shadow
Diocese de Dili > NOTÍCIAS > REFLEXÃO > Love Changes Everything

Love Changes Everything

Reflesaun ba Kinta Feira Santa

Frei Joel C. Pinto, OFM

 

Kinta Feira Santa, loron ida nebé importante tebes wainhira ita tama ona iha Semana Santa. Santa Kreda convida ita atu tama ihaTriduum Pascal katak ita hahu konsentra reflesaun sira hotu iha Jesus Cristo nia paixaun, mate no moris hias. Maibé antes tama ba terus, Jesus halo no hatudu exemplo importante liu husi jestu extraordinaria iha Han ba dala ikus (han despedida nian ho escolante sira) nebé ita continua aktualiza hanesan memoria (anamnesis) iha Kinta Feira kalan ne’e.

Artigo ida ne’e atu konvida ita ba halo leitura no reflesaun kona ba Celebrasaun Kinta Feira Santa ne’e.

 

1) Husi Cenácolo (Eucaristia) ba Calvario.

            Iha evangelista sinoptico sira: Mateus, Marcos, no Lucas, ita bele lê kona ba storia Han Kalan Ikus nian. Jesus iha Han Kalan Ikus halo jestu tolu: a) Kaer Paun, fó escolante sira no dehan: “Simu ba hotu-hotu ha, ne’e Ha’u isin, nebé tan simi, sei saran ba mate” (tradusan foun); b) Foti kalis, fó agradese, fó ba escolante sira no dehan: “Simu ba hotu-hotu hemu..ne’e Ha’u ran, ran aliança foun no rohan la’ek..kasu ema salan”. .(ikus liu) Nia dehan: “Halo ida ne’e hodi hanoin Ha’u”. Klaru katak Jesus, nu’udar ema judeu ida, celebra pascoa judeu sira nian ho nia apostolo sira (continuidade) maibé nia fó sentidu foun ba pascoa ne’e: truka sacrificio bibi oan bokur ho nia Isin rasik ne’e sai nu’udar sacrificio bo’ot liu hotu (discontinuidade). Jesus rasik mak ko’alia iha kalan ikus ne’e. “Halo ida ne’e hodi hanoin Ha’u” signifika katak Jesus husu atu apostolo sira (iha tempu ne’eba) no ita hotu (kristaun ohin loron) atu kontinua halo memoria (anamnesis) ida ne’e no aktualiza nafatin liu husi agradecimento loron-loron (eucaristia) nu’dar parte ida fundamental iha ita nia moris hodi hein loron ikus nian (eskatolojia) wainhira Nia mai fali atu hasoru ita ba ho Nia iha uniaun Santissima Trindade [A. Atawolo, 2020].

             Iha Han Kalan Ikus ne’e Jesus silu-fahe paun, fó kalis, signifikata kata fó nia Isin atu ita han no Nia ran atu ita hemu. Ida ne’e mak momentu ita tama iha relasau forte no metin, liu husi Nia Isin. Simu comunhão signifika katak tama iha uniaun hamutuk ho Jesus. Tan ne’e, “eucaristia nebé ita celebra la’os de’it asaun Kreda nian, maibé asaun Cristo nian rasik” (R. Sokolowski, 2006, 70). Testo 1Cor 11, 20 nu’udar testo biblico antigo liu nebé haktuir precisamente kona ba Eucaristia usa liafuan “Dominica Cenae”, banquete Na’i nian, hodi hatudu ba banquete povo sira nebé halibur malu hamutuk tan fiar iha Cristo. Husi inicio kedas Igreja sempre celebra Eucaristia no coloca nia iha coração ou centro moris nian (cfr. At 2,46-47).

