shadow
Diocese de Dili > NOTÍCIAS > LETURA DIÁRIA > IV Domingo Tempo Páscoa (ANO A)

IV Domingo Tempo Páscoa (ANO A)

Primeira Leitura               Act. 2, 14a, 36-41

Lia housi livro Apóstolo sira nia hahalok:

Iha loron Pentecostes, Pedro hamriik ho Apóstolo sanulu resin rua, foti lian hateten ba povo:  “Israel nia uma laran tomak hatene lolos ne’e:  Maromak halo Na’i Messias Jesus nebe imi hedi ba cruz.” Rona tiha lia hirak ne’e, sira nia laran hakfodak hodi husu ba Pedro no ba Apóstolo sira seluk: “Maun sira, ami sei halo los sa?” Pedro simu ba sira: “Hakribit imi nia salan;  ida-idak simu baptismo hodi Jesus Cristo nia naran, atu bele hetan perdua ba imi nia salan. Hafoin, imi sei simu Espirito Santo nia kbiit.  Cristo hameno kbiit ida ne’e ba imi, ba imi nia oan sira, no mos ba sira hotu nebe ita nia Maromak bolu housi dook.” Ho lia-fuan wa’in liu tan, Pedro hanourin sira hodi fo laran kman ba sira.  Nia dehan teni:  “Buka sai housi moris aat ida ne’e.”  Sira simu Pedro nia lia-fuan sira, hodi simu baptismo.  Iha loron ida ne’e, ema besik rihun tolu ba hamutuk ho Apóstolo sira hodi simu baptismo.

Maromak Futar Lia.

 

Salmo Responsorial                                                                                                                                      Sal. 22(23), 1-3a, 3b-4, 5, 6

Refrão : Maromak ha’u nia Maksoyn: sá sei susar mai ha’u!!! Repete-se

Maromak ha’u nia Maksoyn, ha’u la susar,

halo ha’u hakmá iha fatin kmook,

lori ha’u ba wé-matan di’ak,

haraik kbiit mai ha’u isin. Refrão

 

Lori ha’u ba dalan diak

atu hahi Nia naran.

Liu housi nakukun, ha’u la ta’uk,

Maromak ho ha’u, tahan ha’u nafatin. Refrão

 

Iha ema aat sira oin

Na’i tau mesa nakonu.

Tau mina santo iha ha’u ulun,

ha’u kusin nakonu to’o suli. Refrão

 

Na’i nia laran luak tahan ha’u

iha ha’u nia moris tomak.

Ha’u sei hela iha Na’i nia kadunan

iha ha’u nia moris tomak. Refrão

 

Segunda Leitura                                                                                                                                                                     1 Pe. 2, 20b-25

Lia housi São Pedro nia surat:

Doben sira:  Tan halo di’ak imi hetan terus, imi sei hetan di’ak iha Maromak futar oin. Ba ne’e mak bolu imi,  hodi hanourin atu imi tuir Nia ain-fatin. Nia la sala ida, housi Nia la sai lia aat ruma. Wainhira ema dehan aat Nia, Nia la selu ho aat; wainhira terus, la selu ho lia hatatan. Nia saran-An ba Maromak nebe tesi lia los de’it. Iha Nia isin, Nia lori ita salan hodi terus iha cruz;  atu nune’e, mate tiha ba sala ita bele moris hanesan ema santo. Tan Nia kanek, mak imi hetan di’ak. Imi, uluk hanesan bibi la’o sala dalan, maibe, oras ne’e, imi fila fali ba Bibi-Atan, ba Ida be tau matan ba imi.

Maromak Futar Lia.

 

Aclamação                                                                                                                                                                                           Jo. 10. 14

Refrão : Aleluia, Aleluia!! Repete-se

Ha’u mak bibi-Atan di’ak;

Ha’u hatene bibi sira,

sira hatene Ha’u. Refrão

 

Evangelho                                                                                                                                                                                        Jo. 10. 1-10

Na’i Jesus Cristo nia Evangelho nu’udar São João haktuir:

Iha tempo nebá, Jesus hateten nune’e: “Tebes, Ha’u dehan ba imi: Ida nebé la tama housi lutu-matan maibé tama housi fatin seluk, ema ne’e, na’ukteen ida. Maibé ida nebé tama housi lutu-matan, nia mak bibi-na’in. Nia bolu bibi sira hodi sira naran, hodi lori sira ba liur. Hafoin, hasai hotu tiha nia bibi sira, nia sei ba uluk, loke dalan; bibi sira sei tuir nia, tan hatene nia lian. Maibé, bibi sira sei la tuir ema leet ida; sei halai housi nia, tan sira la hatene ema leet nia lian”. Ne’e, lia nebé Jesus tanesan ba sira nebé rona; maibé sira la hatene Jesus ko’alia kona ba sá. Jesus dehan tan ba sira: “Tebes, Ha’u dehan tebes ba imi: Ha’u ne’e bibi sira nia lutu-matan. Ema hotu nebé mai uluk liu Ha’u, sira ne’e mesak na’ukteen no ahu-na’in; maibé bibi sira la rona sira lian. Ha’u lutu-matan. Ida nebé liu housi Ha’u, sei hetan maksoyn; nia sei tama, sei sai hodi hetan du’ut matak. Ema na’ukteen mai atu na’uk, atu harahun de’it. Ha’u mai atu ema hetan moris, hodi di’ak liu tan”.

Lia Maksoyn.

Leave a Reply

Your email address will not be published. Required fields are marked *