shadow
Diocese de Dili > NOTÍCIAS > REFLEXÃO > FIAR & CUMPRI SAGRADA ESCRITURA

FIAR & CUMPRI SAGRADA ESCRITURA

DOMINGO PÁSCOA III/Ano A/2020

Act 2,14.22-33  1Ped 1,17-21  Lc 24,13-35

 

Maromak tau Jesus Nazaré, iha imi na leet, hodi halo kmanek ksolok oi-oin, kmanek nebé, hodi Nia, Maromak halo ba imi, nu’udar imi hatene (….)Maromak halo Nia moris hias, hasai Nia housi susar mate-bian sira; tan mate la bele ukun Nia.Escolante nain rua halo viagem ba aldeia Emaus distância 12 km husi cidade Jerusalem. Tuir dalan klaran, sira nain rua konta istória kona ba acontecimento Jesus nia terus, mate no moris hias. Iha viagem nee, Jesus teki-tekil mos mosu, lao hamutuk ho sira no tama mos iha conversa nee. Maibé, wainhira Jesus tama hamutuk ho sira hodi han hamutuk, sira matan hakfodak no de repente deit Jesus lakon husi sira leet.

Escolante nain rua nee koalia ba malu: “Ita laran la manas, wainhira Nia ko’alia tuir dalan hodi hanourin Escritura?”. Maromak futar Lia Fuan semana nee, convida ita nobun hodi compreende no fiar didiak sentido Sagrada Escristura ba ita nia moris sarani.

Relato kona ba escolante rua nee ho Jesus nia aparição hakarak fortifica fali facto Jesus nia moris hias.

Nu’udar sarani, ita consciente katak; Fé (fiar) nebé ita hakuak (aceita), nia we-matan mai husi Sagrada Escritura nebé Uma Kreda conserva no ita simu tutan husi geração ba Geração. Oras nee, mosu Sagrada Escritura versão oi-oin tuir denominação ida-idak (irmãos protestantes) niam, tuir seita (sekte jeova) nian inclui seita sira seluk no tuir Igreja Católica nian. Nudar Católico, ita iha rasik Bíblia Sagrada (Sagrada Escritura) nebé Igreja conserva ninia Originalidade too oras nee.

Nudar Católico, ita precisa imita maneira rua tuir mai atu oinsa ita comporta perante Sagrada Escritura:

Primeiro: Sagrada Escritura bele considera hanesan livro tuan ida nebé folin/valor boot tebes., nakonu ho lia sabedoria religiosa, contem valor moral, inclui poesia religiosa mesak murak. Liu husi Bíblia (Bíblia Católica) nee, ita bele hatene oitoan oinsa situação religiosa Judeu-Cristão iha tempo uluk, nebé ikus mai fiar nee confronta ho tradição cultural ita nian oras nee nebé mosu ho novidade oi-oin. Maibé, nudar Católico ita precisa fiar nafatin ita nia Bíblia nebé contem Maromak nia Lai Fuan mesak furak. Bíblia sagrada mos nudar livro nebé imprime dala barak liu compara ho livro sira seluk iha mundo nee. Tan nee mak ita precisa orgulho no fiar nafatin.

Segundo: Nudar sarani ita iha obrigação hodi fiar no halo tuir saida mak Sagrada Escritura haruka basá, Sagrada Escritura (Bíblia) mak Maromak nia Lia Fuan moris ba ita nia moris sarani. Sagrada Escritura nudar livro lulik ida nebé ema hakerek tuir inspiração Espírito Santo. Los duni ema mak hakerek tuir capacidade no limitação ruma maibé, inspiração nafatin mai husi Maromak. Nunee, Sagrada Escritura nudar livro humano tan ema mak hakerek maibé, ao mesmo tempo nudar livro Divino tan Maromak mak inspira. Sagrada Escritura  hakarak hasee ema hotu iha qualquer tempo hodi descreve sentido lolos husi moris no mate.

Buat nebe essencial liu atu ita precisa hatene mak; buat hotu nebé relata iha Sagrada Escritura nudar expressão domin husi Maromak ba ema. Tanba nee mak Santo Agostinho expressa Maromak nia domin hanesan tuir mai:

Se loron ruma, desastre natural boot ruma acontece hodi halakon tiha Sagrada Escritura no hela deit mak tahan ida mos nebé ema bele lee no iha nebá ita hetan deit frase husi são João nia carta dahuluk nebé tenik; DEUS É AMOR (Maromak mak Domin), então nee significa katak, conteudo tomak husi Bíblia seguro no completo hela. Basá, Sagrada Escritura nia conteudo tomak resumido iha frase simples nee.