            Concilio Vaticano II sublinha liu tan katak Eucaristia mak fonte ou we matan no pontu culminante cristaun sira nia moris (cfr. LG 11). Tan iha Eucaristia ita Kreda manifesta ninia rico soi mak Cristo nu’udar Bibi Oan Pascoa nian no Pão Moris (cfr. Jn 6). Kreda halibur hamutuk hodi halo memoria kona ba Cristo nia moris, terus, mate no moris iha Eucaristia. Kreda halo fila fali Cristo nia jestu (la’os repete): Foti pão, haraik bencão, silu-fahe, fó ba escolante sira (cfr. Mt 26, 27; Lc 24, 13-35).

            Lós katak ita husi Cenácolo, fatin Jesus halo despedida ho nia escolante sira ita ba Calvario. Iha Han Kalan Ikus Cristo rasik sacrifica ona nia-an, maibé sacrificio bo’ot liu mak iha Calvario. Iha nebé Jesus Cristo realiza ofertorio bo’ot liu hotu (oblatio) no sacrificio (sacrificium). Iha cruz Calvario, revela mai ita Maromak nu’udar lógos no amor (domin). Manifesta Aman Maromak nu’udar Caritas Est (J. Ratzinger-Bento XVI, 2005; Card. Kurt Koch, 2015,18-44). Iha Cruz manifesta il Traffito, amor ferido (Ratzinger, 1968, 213-215).

 

2) “Halo ida ne’e hodi hanoin Ha’u”

            Iha Kinta dader, Na’i Bispo hamutuk ho Na’ilulik sira hotu halo renovasaun ba sira nia promesa vocasaun presbiteral nian (tan razaun tempo no distancia, Diocese Dili hala’o ona semana ida antes tama iha Semana Santa ne’e). Renovasaun ba vocasaun sacerdotal ne’e hodi hanoin fila hikas ba knaar hodi servi nebé apostolo sira simu iha Han Kalan Ikus nian (Perjamuan Terakhir) wainhira Nai Jesus rasik husik hela lia menon ne’e: “Halo ida ne’e hodi hanoin Ha’u” (1Cor 11,23-27).

            Ita hakarak buka tuir sacramento ordem ou sacerdocio nia abut iha nebé? Sacerdocio, iha nia abut nebé klean, mak sacerdocio Cristo nian. Cristo mak hasa’e sacrificio, Nia An rasik, ba Aman Maromak, ho Nia Isin no ran, no ho Nia sacrificio jusitifika povo hotu no indireitamente lori fila fali criatura tomak ba Aman Maromak. Sacerdote, ho celebra eucaristia loron-loron, tun ba iha misterio ne’e. Tan ne’e, sacerdote ida ou nailulik, hakarak ka lakohi, celebrasaun eucaristia nu’udar parte importante iha no centro ba nia moris.

            Dala ida tan, iha Han kalan Ikus, Cristo rasik hasa’e sacrificio ida bo’ot liu sacrificio sira hotu. Nia pronuncia liafuan consecratoris sira ne’e: “Ne’e Ha’u nia isin..ne’e kalis Ha’u ran..Halo ida ne’e hodi hanoin Ha’u”.  Memoria (Hanoin) saida? Memoria nebé aktualiza no halo presente evento ne’e dunik. Memoria ida nebé iha tempo hanesan nu’udar presença. Na’ilulik ou sacerdote nu’udar in persona Christi (representa Cristo rasik). Ho ida ne’e mak ita bele compreende no considera katak Han Kalan Ikus  nu’udar fundamento ba institusaun sacramento ordem. Decreto Presbyterorum Ordinis art. 2 sublinha nune’e: “O Senhor Jesus, ‘a quem o Pai santificou e enviou ao mundo (Jn 10,36), tornou partecipante todo o Seu Corpo místico da unção do Espírito Santo com que Ele mesmo tinha sido ungido’: n’Ele, com efeito, todos os fiéis se tornam sacerdócio santo e real, oferecem vítimas a Deus por meio de Jesus Cristo e anunciem as virtudes d’Aquele que os chamou das trevas para a Sua luz admirável”. Nune’e, sacerdote/nailulik iha caracter ida nebé particular no configura iha Cristo nia sacerdócio, no ho maneira hanesan hala’o knaar hodi Cristo nu’udar Ulun nia naran (PO, 2). Tan ne’e, banquete eucarísticao mak centro ba asembleia fiéis sira nebé nailulik preside. São Francisco de Assis louva dignidade nailulik sira nian. Iha ninia cartas salienta knaar nebé nailulik exerce. Ba nia, maske nailulik ida sala na’in, liman fo’er no escandalo oi-oin, ha’u sei la sés husi nia, tan nia de’it mak bele celebra mai ha’u no manifesta realmente no aktual Na’i Jesus Cristo nia futar Isin no Ran [cfr. Francisco de Assis, Carta a todos os Clérigos(CCL), FF, 105; Carta a toda a Ordem (CO)].

