hamutuk atu hodi celebra loron ida Memoria Passionis et Resurrexit Domini dala ida ne’e no ba dala uluk sei celebra sein presensa housi Sarani sira hotu.Konserteza, momentu Semana Santa ida ne’e sei diferente ba kristaun sira hotu iha mundo tomak. Tan ba, dala ida tan ita kumpri lian tatoli hanesan Organizasão Mundial Saude (OMS) husu ona atu laiha ema ida hetan previlejiu hodi hala’o no partesipa iha kualker ceremonia hamutuk nebé halibur ema barak inklui mós celebração religiosas sira hanesan Semana Santa. Lia tatoli ne’e la’os ba ema ou grupo balun de’it maibé hanesan ba sarani Katoliku.

                Los, katak, atu hakotu korente housi pandemia Covid-19, Ulun Bo’ot Igreja Katolik mundial, Santo Padre Francisco iha Vaticano no mós Conferencia episcopais Igrejas Locais sira decide no hahu celebra Eucaristia liu housi teknolojia Live Streaming. Iha parte ida, tenke rekuñese katak Igreja usa teknolojia dijital hodi halo koneksão entre Komunidade Eklesial. Iha parte seluk, klaru mós katak tuir lolós ne’e iha Igreja katolik, konektividade nu’udar karakteristika fundamental ida, tan hahu uluk tiha ona antes existe progresso media dijitais sira. Karakteristika ne’e mak aparese iha simbolos ritu liturjiku sira; no se ita hakarak aprofunda, uniaun ritus sira ne’e nia abut iha mensajem Jesus nian iha Han Kalan Ikus.

                Hanesan ita haré katak iha ona dekreta pastoral Igreja Universal kona ba situação actual no hahu implementa liu housi Igreja Lokal sira, especialmente ba ita nia rain, liu housi Conferência Episcopal Timorense (CET) hanesan ita hetan liu housi comunicado imprensa. Santo Padre Francisco anunciu katak Semana Santa ou Páscoa tinan ida ne’e sei celebra sein presenza sarani sira. Medida ida ne’e foti nu’udar dalan ida atu evita ema barak halibur hamutuk hodi bele prevene virus corona (Covid-19) nia da’et (consulta Vaticannews.va,).Intensão fundamental mak atu hateten deit nune’e: laiha definisão ida nebé hatudu momós dehan laiha missa ou celebração Semana Santa, maibé laiha partecisipasão maxima housi sarani sira fisikamente hanesan bai-bain.

 

Maromak no Igreja nonok? ou solidario ho Mundo nebé terus

                Iha pagina facebook balu, maluk kristaun katolika sira hakerek kona ba asunto ne’e: celebra páscoa sein presenza fisica iha uma kreda no sein sorumutu real ho sarani sira seluk. Hakerek nune’e:Vaticano kalmo, nonok. Jerusalem mós nonok. Muro Lamentasão nian arame hale’u. Igreja taka. Sarana hela iha uma. Missa Domingo suspende. Via Sacra hapara. Páscoa incerteza. Ladainha oração nian muda. Agua benta sublime. Corona mai, hanesan lori mensajen katak ritu sira liquida, la solida. Wainhira Corona mai, obriga o buka Maromak. La’os iha Basilica São Pedro. La’os iha Igreja. La’os iha ambão pregasão nian. La’os iha batizmu. La’os iha sinu Igreja nia lian. La’os iha missa Domingo. La’os iha kaer liman. Maibé, iha o nia nonok hodi reflete ba o an rasik. Iha o ibun nebé takametin. Sostanzialmente nonok, kalmo. Iha nonok ida nebé nakonu ho sentidu. Corona hanorin o katak Maromak ne’e la’os deit o bele hasoru iha fatin no tempu rame nian. Na’ila’os deit bele hasoru iha ceremonia ritual sira. Na’i Maromak iha dalan nebé wainhira o desesperado ho mundo nebé nakonu ho moras. Corono purifika religiaun katak laiha ida nebé bele hela, exceto Maromak de’it. Ba hasoru, hasoru Nia iha o nia oração no kuñese Nia liu housi Nia Liafuan iha tempu silencio ne’e.