Tanba nee mak ema wain ba wain mak lee lesuk Bíblia nee husi tempo ba tempo, maske ita la matenek, la escola hasai curso boot maibé, ita nia carater simple no fiar ba Espírito Santo nia tulun nebé contem iha Bíblia refere, ita bele hetan resposta/solução ruma ba moris nee maske oras nee, Covid19 muda buat barak iha sociedade no fo impacto mos ba ema barak nia moris. Fair nebé mtin hanesan besi asu mak bele fo netik laran metin ba ita nudar Católico.

Precisa lalaok rua atu sarani ida-idak bele sente Sagrada Escritura nudar Maromak nia Lia Fuan. Primeiro, liu husi ciência no ida seluk be importante liu mak Fiar (Fé). Lalaok rua nee precisa equilibrado (balanço) hodi la hamosu contradição iha pratica. Sarani iha obrigação hodi rona, lee no fiar metin ba Sagrada Escritura. Ita precisa hatene le hodi compreende didiak saida mak hakerek iha neba. Se ita la tuir guia simples hirak nee, ikus mai bele hamosu desentendimento no confusão iha saida mak ita fiar. Exemplo concreto mak seita no denomição rihun-rahun iha cristianismo nia história tan deit ema interpreta Bíblia tuir saida mak nia hanoin laos tuir saida mak Magistério da Igreja decide.

Seita barak, denominação reb-rebo mosu tanba mal interpretação. Uma Kreda Católica forte tanba respeita ba hirarquia no halo tuir Maromak nia haruka basea ba interpretação Bíblica nebé Magistério halo.

Fundamentalismo mosu iha cristianismo no religião sira seluk nia laran tanba ema interpreta livro Sagrado tuir nia hanoin rasik. tuir mai, nia aplica hanoin pessoal nee ba realidade moris. Tanba nee mak ohin loron iha media social, iha jornal, iha website, mosu seita bar-barak nebé obriga ema tenke fiar ida nee, fiar ida neba se lae tama tama inferno. Too ponto ida nee, ita husu então Deus é Amor mak ida nebé?

Sagrada Escritura existe nudar mata dalan (guião) atu ita fiar Maromak nudar criador do universo no Bíblia nee rasik nudar mata dalan atu oinsa ita fiar no moris tuir criatura de Deus nebé buka hela salvação iha rai nee.

Iha Sagrada Escritura, Maromak koalia ba ita adapta tuir ita nia situação actual sociedade nian. Oras nee, Covid19 hamosu interpretação reb-rebo; balu dehan Covid 19 nudar Maromak nia castigo, balu dehan Covied nee ema mak inventa, seluk dehan Covid nee ciclo mundial ida,…nst. Buat nebe importante liu perante situação hanesan nee mak cumpri saida mak estado haruka no la bele lakon fiar ba Maromak basá, Maromak nudar Criador hatene saida mak Ninia Criatura precisa. Estado mos iha ona plano atu fo apoio ba comunidade tomak nebé la bele halo actividade durante Estado Emergência nee. Dala ida tan Deus é Amor.

Iha relato Evangelho semana kotuk, Jesus mosu hodi lori paz no tranquilidade ba apóstolo sira nebé horik iha tauk nia laran. Dala ira tan, semana nee Jesus presente nafatin hamutuk ho ita liu husi escolante nain rua hodi afirma katak Nai horik ho Ita (Emmanuel) no presença Jesus nian nee hodi expressa Deus é Amor.

Jesus horik nafatin ho ita too tempo nia rohan. Ninia Futar Lia Fuan sira sai hanesan bukae moris espiritual. Estado halo nia parte hodi completa bukae isin nian liu husi plano subsídio ba cada Uma kain. Silu no fahe pão fo sentido Eucaristia (Missa). Físicamente, fahe ai-han nebé estado halo ba povo, hanesan mos Eucaristia Domin ida. Basá Deus é Amor. Ita cumpri saida mak kreda haruka hodi reza iha uma no participa missa iha televisão no Radio no cumpri mos saida mak estado haruka hodi hakmatek iha fatin atu hakotu Covid19 nebé daed no bele hamate ema barak.  Assim Seja e Bem Hajav (ignaslopes)

Leave a Reply

Your email address will not be published. Required fields are marked *