shadow
Diocese de Dili > NOTÍCIAS > Notícias > ESTUDANTES BALUN IHA QUARENTENA LAKOHI COLABORA HO EQUIPA MÉDICO

ESTUDANTES BALUN IHA QUARENTENA LAKOHI COLABORA HO EQUIPA MÉDICO

DILI 21 abril 2020 (DCAD) – Superintedente Polícia Município Dili Armando Monteiro informa situação ba jornalista sira terça ne’e iha Hotel Leokase Raikotu Dili katak, equipa médico tenta aplica exercício físico ba cidadão sira iha quarentena tuir procedimento Centro Integrado Gestão de Crise nian, maibé sidadão nebé iha hela periode de encubação 14 dias iha quarentena Hotel Leokase lakohi cumpre regras no la colabora didiak ho equipa médico.

“Ohin dadersan tuku 9;00, equipa médico nebé destaca iha hotel Leokase ne’e ho hanoin diak atu halo atendimento ba ita nia maluk sira iha quarentena, liu husi aplica exercício físico ba maluk timoroan sira. Maibé tanba ita nia maluk sira ne’e lakohi colabora ho equipa médico sira hodi mosu desentendimento balun. Tanba ne’e mak ohin hau apela ba sira atu sira labele hanoin deit 14 dias hotu atu fila fali ba uma maibé ita hein resultado nebé amostra médico sira hasai atu nune’e fila fali ba ita nia família labele transmite fali ba sira, dehan Armando Monteiro”.

Armando Monteiro haktuir tan katak “Caracterísitica balun nebé Ita nia estudante sira hatudu katak talves serviço específico balun nebé maka médico halao, maibé sira mos obriga médico sira atu fo hatene ba sira. Então husi ida ne’e mak sira la colabora hodi nune’e sira tenta reseita no atu ameaças no intimida ba ita nia médico sira. Tanba ne’e, hau mai iha ne’e halo comunicação ho sira atu husu sira colabora hodi nune’e ita nia médico sira halo serviço iha flexibilidade oras ba oras no loron ba loron hodi preucupa ba virus nebé oras ne’e ataca hela mundo inclui ita nia rain.

Armando Monteiro hateten tan katak “Tuir lolos sira ne’e hatene regras sira ne’e, tanba maioria husi estudante sira ne’e balun mak estuda kona ba medicina nian. Lolos sira ne’e mka esplica ba sira nia maluk sira. Agora sira mos lahatene sira nia papel, saida mak sira estuda kona ba ciência medicina nian, então halo sira nia maluk sira mos sai confusão”. (Leo)

Leave a Reply

Your email address will not be published. Required fields are marked *