                Pandemia ida ne’e, konserteza, konvida ema fiar na’in sira hotu atu besik no hametin amizade ho Na’i Maromak ida nebé supera buat hotu. Só Maromak mak bele resolve buat nebé ema bai-bain labele halo. Signifika katak, pandemia Covid-19 demóstra limitasão kapasidade ita ema modern nian. Wainhira preokupasão no rutinidade sira hotu tenke para, movimento alto tenke nonok, barulho no difisil atu rona malu tenke halo kalma, no hakotu ita nia rutinidade quiotidiana, sociedade ida nebé tau sés tiha Maromak housi nia moris monu ba alienasão no inquietasão existencial ida nebé profundo tebes. Iha momentu ida hanesan ne’e ita bele desespera no hakilar ou grita ba Maromak tan sa la salva ita.

                Ita tenke rekuñese katak ema moderno mak ema nebé mout iha rutinidade loron-loron nian nebé nakonu, sempre movel, la nonok. Maibé, loron hirak ne’e, wainhira Covid-19 hakotu hotu korente rutinidade sira ne’e, ita sente hanesan obrigadu atu ba foti tempu silencio existencial no haksoit ba iha angustia existencial. Senti ta’uk ezije ita atu observa no haré didiak intrusão housi governo no ekipa saude nian atu ita bele livre housi Covid-19 ne’e.

                Maibé, ema nebé otentiku bele supera sentimentu ta’uk ba angustia existencial. Ho roda preokupasão sira nebé paradu no movimentu moris nebé menus, ita hetan konvite atu fila ba ita uma existencia, reflete ba moris profundu. Iha nebé, iha espasu hodi koalia ho existencia rasik, ita beledeskobre katak alein de idealism (mehi) progresso no arogansia ba moris nebé luxo obriga ita atu halo movimento nafatin, barulho, rungu-ranga ba-mai, hamout iha rutinidade no horario nebé nakonu no metin, hatudu katak ita nia existencia la forte, fraka no la solida.

                Ho sentimentu ta’uk, ita koko kombate Covid-19. Maibé, ho angustia existencial, desafio housi Covid-19 halo ita konsiente ba ita nia existencia nebé mamar, fraka, la solida. Moras Covid-19 ne’e fo tempu ba ita, ema fiar na’in sira, atu fila ba ita nia momentu silencio no aprende housi nia ida nebé halo ta’uk no hamósu angustia nebé bo’ot. Inklui mós ita aprende iha experiencia nebé moruk no nunka akontese iha historia moris nian nu’udar membro Igreja katak iha tinan ida ne’e, ita obrigadu la celebra Páscoa nu’udar comunhão povo kristaun.

                Situação ida ne’e la hatudu katak Igreja lakohi hamutuk ho sarani sira hasoru moras Corona Virus Covid-19 ne’e. Sei ita hanoin to’o ba iha ne’e, entaun hanoin ne’e sala dalan uitoan. Igreja hakarak kolabora ho organizasão mundial, governo kada estado liu housi deklarasão estado de emergencia hodi hapara aktividade sira nebé involve ema barak atu hamenus moras nia da’et. Nune’e, asão ida ne’e hatudu katak Igreja la nonok maibé kolabora; Igreja la taka odamatan no halai tiha maibé fó possibilidade atu ema bele deskobre Maromak nia presenza iha moris tomak.

 

Esperansa nu’udar Kristaun

                Iha situação hanesan ne’e, hanesan Santo Padre Francisco expressa iha nia reflexão ou homilia iha momentu Adoração Eucaristia iha Vaticano, iha loron 27 março 2020 liu ba: “Ita hanesan Jesus nia Escolante sira nebé kestiona ho intonasão duvida, ‘Mestre, Ita la hatene kata ita atu mout? (cfr. Mc 4, 38). Santo Padre espera katak sarani katoliku sira hotu no Kristaun hotu housi denominasão Igreja oi-oin iha mundo tomak, hamutuk iha momentu importante ita ne’e.

                Papa Francisco hateten katak moras Virus Corona Covid-19 ne’e halo ita sai ida de’it (nune’e Papa João Paolo II reflete iha enciclica Ut Omnes Unum Sint) iha humanidade ita hamutuk nu’udar maun-alin. Ita konsienten katak ita iha bero ida hanesan. Ita hotu mamar, la forte no confusão, maibé iha momentu ida hanesan ita tenke konsiente katak ita hotu simu invokasão atu hean bero hamutuk.