 

3. Fase Ain. Sinal saida?

            Egangelista João la haktuir kona ba Eucaristia, maibé nia haktuir kona ba fase ain. ‘Fase ain’ nu’udar rito simbólico ida nebé Jesus halo iha Han Kalan Ikus ho nia apostolo sira. Iha tradisaun Judeu sira nian, iha kontekstu ne’eba, la’o iha dalan nakonu ho rai rahun, nun’e antes tama ba uma, bai-bain uma na’in tau be iha uma oin hodi fase ain mak tama ba uma laran. Se mak fase? Atan sira mak fase nia na’in nia ain; ou escolante mak sei fase mestre sira nian ain. Maibé jestu nebé Jesus foti no halo la’o contrario ho tradisaun nebé moris ona iha tempo neba. Jesus mak husik hela nia tur fatin, kesi hena mutin iha kanotak no hahu escolante sira ain. Nia halo hela knaar atan sira nian. Maibé, fase ain signifikata saida ba ita ema fiar nain sira?  

            Jesus fase escolante sira nia ain. Perguntas antes ba oin, tansa mak ain? Nunee mos Pedro husi ba nia. Ita hatene katak ain nu’udar parte ida okos liu iha estrutura biolojika ema nia isin. Ain hodi tonka isin lolon tomak. Ain hodi sama ba rai no mos forsa atu hodi hakat (literalmente). Laiha ain signifika katak labele la’o ou halo movimento normal no lalais. Klaru katak, sein ain mos sei bele halo buat ruma (maibé iha ne’e sei la koalia kona ba humanismo contemporaneo nebé defende deficiente sira). Bele halo buat ruma maibé limitado.

            Sei bele haklean nafatin. Tan sa mak simbolo fase ain ne’e importante los? Wainhira ita le’e iha Evangelho S. João nian relata katak to’o ninia turno, Pedro kestiona kona ba jestu nebé Jesus halo: Ita labele fase fasi de’it ha’u ain maibé fase mos ha’u oin. Maibé Jesus fo razaun ida nebé fundamental ba Pedro katak la fase ain signifika katak labele hola parte iha Jesus nia moris (cfr. Jn 13,8).

            N. M. Flanagen iha ninia interpretasaun exegetica demonstra katak atitude ‘fase ain’ manifesta ba ita sentido teologika fundamental ruma:

a)      Fase ain simboliza Jesus nia mate nu’udar atan.

b)      Batizmu. Atu hola parte iha Jesus nia mate nebé lori salvasaun, iha rekezito ida nebé fundamental tebes mak tenke fase-an liu husi Batizmu, sein ida ne’e labela hola parte iha Nia no ho maneira ida ne’e mak ita hetan santifikasaun no purifikadu (la precisa fase tan ou haris tan).

c)      Fase ain ne’e lori ita ba iha knaar ética atan nian, maka ita tenke servi malu (cfr. Jo 13, 12-17). Tan simu ona Batizmu iha Jesus Cristo nia mate nebé salva, ita tenke halo tuir Nia; halo tuir buat hotu nebé nia halo (v. 15). Ida ne’e mak nu’udar imagem profética husi moris ita ema kristaun nian (cfr. N. M. Flanagen, “Yohanes”, iha D. Bergant & R. Kariz, 2002, 188-9).

