shadow
Diocese de Dili > NOTÍCIAS > LETURA DIÁRIA > Quinta-Feira, IV Semana da Páscoa (ANO A)

Quinta-Feira, IV Semana da Páscoa (ANO A)

Primeira Leitura                      Act. 13. 13-25

Lia husi livro  Apóstolo sira nia hahalok:

Iha loron hirak nebá, Paulo hob nia maluk sira sai husi pafos hodi liu ba perga iha panfília. Maibé João Marcos haketak-an tiha husi sira hodi fila hikas ba Jerusalém. Sira sai husi perga ba Antioquia, Pasídiaa nian. Iha sábado ida, sira tama hodi tur iha sinagoga laran. Lê hotu tiha lia husi profeta sira no husi lei, ulun sira sinagoga nian haruka fó hatene ba sira, hodi dehan: “Maun-alin sira, imi iha karik buat ruma atau fó sai ba povo, dehan ba!” Paulo hamriik halo sinal ho liman, dehan:

“Israel nia emar sira, imi nebé hamta’uk Na’i Maromak, rona mai: povo Israel nia Maromak hili imi nia aman sira, fó tulun ba povo ne’e wainhira sira hela iha rai egipto. Hafoin, lolo liman ba áas, hasai sira husi nebá. Ho domin, hakiak sira iha tinan hatnulu nia laran iha rai-fuik maran. Tuir mai, halakon tiha nação hitunulu iha rai Canaã, haraik ba sira hodi hela ho sira rain iha tinan atus háat limanulu nia laran. Tuir mai, haraik tiha juíz ba sira to’o profeta Samuel. Hahu iha tempo ne’e, sira husu liurai ida no Na’i Maromak haraik duni ba sira, iha tinan hatnulu nia laran, Saul, Quis nia oan, husi uma-kain Benjamin nian. Liu tiha ida ne’e, fó David ba sira nu’udar liurai, nebé hodi nia Na’i fó sasin nune’e: Ha’u hetan David, Jessé nia oan, ema ida nebé tuir Ha’u nia hakaran, nebé halo tuir nafatin ha’u nia liafuan’. Husi nia bei-oan ida, nu’udar Na’i Maromak hakotu ona, sei halo mosu ba Israel, Maksoi ida eh Jesus. Wainhira Jesus seida’uk mosu mai, João haklaken ona baptismo ida haderan-an nian ba povo Israel. Besik atu remata knaar nebé nia hala’o João dehan: “Ha’u la’os ida nebé imi hanoin katak nia mak ha’u oan.’ Maibé, imi haré no rona mai: Tuir ha’u, sei mai ida nebé ha’u la so’i atu kore sapatu iha nia ain”.

Maromak Futar Lia.

 

Salmo Responsorial                                                                                                            Sal. 88(89). 2-3, 21-22, 25, 27 (R. cf. 2ª)

Refrão : Na’i, ha’u sei hananu ba nafatin ita laran di’ak!!! Repete-se

Ou             Aleluia!

Ha’u sei hananu ba nafatin Na’i nia laran di’ak, housi oan ba bei-oan;

Ha’u sei haklaken nafatin nia domin.

Na’i dehan: “kmanek harí ba nafatin”,

Harí tiha nia domin iha lalehan leten. Refrão

 

Ha’u hetan David, ha’u nia atan;

Ha’u kose tiha mina santo ba nia,

Atu ha’u liman fó biit ba nia;

Tahan nia ha’u liman nia biit. Refrão

 

Ha’u nia tulun no graça

Sei la’o hamutuk nafatin ho nia;

Nia sei harohan mai ha’u: “Ó ha’u Aman,

Ha’u Maromak no ha’u Mahein”. Refrão

 

Aclamação                                                                                                                                                                                           Ap. 1. 5ab

Refrão : Aleluia, Aleluia!! Repete-se

Jesus Cristo mak sasin nebé laran metin, oan mane boot husi ema mate sira leet;

Nia hadomi ita no hamós ita husi ita nia sala ho nia ran. Refrão

 

Evangelho                                                                                                                                                                                       Jo 13. 16-20

Na’i Jesus Cristo nia Evangelho nu’udar São João haktuir:

Iha tempo nebá, wainhira fase hotu tiha escolante nia ain, Jesus lia tun ba sira, dehan: Tebes, tebes duni, Ha’u dehan ba imi: Atan ida la boot liu nia na’in no mós manu-ain la boot liu fali ida nebé haruka nia mai.wainhira imi hatene hodi halo tuir lolós, imi sei hetan rahun di’ak. Buat nebé ha’u hateten la kona ba imi hot-hotu: Ha’u hatene sira nebé ha’u fihir; maibé Escritura sei hala’o hotu buat nebé hakerek nanis ona iha nia: ‘ ida nebé han ha’u aihan, foti tiha nia ain-tuban hasoru ha’u! husi oras ne’e ha’u haten sai ona ba imi, atu, wainhira buat ne’e mosu karik, imi fiar ona katak ha’u mak ne’e. Tebes, tebes duni ha’u dehan ba imi: Sé mak simu ida nebé ha’u haruka, nia simu ha’u; sé nebé simu ha’u, nia simu ida nebé haruka Ha’u mai”.

Lia Maksoyn.

Leave a Reply

Your email address will not be published. Required fields are marked *