                Papa Francisco usa historia escolante sira iha bero leten nebé hetan anin bo’ot nebé sira la espera, no Jesus toba hela iha bero rohan (Mc 4, 35-41). Wainhira escolante sira bolu Jesus, tuir lolós sira mós hakarak hatudu prova sira nia fiar katak Jesus sei ajuda sira. Maibé, de facto, Jesus koalia ho lian maka’as ba sira tan Nia hatene katak sira nia fiar sei fraka. Maske escolante sira nunka para atu fiar iha Nia. Liu tan, escolante sira mai bolu Nia atu husu tulun. Escolante sira hanoin katak Jesus la interesse ba sira nia destinu. Maibé, Nia liu buat hotu.

                Nia tau matan tebes mai ita. Na’i bolu ita atu fiar maske ita, hanesan escolante sira, la fiar metin katak Na’i presente nafatin no intervene iha ita nia situação sira. Momentu tentasão mak nu’udar tempo atu hili: La’os tempu atu justifika an rasik, maibé justifikasão ba ita hotu; tempu ba it atu hili saida mak importante no buat nebé liu ona; tempu ba ita atu haketak buat nebé precisa housi ida nebé la precisa iha moris ne’e. Momemtu ida ne’e nu’udar tempu atu tau fila hikas ita nia moris ba dalan los, nebé fo ksolok ba ita an rasik, ba Maromak no ba ita maun alin sira.

                Mai ita hotu, nu’udar Maromak nia oan feto no mane, aprende atu simu no hadomi situação pandemika Covid-19 ne’e ho haré, senti, no experiencia Maromak nia domin nebé moris no salva. Atu grasa Cristo nia Páscoa nebé ita celebra iha uma ida-idak ou komunidade sira fo moris no esperansa ba peregrinasão fiar nian iha mundo ne’e no ba nafatin.

                Mai ita kuidado saude no hadi’a ita nia moris hamutuk. Ita hotu hetan konvite atu hadi’a moris, an rasik hodi lori fuan no laran ba Maromak no sempre esperansa bo’ot iha nia nafatin, Pastor Bonus, nebé sempre salva no kuidado ita (Salmo 23). Ita reza ba malu no harohan liu housi intersesão Inan Virgem Maria, ema fiar na’in nia Inan, atu anin bo’ot ida ne’e lori Covid-19 liu housi ita. Boas Festa Santo Páscoa ba ita Hotu.

 

Eucaristia Online/Live streaming: valido ka la’e?   

                Tebes, tinan ne’e, ita tenke celebra Páscoa liu housi Live Streaming ou Online ba familia sira ou komunidade sira hotu nebé asesu ba internet. Celebração Online hanesan ne’e la simu comunhão ou Hostia Santa. Maibé, oração comunhão iha laran ou Comunhão Espiritual bele reza wainhira partecipa iha Misa Online ne’e. Ba familia sira ou komunidade sira nebé hela iha fatin nebé laiha asesu ba progresso teknolojia nia tenke simu realidade katak celebra Páscoa iha ida-idak nia uma ou komunidade ida-idak nian. Pergunta ida mak mósu: entaun ita nia celebração ne’e valido ka la’e? Karik ita hanesan ema nebé assisti de’it video ida kona ba eucaristia ou show ruma kona ba Missa iha fatin balun?             

 

Eucaristia daring: La’os assiste deit

                Ita tenke kumpreende diak, katak Missa daring precisa iha situação espésifika ou extraordinaria. Situação específika tan perigo housi Pandemia Covid-19 nebé involve mós fatores sira seluk, nebé ho karakteristika tekniku maibé importante, katak precisa asesu internet no instrumentos sira nebé bele fasilita diak liu tan. Situação especial ne’e mós ita bele komprende liu housi realidade Kreda Timor nian mós. Pandemi Covid-19 halo ia konsiente ba importansia housi solidariedade entre komunidade Igreja local. Eucaristia daring ho objetivu atu facilita sarani nia precisa ba comunhão fuan nian, spiritual. Objetivu ne’e realiza, wainhira facilitador official, mak, na’ilulik celebra Eucarita Live, no iha momentu hanesan sarani sira partisipa daring [Atawolo, 2020].

                Situasan ne’e hanesan ho experiencia ema nebé moras nebé nia labele participa Missa, maibé bele tuir (ho nia hakarak/desejo housi fuan nebé klean) transmissão direita celebração Eucaristia housi Basilika São Pedro iha Vaticano. Ema ne’e la’os haré ou assiste video ida kona ba Eucaristia, maibé nia partecipa espiritualmene (ho fuan no laran tomak) ho Eucaristia tomak nebé celebra eucaristia ne’e [Atawolo, 2020].