            Jean Vanier iha nia Drawn into the Mystery of Jesus through the Gospel of John (2004) hateten katak atituted nebé Jesus halo hanesan modo indikativu ida ba ita hotu ne’e hakerek ona iha Prolog Evangelho João nian ne’e. Prolog João desenha katak Maromak tun no inkarna atu lori ita ba Maromak hamutuk ho nia iha Nia kadunan (ho lia fuan seluk ita dehan Maromak descende/tun mai atu humaniza Maromak – inkarna iha realidade ema – no iha momentu hanesan diviniza ema no lori fila fali ba fonte moris nian, Maromak). Nune’e mos iha eventu han kalan ikus ne’e ita hare Jesus ‘tun’, hakne’ak atu fase escolante sira ain (cfr. Vanier, 2004, 303).

            Iha tradisaun judaica, fase ain nu’uda knaar atan sira nian: ida nebé kraik liu fasi sira nebé iha leten sira ain, escolante fase nia mestri ain, povo ki’ik fase liurai nia ain. Nunca acontece katak liurai hakne’ak no hakruuk hodi fasi povo nia ain, ou mestre fase escolante nia ain. Ida ne’e mak halo Pedro ho escolante sira dala ruma labele simu logika nebé Jesus pratika hela ne’e. Nune’e, Pedro rejeita. Tan tuir nia, Jesus mak nia Mestre, tenke iha leten. Maibé Jesus hakarak constroi relasaun foun ho Pedro, atu nia bele hader no conciente katak nia hetan bolu atu hadomi ema seluk, hanesan Jesus hadomi nia (Vanier, 2004, 305)

 

3.1). Critica Social: transformasaun husi sociedade piramida ba sociedade Isin lolon (Corpo).

            Jestu nebé mak Jesus halo: hakru’uk hodi fase ain. Jestu hakne’eak no hakruuk nu’udar modo indikativu ida nebé liu husi atitude ne’e Jesus demonstra aktu humildade nebé profunda tebes. Maibé atitude hakru’uk hodi fase ain mos nu’udar antisipasaun ba Misterio Bo’ot nebé hanaran Misterio Kenosis, liu-liu wainhira ita hare ba hino filipesi 2, 1-11 ne’e proklama katak maske nu’udar Maromak, Jesus Cristo, husik hela nia aan, hamamuk (empty) hodi hola ilas nu’udar atan, hodi saran ba mate no mate iha Cruz. Saun Paolo dehan tan iha epistola daruak ba sarani sira iha Corinto nune’e: “Nia ida nebé rico, halo an kiak, atu ita sai rico..” (2Cor 8,9). Ida ne’e mak hatudu mai ita skandalon husi fiar kristaun ne’e (H. U. Von Baltazar, 2005, 23,25 &52).

            Ita hare katak kontestu politico socio-cultural mos hola parte iha formasaun ba ema ida nia moris. Jesus halo dialogo ho nia contesto maibé iha tempo hanesan fó conteudo foun no, konserteza,choque malu ho tradisaun antiga nebé forte tebes, liu-liu iha Jesus nia tempu, estatuto modelu sociedade piramida (ida nebé mak ukun mak dia nebé rico, ida nebe matenek), iha okos sira nebé serviço laiha, moras mental, ou sira nebé difavel (Vanier, 2004, 306). Ita observa iha nia jestu sira katak Nia (Jesus) mai atu muda modelu sociedade piramida ba modelu sociedade Corpo (Isin). Tuir modelu Isin, kada ema no hotu-hotu iha fatin, funsaun normal, hotu-hotu kompleta malu no interdependensia. Hotu-hotu hetan bolu atu hala’o missaun ba humanidade nebé Isin ida deit no iha Igreja (cfr. 1Cor 12). Hatudu an ki’ik, hakneak no hakruuk, nu’udar konvite ba ita hotu, nia escolante, atu fo atensaun ba sira hotu nebé ki’ik iha sociedade.

