shadow
Diocese de Dili > NOTÍCIAS > LETURA DIÁRIA > V Domingo da Páscoa (ANO A)

V Domingo da Páscoa (ANO A)

Primeira Leitura                           Act. 6, 1-7

Lia housi Livro Apóstolo sira nia hahalok:

Iha loron hirak nebá, ema nebé tuir Jesus sai wa’in tan. Sira nebé mai housi lia grego sira mumú hasouru ema nebé mai housi lia Aramaico; tan iha knaar lor-loron, sira la tau matan ba sira nia feto-faluk. Nune’e, Apóstolo na’in sanulu resin rua halibur escolante sira seluk hodi  dehan ba sira: “Ita la bele husik hodi haklaken Maromak futar lia, atu kaer fali knaar bai-bain. Imi hili husi imi nia leet ema na’in hitu ho moris di’ak; ema ne’e sei iha mos matenek no Espírito Santo nia kmanek atu bele kaer knaar sira ne’e. Ami sei buka kaer de’it knaar kona ba Maromak futar lia hodi halo oração liu tan. ”Lia hirak ne’e, monu lós ba ema tomak nia laran; sira hili Estevão, ema fiar na’in, iha mos Espírito Santo nia kmanek wa’in; sira hili tan: Filipe, Prócoro, Nicanor, Tímon, Pármenas no Nicolau, sarani foun housi Antióquia. Sira lori ema sira ne’e ba hatudu ba Apóstolo sira; Apóstolo sira harohan hodi tau liman ba sira. Maromak nia lia-fuan da’et ba nafatin: iha Jerusalém ema sarani wa’in liu tan; ema sacerdote wa’in mos halo tuir fiar.

Maromak Futar Lia.

 

Salmo Resposorial                                                                                                                                         Sal. 32 (33), 1-2. 4-5. 18-19

Refrão : Na’i, ami hein Ita laran luak!!! Repete-se

Ema santo haklaken Maromak,

Tan sarani tomak sei hahí Nia.

Fo agradese ba Na’i,

Hananu ho harpa ho cítara. Refrão

 

Na’i nia lia-fuan lós tebes,

Housi lialós moris nia sasán;

Na’i hadomi justiça no dalan lós;

Na’i nia domin naburas iha Na’i. Refrão 

 

Na’i tau matan ba sarani sira,

Ba sira nebé hein Nia,

Atu hasai sira housi mate,

Hodi fo moris iha susar laran. Refrão

 

Segunda Leitura                                                                                                                                                                            1 Pe. 2, 4-9

Lia housi São Pedro nia surat:

Doben sira: hakbesik-an ba Na’i. Nia, fatuk moris nebé ita ema hewai; maibé, iha Maromak nia oin,  fatuk kmook teb-tebes. Imi mos hanesan fatuk moris, imi sei nakfilak-an, hanesan uma santo ida nebé ema harí, ba na’ilulik santo, atu hasa’e sacrifício klamar nian nebé haksolok Maromak tan Jesus Cristo. Tan ne’e, lê iha escritura: “ Ha’u sei tau fatuk inan ida iha Sião, di’ak duni, kmook tebes. Ida nebé fiar Nia sei la hetan susar.” Rahun di’ak ba imi nebé fiar. Maibé, ba sira nebé la fiar, “ fatuk ida nebé badaen sira hewai, nakfilak tia ba fatuk inan, fatuk nebé ema sidi, fatuk nebé halo monu.” Sira sidi, tan la fiar Evangelho nia lia-fuan nebé haklaken ba sira. Maibé, imi ema di’ak, na’ilulik liurai, nação santa,povo nebé Maromak hili ba Nia. Nune’e, imi sei haklaken Maromak nia kmanek; Maromak nebé bolu imi housi Nakukun ba roman nabilan nia laran.

Maromak Futar Lia.

 

Aclamação                                                                                                                                                                                             Jo. 14, 5

Refrão : Aleluia, Aleluia!! Repete-se

Na’i ko’alia, “ Ha’u ne’e dalan, lialós no moris hun;

Ema ida la liu karik housi Ha’u,

La bele ba Aman Maromak. Refrão

 

Evangelho                                                                                                                                                                                         Jo. 14, 1-12

Na’i Jesus Cristo nia Evangelho Nu’udar São João haktuir:

Iha tempo nebá, Jesus hateten ba escolante sira: “ Imi neon keta susar. Imi fiar Maromak, sei fiar mos Ha’u. Iha Ha’u Aman nia uman, fatin wa’in. La hanesan ne’e karik, Ha’u sei la hateten ba imi, katak Ha’u ba hadi’a fatin ba imi. Wainhira Ha’u ba hadi’a fatin ba imi, Ha’u sei fila hikas mai, lori imi ba hamutuk ho Ha’u; nune’e, iha nebé Ha’u hela ba, imi mós hela iha nebá. Tomé dehan ba Jesus: “ Na’i, ami la hatene ita ba nebé, oin sá ami bele hatene dalan?” Jesus simu ba Nia: “ Ha’u mak dalan, lialós no moris hun. Ema ida la liu karik housi Ha’u, la bele ba Aman Maromak.” Imi hatene Ha’u karik, imi sei hatene mos Ha’u Aman. Oras ne’e imi hatene ona, imi haré ona Nia.” Filipe dehan ba Jesus: “ Na’i, hatudu Aman Maromak mai ami; ne’e de’it to’o ona.” Jesus simu ba nia: “ Ha’u hela kleur ona ho imi, imi seidauk hatene Ha’u, Filipe? Ema nebé haré Ha’u, haré Ha’u Aman. Tan sá ó dehan: hatudu Aman Maromak mai ami? Ó la fiar katak Ha’u hela ho Aman Maromak; Aman Maromak hela ho Ha’u? Lia hirak ne’e Ha’u dehan ba imi, Ha’u la dehan hodi Ha’u-an rasik; Ha’u Aman nebé hela ho Ha’u, Nia mak halo  sasán hirak ne’e. Tebes, Ha’u dehan lialós ba imi: ema nebé fiar Ha’u sei halo mós buat hirak nebé Ha’u halo; nia sei halo boot liu tan hirak ne’e, tan Ha’u ba Aman Maromak.”

Lia Maksoyn.

Leave a Reply

Your email address will not be published. Required fields are marked *