 

Communio Spiritual

                Ho situação especial ne’e, termus comunhão spiritual sai popular. Iha tradisão Igereja nian, ita kuñese communion spiritual. Termu communion (Latin) nia abut ou raiz iha liafuan mun, ho sentidu duplu: liafuan mun signifika katak grupo ou moru. Ema hotu iha komunidade ida nebé hela iha moru laran ou castelo laran. Liafuan mun signifika mós katak ofertorio ou serviço. Ema hotu iha komunidade libur hamutuk liu housi participação knaar ida-idak nian. Kada membro hala’o nia knaar especial ba bem comum [Greshake 2008, 95-6].

                Hanoin ida ne’e relevante ho situação atual Kreda nian: ema hotu soliter iha uma nu’udar forma sakrifisiu ba diak hamutuk (Bem Comum). Iha Eucaristia daring, ita haketak malu fisikamente, maibé sempre libur hamutuk spiritualmente. Entaun, communio spiritual signifika katak: maske eucaristia celebra laiha participação hamutuk fisikamente, Eucaristia ne’e valida no iha sentidu, tan communio Igreja nian iha Eucaristia la’os de’it liu housi parte exterior maibé mós mistiku-spiritual. Nune’e, maske la akontese kontaktu real, fisiku, entre sarani ho celebrante, sira hotu nu’udar communion ida, tan fiar ida iha Kristo. Simplesmente nune’e: exemplo ida, entre Papa Francisco nebé celebra Eucaristia iha Vaticano ho sarani ida iha Ponilala (Ermera, iha Matebian (Baucau), iha Com (Lautem), ou Fatumea (Suai), relação spiritual iha Igreja nebé Ida, Santa, Katolika no Apostolika.

 

Abut iha Evangelho

                Tuir lolós, communion spiritual la’os idea ida nebé foin mósu tan situação especial ne’e. Dimensão ida ne’e nu’udar karakteristika intrinsika housi Eucaristia. Iha Han kalan Ikus, wainhira fo paun no tua ba nia Escolantes sira, Jesus dehan: “‘Ne’e Ha’u Isin, simu ba no han ba’, ‘ne’e Ha’u ran, simu ba no hemu ba’; hafoin nia dehan tan: ‘Halo ida ne’e hodi hanoin Ha’u'” (cfr. 1Cor 11,23-26; Lc 22:15-20, Mc 14:22-25, Mt 26:26-29). Jesus rasik tau ona aliserse spiritual nebé forte ba Igreja nu’udar komunidade Eukaristika. Mensajem Eukaristika housi Jesus nia ibun hanesan lejitimasão ba Kreda nia Eukaristia.Ho lia fuan seluk, situasan especial dau-daun ne’e konfirma liu tan, katak communion spiritual lolós ne’e nia nu’udar abut ba Igreja atu celebra Eukaristia. Iha Eukaristia, sarani moris housi Kristu [Atawolo, 2020].

                Moris Eukaristiko katak hola parte (koinonia) iha Kristu nia moris: Tan paun ida de’it, maske ita barak, ita Isin ida de’it, tan ita hotu hola parte iha paun ida ne’e (cfr. 1Cor 10:17). Wainhira sarani Igreja primitive sira iha situação especial, hetan perseguisão housi anti-Kristu sira, sira nia memoria ba Jesus nia asão no mensajem iha Han Kalan iku, nebé nu’udar forsa ba sira nia libur hamutuk.

 

Doutrina no Tradisão

                Iha nia homilia, Santo Agostinho hakerek nune’e: ‘Maun alin sira, ne’e mak sakramentu, tan iha aspetu sensorial, iha mós aspetu intelektu’. “Ida nebé bele haré ho matan mak elemento fisico, no ida nebé bele kompreende mak iha konsekuencia spiritual (Quod uidetur, speciem habet corporalem, quod intelligitur, fructum habet spiritualem) [Mazza 2003, 151]. São Tomas de Aquino iha nia Summa Theologiae koalia kona ba communion spiritual nu’udar expressão desejo ema ida ba communio sacramental. Konsilio Trento mak klaru liu define diferencia entre communio spiritual no communio sacramental [DS.1648]: ida dahuluk, sein Hostia Santa, entaun, nu’udar desejo, hakarak; ida daruak, ho simu communio [Gagliardi 2016, 788-9].

                Papa Francisco, iha loron 19 março 2020, iha Capela Santa marta, konvida sarani sira hotu atu hola parte iha communio spiritualne’e liu housi Missa daring. Papa cita oração ida housi Cardeal Rafael Merry del Val († 1930). Experiencia ba communion interior ou spiritual ne’e mós hetan housi Santo Alfonço Maria de Liguori no São João Bosco [Atawolo, 2020].

