shadow
Diocese de Dili > NOTÍCIAS > Notícias > Antigos Alunos Colégio S. José 1998 Halo Doação ‘Face Shield’ ba Laboratório Nacional Saúde (LNS)

Antigos Alunos Colégio S. José 1998 Halo Doação ‘Face Shield’ ba Laboratório Nacional Saúde (LNS)

Dili 4 Maio 2020 (DCAD) – Antigos Alunos Colégio São José 1998 (Bach 98) ohin (04/05/2020) halo doação protector ba oin (Face Shield) hamutuk unidade 150 (caixa 8) ba Laboratório Nacional Saúde (LNS) Timor-Leste. Ação ne’e nudar forma contribuição no agradecimento ba pessoal saúde sira iha linha frente nebé ho profissionalismo no dedicação tomak halo mitigação prevenção no combate Covid-19 iha Timor-Leste. Porta-voz colégio São José ‘98’, Armando da Costa lori Antigos Alunos Colégio São José tomak reconhece gravidade hosi crise saúde causa hosi surtu pandemia Covid-19 nebé iha impacto boot laos deit ba Timor-Leste, maibé mos globalmente.

Porta-voz colégio São José ‘98’, Armando da Costa nafatin lori Antigos Alunos Colégio São José ‘98’ tomak felicita esforço hosi Governo Timor-Leste inclui assegura proteção ba pessoal saúde sira, maibé ho situação global nebé mundo tomak enfrenta halo buat hotu sai susar tebes no nia processo la’o neneik. Nia parte afirma katak, hare ba situção real ida ne’e, antigos alunos colégio São José halibur malu hikas fali no mai ho iniciativa hodi dezenvolve no produz rasik equipamentos proteção oin nian (face shield) uja produto sira nebé disponível iha loja balu iha Dili laran.

Tuir Porta-voz colégio São José ‘98’, Armando da Costa haktuir katak Contribuição ida ne’e nu’udar conretização hosi Dalan Inaciano ka haktuir Ain fatin Santo Inácio hosi Loyola (Caminho Inaciano) nebé tane as princípio “women and men for and with others” (feto no mane ba, no hamutuk ho ema seluk)” nebé Ordem Jesuita sira hanorin no kuda iha antigos alunos hirak ne’e ninian hanoin durante sira nia formação iha Colégio São José, hosi tinan 1995-1998.

Ho optimismo, Porta-voz colégio São José ‘98’, Armando da Costa hamutuk ho Antigos Alunos Colégio São José ‘98’ garantia katak ho doação ida ne’e bele hakman liu tan todan nebé profissional saúde sira enfrenta liu-liu ho limitação proteçao pessoal (EPP) hodi luta hasoru surtu Covid-19. Hamutuk ita sei bele manan Covid-19. (Alin)

Leave a Reply

Your email address will not be published. Required fields are marked *