shadow
Diocese de Dili > NOTÍCIAS > LETURA DIÁRIA > VI Domingo da Páscoa (ANO A)

VI Domingo da Páscoa (ANO A)

Primeira Leitura              Act. 8, 5-8. 14-17

Lia husi livro Apóstolo sira nia hahalok:

Iha loron hirak nebá, Filipe tun ba cidade Samaria nian ida, hodi haklaken kona ba Messias. Ema wa’in simu ho laran liafuan nebé Filipe haklaken; ema sira ne’e rona, hodi hanoin tuir doutrina ne’e; sira haré mos milagre nebé nia halo. Filipe hasai diabo housi ema wa’in nia laran. Molok sai, ema ne’e hakilar teb-tebes. Ema ain-to’os wa’in hetan di’ak. Iha cidade laran, ema haksolok teb-tebes. Waihira Apóstolo sira nebé iha Jerusalém rona tiha katak Samaria simu Maromak nia futar lia, sira haruka Pedro ho João ba iha nebá. Sira na’in rua tun ba samaria hodi reza ba ema Samaria sira atu sira simu Espírito Santo. Tan Espírito Santo la dauk tun ba sira, sira simu de’it Batismo hodi Na’i Jesus Cristo nia naran. Nune’e, halolo liman ba sira  leten atu simu Espírito Santo

Maromak Futar Lia.

 

Salmo Responsorial                                                                                                                         Sal. 65 (66), 1-3a, 4-5, 6-7a, 16-20

Refrão : Rai-klaran hotu hana’i Maromak, rai-klaran hotu hana’i Maromak!!! Repete-se

Hananu hahi nia naran.

Hawelok ho ksolok, hana’i;

Maromak kmanek tebes! Refrão

           

Rai hotu hakru’uk adora,

Hananu Na’i nia naran,

Mai hotu haksolok ho Maromak.

Maromak halo kmanek de’it ba ema. Refrão

 

Halo tasi nakfilak ba rai isin,

Hamaran mota atu ema hakur liu.

Mai haksolok Iha Maromak;

Nia, ita nia Liurai, kbiit na’in. Refrão

 

Maromak nia belun mai rona;

Ha’u haktuir buat nebé Na’i halo mai ha’u.

Kmanek ba Maromak, tan la hakribit ha’u nia hamulak,

La haluhan haraik bensa mai ha’u. Refrão

 

Segunda Leitura                                                                                                                                                                      1 Ped. 4, 13-16

Lia housi São Pedro nia surat:

Doben sira: Hana’i Jesus Cristo iha imi laran, hodi hatan nafatin ba naran ema ida; hatan kona ba imi nia laran metin. Maibé, hatan ho laran maus no respeito;  buka moris tuir dalan lós atu ema sira nebé foti lia bosok hodi hateten aat imi tan imi moris di’ak nu’udar Cristo nia Escolante, hetan moe ba sira. Terus tan halo di’ak, Maromak hakarak mak ne’e karik, ne’e folin liu terus, tan halo aat. Tebes, Cristo mate dala ida de’it tan ema maksalak- santo ida mate ba maksalak sira- atu lori imi ba Maromak. Nia terus iha Nia isin, maibé, hetan moris hias tan Espírito.

Maromak Futar Lia.

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete–se

Ema nebé hadomi Ha”u, nia rai Ha’u nia lia-fuan;

Ha’u Aman sei hadomi nia, ami mai hela iha nia. Refrão

 

 

Evangelho                                                                                                                                                                                      Jo. 14, 15-21

Na’i Jesus Cristo nia Evangelho nu’udar são João haktuir:

Iha tempo nebá, Jesus hateten ba nia Escolante sira: “Imi hadomi Ha’u karik, imi sei halo tuir Ha’u nia ukun fuan. Ha’u sei husu ba Ha’u Aman, atu haraik mahein seluk ida, hodi hela nafatin ho imi: Lialós nia Espírito, nebé mundo la bele simu, tan la haré no mos la hatene Nia. Imi sei simu Nia, tan hela ho imi, iha ona imi nia leet. Ha’u sei la husik hela imi oan-ki’ak, Ha’u sei fila fali mai hamutuk ho imi. La kleur, mundo la haré ona Ha’u, maibé, imi sei haré Ha’u, tan Ha’u moris ho imi, imi mos moris ho Ha’u. Iha loron ne’e, imi sei hatene katak Ha’u hela ho Ha’u Aman, imi hela ho Ha’u, Ha’u mos ho imi. Ema nebé moris tuir Ha’u ukun-fuan hodi halo tuir, ema ne’e hadomi Ha’u. Ema nebé hadomi Ha’u, Ha’u Aman mos sei hadomi nia; Ha’u sei hadomi nia, Ha’u sei hatudu Ha’u-an ba nia”.

Lia Maksoyn.

 

(Pode-se ler o Evangelho que sague, com a sua respectiva Aclamação, em vez do anterior)

 

Aclamação                                                                                                                                                                                            Jo. 14-18

Refrão : Aleluia, Aleluia!! Repete–se

Na’i ko’alia:

“Ha’u sei la husik hela imi nu’udar oan-ki’ak;

Ha’u bá hodi fila hikas mai imi,

Imi laran sei haksolok nafatin”. Refrão

 

Evangelho                                                                                                                                                                                        Jo. 17, 1-11a

Na’i Jesus Cristo nia Evangelho nu’udar são João haktuir:

Iha tempo nebá, Jesus foti matan ba lalehan, dehan: “Ha’u Aman, oras to’o ona: Hahí Ita Oan, atu Ita Oan hahí Ita, tuir kbiit nebé Ita haraik ba Nia boot liu criatura tomak; hodi Nia, ema hotu nebé Ita tau iha Nia liman sei hetan moris rohan laek. Ne’e mak moris rohan laek: Atu ema hatene Ita, Maromak lós, mesak de’it, ho Ida nebé haruka mai, Jesus Cristo. Ha’u hahí Ita iha rai, hodi halo to’o rohan buat nebé Ita haruka halo. Oras ne’e, Ha’u Aman hahí fali Ha’u, hamutuk ho Ita, ho kbiit ida nebé Ha’u iha uluk ho Ita, molok mundo ne’e mosu mai. Ha’u haklaken Ita naran ba ema nebé Ita haraik mai iha mundo. Sira Ita nian, maibé Ita fo mai Ha’u; sira halo tuir Ita nia lia-fuan. Oras ne’e, sira hatene katak buat hotu nebé Ha’u simu, mai housi Ita; tan Ha’u haklaken lia-fuan nebé Ita fo mai Ha’u. Sira simu ona lia hirak ne’e: sira hatene duni katak Ha’u mai housi Ita; sira fiar mos katak Ita haruka Ha’u mai. Ha’u harohan ba sira; Ha’u la harohan ba mundo, maibé, ba sira nebé Ita haraik mai Ha’u, tan sira Ita nian. Buat hotu nebé Ha’u nian, mai housi Ita; buat nebé Ita nian, Ha’u nian mos; iha buat sira ne’e, Ha’u simu hahí tomak. Ha’u la hela ona iha mundo, maibé, sira sei hela iha mundo, wainhira Ha’u la hasouru Ita”

Lia Maksoyn.

Leave a Reply

Your email address will not be published. Required fields are marked *