 

3.2). Imi tenke halo nune’e ba malu: Amizade para sempre.

            Hafoin fase ain hotu, Jesus husu ba escolante sira atu halo tuir buat nebé Nia halo ona: “Imi halia Ha’u Mestre no Na’i. Imi dehan lós duni: basá Ha’u Mestre duni, Ha’u Na’i tebes. Maski Mestre, maski Na’i, Ha’u fase imi ain. Ne’e duni, imi mos sei halo hanesan ne’e ba malu. Imi sei banati tuir nu’udar ha’u foin halo” (Jn 13, 13-15). Wainhira Jesus husu ita atu fase ain ba malu, Nia konvida ita atu hadomi malu, servi, no perdua malu.

            Jean Vanier halo reflesaun ida klean tebes wainhira nia toka asuntu han kalan ikus kompara ho fase ain. Nia dehan nune’e: “Iha han kalan hamutuk, Jesus koalia ba escolante sira hotu, maibé Nia laiha kontaktu pessoal ho sira ida-idak. Mas, wainhira Nia hakneak ho humilde iha sira ida-idak oin no fase sira ain, Nia iha kontaktu ida pessoalmente ho sira ida-idak; domin ida nebé iha tempo hanesan halo forte maibé mos desafia. Nia hare iha sira ida-idak Aman Maromak nia presenza, nebé Nia hadomi no servi (cfr. Vanier, 2004, 313). Ho fase escolante sira ain, Jesus la halakon nia kbi’it. Nia hateten katak Nia iha kbi’it, katak Nia mak “Na’i no Mestre” (Vanier, 2004, 314). Maibé, Nia hakarak manifesta maneira foun atu hala’o poder, liu husi atitude humildade, servi, no domin, liu husi unidade iha fuan, ho vontade atu sai ponte entre sira nebé ukun no sira nebé nu’udar atan. Hanesan exemplo ida husi Mahatma Gandhi nebé hetan inspirasaun klean husi Jesus, liu-liu iha hanorin iha Laletek no Fase Ain.

            Pergunta ba ita mak ne’e: oinsa Jesus nia jestu no liafuan sira bele sai nu’udar transformador ba ita hotu? Liu husi fasi ain, Jesus hatudu dalan ida ba ita oin atu sai maun-alin ba malu. Jesus nia liafuan ba apostolo sira no ita hotu katak “Sei hadomi malu nu’udar Ha’u hadomi imi”. Domin mak sai alicerse ba moris nu’udar maun alin. Moris nu’udar maun-alin ida ho caractere “para sempre”, la’os “por enquanto dura” (untuk selama-lamanya, bukan sejauh bertahan..) (cfr. Z. Bauman, 2010). Sai maun-alin signifika katak ita pronto atu constroi amizade ida ho caracteristica genuine no autentica. Jesus hatudu ninia atitude genuine no autentica ba escolante sira. La’os atu sai amigo bai-bain de’it, maibé sai amigo para sempre, pronto atu ofrese nia an tomak ba nia maluk ou amigo sira.