 

Valido no significativo

                Perguntas: Eukaristia daring ne’e valido ka la’e? Ita la simu Hostia Santa no han? Eucaristia daring ne’e valido. Konserteza iha situação especial ne’e valido, la simu Kristo nia Isin sakramentalmente iha forma Hostia Santa. Hanesan ema nebé fiar no iha mós sensoriais, konserteza ita sente katak Eucaristia la kumpletu. Maibé, inkompletu ne’e la’os razaun fundamental atu la konsidera Eukaristia daring ne’e valido, más nu’udar momentu ida atu konvida Maromak presente iha fuan. Comunhão sein Hostia Santa sai momentu atu konsiente, katak sentido símbolo limita, la absoluta, maibé Maromak nia domin la limita ho simbolo sira; katak, maske ema gosta ezije sinais, maibé Maromak sempre bolu ho lia nebé mamar no fresca. Jesus dehan ba ita ida-ida, hanesan dehan ba Zakheus: “Ohin, Ha’u sei ba hela iha o uman” (Lc 19,5) [Atawolo, 2020].

                Communio spiritual nu’udar momentu atu hadi’a Angulo oração iha uma ou ita nia komunidade. Tuir Eukaristia daring hamutuk ho familia sai nu’udar momentu diak ida ba ita atu sente relação ida nebé besik no manas hanesan kristaun sira Igreja Primitiva nian. Ho sai soliter iha familia, ita partecipa atu hametin communio Igreja Universal. Ou hanesan paroquia ida, wainhira ita labele partecipa iha Igreja, iha hakarak/desejo atu halibur hamutuk fali. Social distancing halo buras virtude Kristaun nebé hanaran esperansa [Atawolo, 2020].

                Teologia no Direito Kanoniku Igreja Katoliku (CIC) promulga katak rekezitu sira nebé mak halo validade housi Sakramentu Eukaristia mak serviço official, mak Nailulik ordenado nebé oficialmente rapresenta Kristo (in persona Christi) [CIC 900) no mós materia no forma Eukaristia [Gagliardi 2016, 747-9).

                São Paulo fo sentido ba Eukaristia nu’udar “Na’i nia banquete” ou Domenica Cena (1Cor 11,20) atu konfirma katak sentru housi Banquete Eukaristiku mak Jesus Kristu: Nia mak uma na’in, Nia prepara aihan, no Nia rasik mak aihan ne’e. Basea ba teologia paulina ne’e, Papa Pio XII iha Mystici Corporis Christi, afirma katak Igreja moris housi Kristu nia missão no Espirito Santo (67). Communio Igreja Eukaristika sentraliza iha Kristu, nebé representa housi Na’ilulik.

                Ida nebé mak hanaran Materia Eukaristika mak paun no tua, nebé sei consagra housi Nailulik atu nakfilak ba Kristu futar isin no ran; no Forma Eukaristika mak Oração Eukaristika sira hotu. Wainhira Na’ilulik konsagra paun no tua ho liafuan nebé pronuncia iha Oração institusional, Eukaristia valida. Teologikamente, valida katak Maromak presente real (realis praesentia) [DS.1651]. Housi ema, liu-liu iha situação deficil, precisa fiar nebé firme” “Na’i, ha’u la soi, maibé dehan dei liafuan ida, ha’u sei hetan maksoin” (Lc 7, 6).

                Tan ne’e, ba Missa daring, solenidade la’os fator esensial. Precisa deit ofisiais balun nebé ajuda nailulik iha altar. Sarani sira seluk bele partecipa liuhousi media sira. Atu ita ho neon ho laran tomak loke ba Maromak espiritualmente, atu iha ‘sentidu fuan nian” (S. Boaventura: sensus cordis) atu hodi senti Maromak nia presenza. Jestu hirak ne’e ajuda ita hodi nakloke ba inan mundo ne’e kanek, no esperansa bo’otba converção housi ita ema nebé hahi liu kultura konsumista.

                Ikus liu, Celebração diak ba ita bo’ot sira hotu, espera katak ita bo’ot deskobre no hasoru Maromak no sempre iha esperança ba Nia iha momentu defisil sira no pronto atu kolabora hodi sai testimunho ba ema seluk. Boa leitura.

Leave a Reply

Your email address will not be published. Required fields are marked *