            Tan sa mak tenke constroi amizade ida nebé autentico no genuine? Tanba, amizade nebé ema constroi ohin loron depende ba interesse no nakonu ho falsidade no iha pretensaun barak hanesan camaleão – nebé bele adapta lalais iha contesto balun hodi buka diak ba nia an. Nune’e, iha risco atu hamosu traição (pengkhianatan). Hanesan Judas, nu’udar Jesus nia Maun-Alin ou amigo iha grupo doze, dala barak, wainhira Jesus halo asaun ruma nia sempre repara no iha nia hanoin orientasaun ba osan. Judas Iscariotes hanesan figura amigo ida nebé ko’alia diak iha oin no fila sona husi kotuk. Nia hatudu ba ita katak traição ne’e hahu husi meja wainhira ita tur han hamutuk. Amigo diak bele mos trai nia amigo sira. Traição mos bele mosu iha kuarto laran ou kama leten, entre kaben fén ho la’en. Liu-liu ho presenza husi era digital, mobil ou cell phone halo ita fasil atu kontaktu malu maibé mos fasil atu sobu no estraga ita nia relasaun familiar, relasaun fen ho la’en. Ida nebé do’ok ita dada besik no ida nebé besik ita so’e tiha ba dook. Ita asegura amizade ho ida nebé mediada husi mundo virtual, ecrã deit, ita fó incerteza ba ida nebé real no sempre hamutuk ho ita kalan loron. Traição mos bele mosu iha area politica. Individu balun wainhira halo politica, bele ho manobra oi-oin, buka dalan atu hodi manan ou hamonu nia adversario. Ida ne’e hatudu los katak iha vida politica la existe amigo para sempre maibé amigo por enquanto iha interesse. Tan ne’e, iha campo ida ne’e, ohin bele sai nu’udar amigo maibé aban bele sai adversario.

 

3.3. Leadership skill learning.

            Jesus konvida mos ita no hanorin ita atu aprende oinsa iha skill diak nu’udar leader ou ulun. Nia hatudu ho hahalok katak hala’o knaar nebé fó ba ita tenke ho responsabilidade, sein iha dicotomia entre ida nebé mak suporta oula suporta ha’u. Nia hala’o ona missaun nebé Aman haruka atu Nia halo to’o ona rohan no hala’o ho responsabilidade massima. Knaar nebé nia halo ba ema hotu. Iha nia experiencia, Jesus hatene katak Pedro ho Judas ne’e na’in rua nebé problematico uitoan. Pedro sei sai negador no Judas Iscariotes sei sai traidor ba Jesus. Maske nune’e, Jesus la halo konta kona ba buat hirak ne’e ho sira. Jesus hatene katak sira sei iha dispozisaun nune’e maibé ne’e la hamenus Nia domin ba sira nain rua. Jesus la hases ou ezonera sira husi grupo na’in sanulu resin rua (doze) maibé fo hanoin ba sira liu husi maneira nebé delicada no humana. Signifika katak Jesus simu sira nain rua nia frakezas nu’udar possibilidade ida hodi aperfeisoa nafatin sira liu husi formasaun continua.

            Ita bele aprende husi Jesus kona ba maneira diak atu halo politica. Jesus apresenta modelo halo politico ida nebé  fó atensaun ba bem comum, interesse comum – opsaun ba ema barak nia diak. Jesus hatudu katak leader diak ne’e nia halo buat hotu ba ema hotu. Nia sei la konsidera ida ne’e la vota ba ha’u ou la suporta ba ha’u. Nia halo buat hotu ba ema nia diak, maske nia hatene katak ema seluk iha, fatin balun la suporta ou nunka respeita ba nia. Iha linguagem teologia nia karik Jesus hala’o missaun universal salvasaun ida. Katak salvasaun ne’e la’os ba grupo balun nebé predestinado ona maibé ba ema hotu. Nune’e iha politica, program liu husi visaun no missaun governo nian atu lori moris diak (salvasaun) ba ema hotu.

 

Taka.

            Buat hotu nebé Jesus halo, jestu ou atitude sira nebé ita hare ona, hodi manifesta nia domin. Nia mak domin no domin ne’e tenke lori mudançano transforma buat hotu individualmente no mos socialmente.Nia hatudu domin ida nebé incondicional. Kasih yang mengasihi tanpa mengharapkan untuk dikasihi. Nune’e ita bele dehan Love changes everything ***

Leave a Reply

Your email address will not be published. Required fields are marked *